GovernmentEmployees : দৈনিক অগ্ৰদূত ডিজিটেল ডেস্ক : অসম চৰকাৰৰ কোনো প্রশাসনিক বিভাগে এতিয়াৰে পৰা মাষ্টাৰ ৰোল, কেজুৱেল আৰু স্থায়ী দৰমহাত কৰ্মচাৰী নিয়োগ কৰিব নোৱাৰিব। চৰকাৰৰ বিত্ত বিভাগে জাৰি কৰা এক কাৰ্যকৰী নির্দেশনাৰ জৰিয়তে এই কথা স্পষ্ট কৰি দিয়া হৈছে।
অগত্যা কোনো বিভাগে নিয়োগ কৰিবলগীয়া হ’লেও নিয়োজিতসকলৰ দৰমহাৰ পুঁজি বিচাৰি দাখিল কৰা প্ৰস্তাৱ বিত্ত বিভাগে গ্রহণ নকৰে। নির্দেশনাটোত এই বুলি উল্লেখ কৰা হৈছে যে মাষ্টাৰ ৰোল, কেজুৱেল আৰু স্থায়ী দৰমহাত নিয়োজিত কৰ্মচাৰীসকলৰ ভিতৰৰ যিসকলে নিৰ্ধাৰিত চৰ্ত যোৱা ছেপ্টেম্বৰলৈ পূৰণ কৰিবলৈ সক্ষম হৈছে তেওঁলোকক নিয়মীয়া পদত নিযুক্তি দিয়া নহ’লেও অসম চৰকাৰৰ কৰ্মচাৰীৰ ন্যূনতম দৰমহা গাঁথনি অনুসৰি অৱসৰৰ বয়সলৈ মাননি প্রদান কৰা হ’ব।
উল্লেখ্য যে এই মাননি লাভৰ মূল চৰ্তটো হ’ল কৰ্মচাৰীজন ন্যূনতম ১০ বছৰ একেৰাহে কৰ্মৰত হৈ থকাৰ উপৰি অনুমোদিত পদত নিযুক্তি পোৱা হ’ব নালাগিব। অতিৰিক্তভাৱে বিভাগীয় অনুশাসন ভংগৰ কোনো অভিযোগ সংশ্লিষ্ট কৰ্মচাৰীজনৰ বিৰুদ্ধে থাকিব নালাগিব।
চৰকাৰৰ বিভিন্ন বিভাগে ইতিমধ্যে ২০১৯ ৰ মে’ৰ পৰা যোৱা ছেপ্টেম্বৰলৈ ন্যূনতম দৰমহা গাঁথনি অনুসৰি মাননি বিচাৰি মাষ্টাৰ ৰোল, কেজুৱেল আৰু স্থায়ী দৰমহাৰ কৰ্মচাৰীৰ প্ৰস্তাৱ বিত্ত বিভাগক দাখিল কৰিছে। এই প্ৰস্তাৱবোৰ সম্প্ৰতি পৰীক্ষা কৰি থকা হৈছে। ইয়াৰে উপযুক্তসকলক ন্যূনতম দৰমহা গাঁথনি অনুসৰি মাননি প্রদান কৰা হ’ব।
কিন্তু ইয়াৰ পাছত আৰু সেই সুবিধা নাপাব। গতিকে তেনে কোনো প্রস্তাৱ বিত্ত বিভাগক দাখিল নকৰিবলৈও নিৰ্দেশনাটোৰ জৰিয়তে বিভাগবোৰক অৱগত কৰা হৈছে। উল্লেখ্য যে অসম চৰকাৰৰ প্ৰায় সকলো বিভাগত বৃহৎ সংখ্যক মাষ্টাৰ ৰোল, কেজুৱেল আৰু স্থায়ী দৰমহাত কৰ্মৰত কৰ্মচাৰী আছে।
তেওঁলোকে চাকৰি নিয়মীয়া কৰা আৰু অসম চৰকাৰৰ নিয়মীয়া কৰ্মচাৰীৰ সমহাৰত দৰমহা প্ৰদানৰ দাবী দীর্ঘদিনৰ পৰা উত্থাপন কৰি আহিছে।
