দৈনিক অগ্ৰদূত ডিজিটেল ডেস্কঃ চোৰবাগানৰ বিপৰ্যয়ৰ ঘটনাত নিশাজুৰি জেৰা চলোৱাৰ পাছত সাতজনক গ্ৰেপ্তাৰ কৰিছে আৰক্ষীয়ে। ধৃতসকলৰ ভিতৰত আছে চোৰবাগান সৰ্বজনীন দুৰ্গাপূজা কমিটীৰ একাধিক বিষয়ববীয়াও। ভিআইপি পাছৰ ব্যৱস্থাপনা আৰু ভিৰ নিয়ন্ত্ৰণৰ দায়িত্বত থকা লোকসকলকো গ্ৰেপ্তাৰ কৰিছে আৰক্ষীয়ে। ধৃতসকলৰ ভিতৰত আছে এটা ব্যক্তিগত নিৰাপত্তা সংস্থাৰ দুজন কৰ্মচাৰীও।
আৰক্ষী সূত্ৰে জানিব পৰা মতে, ধৃতসকলৰ ভিতৰত আছে চোৰবাগান সৰ্বজনীন দুৰ্গাপূজা কমিটীৰ সম্পাদক ৰাজকুমাৰ ছেওড়া ওৰফে ৰাজা আৰু কমিটীখনৰ সহ-সভাপতি শান্তনু ডুবে। কৌশিক সাহা নামৰ এজন লোককো গ্ৰেপ্তাৰ কৰা হৈছে। তেওঁৰ দায়িত্ব আছিল প্ৰতিমা দৰ্শনৰ ভিআইপি পাছ পৰীক্ষা কৰা আৰু ভিৰ নিয়ন্ত্ৰণ কৰা। ভিৰ নিয়ন্ত্ৰণৰ দায়িত্বত আছিল পিণ্টু দে। তেওঁকো গ্ৰেপ্তাৰ কৰিছে আৰক্ষীয়ে। ধৃতসকলৰ ভিতৰত আছে বিপ্লৱ মুখোপাধ্যায়।
তেওঁ পূজাৰ মণ্ডপৰ বাঁহৰ গাঁথনি নিৰ্মাণৰ কামৰ স’তে জড়িত আছিল। ইয়াৰ উপৰি ধৃতসকলৰ তালিকাত আছে সুমন চক্ৰৱৰ্তী আৰু ৰাজেশ পাল। দুয়োটা ব্যক্তিগত নিৰাপত্তা সংস্থাৰ কৰ্মচাৰী।
চোৰবাগানত দুৰ্ঘটনা সংঘটিত হোৱাৰ পিছত শনিবাৰে নিশা পূজাৰ উদ্যোক্তাসকলৰ কেবাজনো লোকক আটক কৰি জেৰা আৰম্ভ কৰে আৰক্ষীয়ে। সূত্ৰ অনুসৰি, জেৰাৰ বাবে মুঠ ১৪জনক আটক কৰা হৈছিল। উদ্যোক্তাসকলৰ বিৰুদ্ধে আৰক্ষীয়ে নিজাববীয়াকৈ এজাহাৰ পঞ্জীয়ন কৰে।
অনিচ্ছাকৃতভাৱে হত্যাৰ অভিযোগত থানাত গোচৰ ৰুজু কৰা হয়। ইয়াৰ মাজতে দেওবাৰে পুৱা জানিব পৰা যায় যে পূজা কমিটীৰ একাধিক শীৰ্ষ বিষয়ববীয়াসহ সাতজনক গ্ৰেপ্তাৰ কৰা হৈছে।
শনিবাৰে নিশাই মুখ্যমন্ত্ৰী শুভেন্দু অধিকাৰীয়ে স্পষ্ট কৰি দিয়ে যে দুৰ্ঘটনাৰ স’তে জড়িত কোনো লোককে ৰেহাই দিয়া নহ’ব। তেওঁ জানিবলৈ দিছিল যে ইতিমধ্যে চিচিটিভিৰ ফুটেজ সংগ্ৰহ কৰা হৈছে। সেই ফুটেজত কাৰোবাৰ গাফিলতি দেখা পালে ব্যৱস্থা গ্ৰহণ কৰা হ’ব।
পূজা কমিটীখনৰ যিখন পোষ্টাৰ প্ৰকাশ পাইছে, তাত দেখা গৈছে যে চোৰবাগানৰ এই পূজাৰ স’তে জড়িত হৈ আছে দেৱদীপ অধিকাৰী। তেওঁ মুখ্যমন্ত্ৰীৰ ভতিজা। জোড়াসাঁকোৰ বিজেপি বিধায়ক বিজয় ওঝা এই পূজা কমিটীৰ অধ্যক্ষ। উত্তৰ কলকাতা জিলা বিজেপিৰ সভাপতি তমোঘ্ন ঘোষো চোৰবাগানৰ এই পূজাৰ সৈতে জড়িত হৈ আছে।
তথ্য অনুসৰি,যোৱা নিশাৰ দুৰ্ঘটনাত এতিয়ালৈকে ১৯জন লোকৰ মৃত্যু হৈছে। আহত হৈছে আন ২৫জন লোক। তেওঁলোক বৰ্তমান চিকিৎসালয়ত ভৰ্তি হৈ আছে। চোৰবাগানৰ বিপৰ্যয়ত আহতসকলৰ খবৰ ল’বলৈ দেওবাৰে পুৱা কলকাতাৰ এখন ব্যক্তিগত চিকিৎসালয়ত উপস্থিত হয় কেন্দ্ৰীয় গৃহমন্ত্ৰী অমিত শ্বাহো। দুৰ্গাপূজা উপলক্ষে সেইদিনা কলকাতাত তেওঁৰ কেবাটাও কাৰ্যসূচী আছিল। উদ্ভৱ হোৱা পৰিস্থিতিৰ পৰিপ্ৰেক্ষিতত সেই কাৰ্যসূচীসমূহ স্থগিত ৰখাৰ সিদ্ধান্ত লৈছে শ্বাহে।
