Rokibul hussain:
দৈনিক অগ্ৰদূত ডিজিটেল ডেস্ক:মুখ্যমন্ত্ৰী ড: হিমন্ত বিশ্ব শৰ্মাৰ পৰামৰ্শ মতেই সদ্যসমাপ্ত নগাঁও লোকসভা সমষ্টিৰ উপ-নির্বাচনত এআইইউডিএফৰ মুৰব্বী বদৰুদ্দিন আজমল অৱতীৰ্ণহৈ বিজেপিক সহায় কৰিছিল বুলি কালি কংগ্ৰেছ সাংসদ ৰকিবুল হুছেইনে তীক্ষ্ণ বাক্যবাণ নিক্ষেপ কৰে। সেয়েহে আজমলে নির্বাচনত পৰাজয়বৰণ কৰিও ‘ধন্যবাদ যাত্রা’ উলিয়াইছিল বুলি সাংসদজনে কটাক্ষ কৰে।
নিৰ্বাচনৰ সময়ত এআইইউডিএফৰ বাহনত দুর্বৃত্তই আক্ৰমণ কৰাৰ পাছত মানুহ আৱেগিক হৈ স্থিতি সলনি কৰা বুলিও তেওঁ দাবী কৰে। লগতে তেওঁ এই উপ-নির্বাচনত বিজেপিয়ে বিগিং কৰিছিল বুলিও অভিযোগ উত্থাপন কৰে। হুছেইনে কয়, ‘চামগুৰিত ১৭ খন গাড়ীত আহি ৰিগিং কৰে। মই নিজৰ ঘৰলৈ আহোতে একাংশ চোৰ, ডকাইত আৰু দগাবাজে মোক ৰাস্তাত বাধা দিছে। এইসকলৰ বিৰুদ্ধে আজি মই নগাঁও সদৰ আৰক্ষী থানাত গোচৰ তৰিম।’
নৱ- নির্বাচিত সাংসদ দেবাশীষ শৰ্মাৰ নাম উল্লেখ নকৰাকৈ তেওঁকো সমালোচনা কৰি কংগ্ৰেছ সাংসদজনে কয়, ‘যিজন জিকিছে, তেওঁ ব্লুপ্রিন্ট কৰি লৈছে। নিৰ্বাচনৰ সময়ত কোনজন বিষয়া কি দায়িত্বত আছিল তাৰ তথ্য আমি সংৰক্ষণ কৰি ৰাখিছো। এই বিষয়বোৰৰ এটা এটাকৈ বিচাৰ হ’ব। দোষী বিষয়াসকলৰ বিৰুদ্ধে ব্যবস্থা গ্ৰহণৰ দাবী জনাম।’
লক্ষ্যণীয়ভাবে এই উপ-নির্বাচনত বিজেপি জয়যুক্ত হোৱাৰ বিপৰীতে এআইইউডিএফ দ্বিতীয় স্থানত আৰু কংগ্ৰেছে তৃতীয় স্থান লাভ কৰিবলৈহে সক্ষম হয়।
ADVERTISEMENT
