NobelPrizeInLiterature : দৈনিক অগ্ৰদূত ডিজিটেল ডেস্ক : ইতিহাসত ১৯ সংখ্যক বাৰৰ বাবে এগৰাকী মহিলালৈ কবিলৈ এইবাৰ সাহিত্যৰ ন’বেল বঁটা আগবঢ়োৱা হ’ল। কানাডাৰ কবি-অনুবাদক তথা প্ৰৱন্ধকাৰ এন কাৰ্ছনলৈ চলিত বৰ্ষৰ সাহিত্যৰ ন’বেল বঁটা আগবঢ়োৱা হৈছে। বৃহস্পতিবাৰে ৰয়েল ছুইডিছ একাডেমীয়ে এই কথা ঘোষণা কৰে।
ছুইডিছ একাডেমীৰ স্থায়ী সচিব ইনগ্রিড কালবার্গে প্রকাশ কৰা অনুসৰি তেওঁ নিজে ফোন কৰি কাৰ্ছনক এই বিৰল কৃতিত্বৰ অধিকাৰী হোৱাৰ বিষয়ে অৱগত কৰে। সম্প্রতি কাৰ্ছন আইচলেণ্ডত আছে। এই কথা সদৰী কৰি কাৰ্লবার্গে লগতে কয়, ‘তেওঁ মোক জনালে যে তেওঁ বতাহৰ শব্দ শুনি আছে। খবৰটো পাই তেওঁ আশ্চর্যান্বিত হ’ল। এই খবৰে তেওঁক অত্যন্ত সুখী কৰিছে। এই কথা তেওঁৰ কণ্ঠত শুনিবলৈ পালো।’
কাছনলৈ বঁটা প্ৰদানৰ কথা ঘোষণা কৰি বয়েল ছুইডিছ একাডেমীয়ে কয়, ‘ধ্রুপদী পৰম্পৰাৰ স’তে কৌতুকী সংলাপ কৰা সাহসী আৰু উদ্ভাৱনীমূলক সৃষ্টিৰ ভঁৰালৰে তেওঁ সমসাময়িক সাহিত্যত নতুন ৰূপৰ সৃষ্টি কৰিছে।’
উল্লেখ্য যে ১৯৫০৩ টৰণ্টোত কাৰ্ছনৰ জন্ম হয়। প্রিন্সটন, নিউ য়ৰ্ক আৰু মন্ট্রিলৰ মেকগিল বিশ্ববিদ্যালয়সহ বহু বিশ্বৰ অগ্রণী শিক্ষানুষ্ঠানত অধ্যাপনা কৰিছে কৃতবিদ্য সাহিত্যিকগৰাকীয়ে।
১৯৮৬ত তেওঁৰ প্ৰথমখন গ্রন্থ ‘ইৰ’জ দ্য বিটাৰছুইট’ প্রকাশ পায়। তেওঁ প্রাচীন গ্রীক পৰম্পৰা আৰু আকাংক্ষাৰ অন্বেষণ কৰি সাহিত্য সমালোচনাত বৰঙণি সংযোজন কৰিছে। তেওঁৰ সবাতোকৈ বিখ্যাত গ্রন্থখন হ’ল ‘অট’বায়’গ্রাফী অৱ বেড’।
এই গ্রন্থ হ’ল বিশ্বজুৰি বহু পঠিত এখন উপন্যাস। প্রাচীন গ্রীক কবি ষ্টেচিক’ৰাছৰ কবিতাৰ দ্বাৰা অনুপ্রাণিত হৈ তেওঁ এই উপন্যাস ৰচনা কৰে। গ্ৰীক পুৰাণৰ কাহিনীত বর্ণিত হেৰাক্লেছে বধ কৰা ৰঙা ডেউকাযুক্ত দৈত্য গেৰীয়নক উপন্যাসখনত তেওঁ নরকল্পিতৰূপত স্থান দিছে।
অনুবাদকৰূপেও তেওঁ ইতিমধ্যে বিশ্বজোৰা খ্যাতি অর্জন কৰিছে।উল্লেখ্য যে কার্টুনসহ বর্তমানলৈ মুঠ ১৯গৰাকী মহিলা সাহিত্যিকে সাহিত্যৰ ন’বেল বঁটা লাভ কৰিছে। ইয়াৰ বিপৰীতে এই বঁটা অৰ্জন কৰা পুৰুষ সাহিত্যিকৰ সংখ্যা হ’ল ১২৩জন। তদুপৰি কাৰ্ছন হৈছে টিএছ এলিয়ট বঁটা লাভ কৰা প্রথমগৰাকী মহিলা সাহিত্যিকো।
২০০১ত তেওঁ এই সন্মানীয় বঁটা লাভ কৰে। কালি তেওঁ বিশ্ব সাহিত্য জগতৰ সবাতোকৈ সন্মানীয় বঁটা লাভ কৰাৰ খবৰ বিয়পি পৰাৰ পাছতে তেওঁলৈ বহু সতীর্থ লেখক-লেখিকাই শুভেচ্ছা জনাইছে। এইসকলৰে অন্যতম হ’ল বিখ্যাত মার্কিন লেখিকা ছুছান ছণ্টাগ।
আনহাতে, একাংশ সমালোচকৰ মতে, ভাষাৰ প্ৰতি কাৰ্ছনৰ যি মোহ সেয়া তেওঁৰ অধিকাংশ সৃষ্টিকর্মত প্রতিফলিত হৈছে। তেওঁৰ সৃষ্টিকর্মসমূহে ভাষাৰ আতি-গুৰি উদ্ধাৰত নিয়োজিত পণ্ডিতৰ হাবিয়াসকো তুলি ধৰে বুলি ছুইডিছ একাডেমীয়ে মন্তব্য কৰিছে। কাৰ্ছনৰ শেহতীয়া গ্ৰন্থ ‘বং নৰ্মা’ ২০২৪ত প্রকাশ পায়।
সম্প্রতি তেওঁ ন’বেল বঁটা লাভৰ জৰিয়তে হান কাং, লুই গ্লুক আদিৰ দৰে লেখিকাৰ তালিকাত অন্তর্ভুক্ত হ’ল। উল্লেখ্য যে ২০২৪ত কাংঙে আৰু ২০২০ত গ্লুকে সাহিত্যৰ ন’বেল বঁটা লাভ কৰে।
ভাৰতৰ স’তেও আছে সংযোগ
কৃতবিদ্য কবি-অনুবাদক এন কাৰ্ছনৰ জ্যেষ্ঠ ভ্রাতৃয়ে একালত ভাৰততো বাস কৰিছিল। ড্ৰাগছৰ ব্যৱসায়ত অভিযুক্ত হৈ তেওঁৰ ভ্ৰাতৃ মাইকেল কাৰ্ছনে দেশ ত্যাগ কৰি দুটা দশক ভাৰত আৰু ইউৰোপ ভ্ৰমণত কটায়। ২০০০ত মাইকেলৰ মৃত্যু হয়।
এনেদৰে বিদেশত সুদীর্ঘকাল কটোৱা ভ্রাতৃক সাক্ষাৎ কৰিবলৈ বিচাৰিও ব্যর্থ হয় কাৰ্ছন। মাথোঁ এবাৰৰ বাবেও বিদেশ ভ্ৰমণৰত ভ্ৰাতৃৰ মুখ তেওঁ নেদেখিলে। এই দুখে তেওঁক সর্বদা পীড়িত কৰি আহিছে। মৰমৰ ভ্ৰাতৃক লৈ কাৰ্ছনে ‘নক্স’ শীর্ষক আত্মজীৱনীমূলক এখন গ্রন্থ ৰচনা কৰে। ২০১০ত প্রকাশিত এই গ্রন্থত ভাৰতো পটভূমিৰূপে আছে। এনেদৰে কাৰ্ছনৰ স’তে ভাৰতৰ সংযোগ স্থাপন হৈছে।
ভাৰত ভ্ৰমণৰত সময়ত মাইকেলে কাশ্মীৰো ভ্ৰমণ কৰিছিল। ভাৰতত থকাৰ সময়ত তেওঁ এখন চিঠি প্ৰেৰণ কৰিছিল। এই চিঠিয়েও কাৰ্ছনৰ আত্মজীৱনীমূলক গ্রন্থখনত স্থান লাভ কৰিছে। চিঠিখন প্ৰেৰণৰ সময়ত ভ্রাতৃ কাশ্মীৰত আছিল বুলি কাৰ্ছনে ধাৰণা কৰে। গ্ৰন্থখন সন্দর্ভত তেওঁ এক সাক্ষাৎকাৰত কৈছিল, ‘এজন ভ্রাতৃ কেতিয়াও স্মৃতিৰ পৰা নোহোৱা নহয়। মই তেওঁক গোপনে অনুসৰণ কৰি আছো। তেওঁ কেতিয়াও শেষ নহয়।’ কাছনে প্ৰকাশ কৰা অনুসৰি, ড্ৰাগছৰ গোচৰত অভিযুক্ত হৈ গ্ৰেপ্তাৰৰ পৰা হাত সাৰিবলৈ তেওঁৰ ভ্রাতৃয়ে ১৯৭৯ত কানাডাৰ পৰা পলায়ন কৰে। ইয়াৰ পৰৱৰ্তী ২২ বছৰ তেওঁ জাল পাৰপত্ৰৰে ভাৰত আৰু ইউৰোপ ভ্রমণত কটায়। পলাতক অৱস্থাত থকাৰ সময়ত মাথোঁ কেইবাৰমানহে ভগ্নীলৈ ফোন কৰিছিল। তেওঁকো সামৰি ৰচনা কৰা কাৰ্ছনৰ এই আত্মজীৱনীমূলক গ্রন্থ হৈছে শোকমালিতা।
