Guwahati Encounter:
দৈনিক অগ্ৰদূত ডিজিটেল ডেস্ক::এক শিহৰণকাৰী হত্যাকাণ্ডই সোমবাৰে গুৱাহাটী মহানগৰীক কঁপাই যায়। মহানগৰীৰ সদা ব্যস্ত জিএছ ৰোডৰ বৰা ছাৰ্ভিচত অৱস্থিত ‘হোটেল বিলাস ইন’ত সংঘটিত এই ঘটনাত এজন লোকে পুৰুষ-মহিলাসহ ছজনৰ ওপৰৰ্ত নির্বিচাৰে গুলিবর্ষণ কৰে।
মাজনিশালৈকে আৰক্ষীয়ে নিশ্চিত কৰা তথ্য অনুসৰি ঘটনাত দুগৰাকী মহিলাসহ পাঁচজন গুলিবিদ্ধৰ থিতাতে মৃত্যু হয়। ষষ্ঠজন গুৱাহাটী চিকিৎসা মহাবিদ্যালয় হাস্পতালত সংকটজনক অৱস্থাত জীৱন মৃত্যুৰে যুঁজি আছে। মহানগৰ আৰক্ষী আয়ুক্ত পাৰ্থসাৰথি মহন্তই কয় যে নিশা ন বজাত সংঘটিত এই ঘটনাৰ মূল অভিযুক্ত ঘনকান্ত গগৈ নামৰ লোকজনক ইতিমধ্যে বশিষ্ঠত গ্ৰেপ্তাৰ কৰা হৈছে। লগতে গগৈয়ে যিটো পইন্ট ৩২ পিষ্টলৰে নির্বিচাৰে গুলিবর্ষণ কৰিছিল সেই মাৰণাস্ত্ৰটো জব্দ কৰা হৈছে।
উল্লেখ্য যে নিহতসকলৰ তিনিজনেই হ’ল একেটা পৰিয়ালৰ। তেওঁলোক হ’ল হোটেলখনৰ স্বত্বাধিকাৰী হেলেনা ভৰালী, তেওঁৰ পুত্ৰ দেৱষী কাশ্যপ আৰু দেৱষীৰ পত্নী ৰিণিকি ভৰালী। ইয়াৰ লগতে হেলেনা ভৰালীৰ গাড়ীচালক সত্যেন্দ্ৰ পাঠক আৰু হোটেলৰ কৰ্মচাৰী নাৰায়ণ দাসৰো মৃত্যু হয়।উল্লেখ্য যে বৰপেটাৰ এটা অতি আঢ্যৱন্ত পৰিয়ালৰ এই হোটেলখন লীজত দিয়া হৈছিল। আৰক্ষী আয়ুক্ত মহন্তই জনোৱা মতে, ধৃত ঘনকান্ত গগৈয়ে হোটেলখন লীজত লৈছিল। হোটেলৰ মালিক পক্ষ আৰু লেছী পক্ষৰ মাজত দীর্ঘদিনৰ পৰা বিবাদ চলি আছিল। সেই বিবাদৰ পৰিণতিতে এই ভয়ংকৰ ঘটনা সংঘটিত হয়।
সূত্রত প্রকাশ যে লীজত লোৱাৰ পাছতো লেছীয়ে হোটেলৰ মালিক পক্ষক কমেও সাত মাহ ধৰি প্ৰাপ্য ধন আদায় দিয়া নাছিল। ইয়াকে লৈ দুয়োপক্ষৰ মাজত বিবাদ তুংগত উঠিছিল। সোমবাৰে এই গোটেই বিষয়টোৰ হেস্তনেস্ত কৰিবলৈ মালিক পক্ষই লেছী পক্ষৰ লগত এক আলোচনাৰ প্ৰস্তাৱ দিছিল। ইয়াৰ বাবে পুৱা বৰপেটাৰ পৰা গুৱাহাটীলৈ আহে হেলেনা ভৰালীৰ জ্যেষ্ঠ ভ্রাতৃ ভূদেৱ ভৰালী। দুপৰীয়া বৰপেটাৰ পৰা হেলেনা ভৰালী আহে। হেলেনা ভৰালীৰ বাহনখনৰ চালক আছিল সত্যেন্দ্ৰ পাঠক।
পৰিয়ালৰ সূত্ৰই সদৰী কৰা অনুসৰি হেলেনা ভৰালীৰ পৰিয়াল গুৱাহাটীৰ বাসিন্দা। সোমবাৰে প্ৰস্তাৱিত আলোচনাৰ বাবে তেওঁ বৰপেটাৰ পিতৃৰ ঘৰলৈ গৈছিল। নিশা আলোচনাৰ পূৰ্বে পৰিয়ালৰ চাৰিও হোটেলৰ প্ৰথম মহলাৰ এটা কোঠাত বহি আছিল। সকলোৱে ঘনকান্ত গগৈৰ অপেক্ষা কৰি আছিল। নিশা প্রায় ৮-৪৫ বজাত গগৈয়ে কোঠাটোত প্ৰৱেশ কৰে। তাৰ পাছতে সংঘটিত কৰে এই শিহৰণকাৰী হত্যাকাণ্ডটো।
ভৰালী পৰিয়ালৰ আত্মীয়ৰ সূত্ৰই সদৰী কৰা অনুসৰি ঘনকান্ত গগৈয়ে কোঠাটোত প্ৰৱেশ কৰি কিছু সময় পাছতে নিজৰ লগত থকা পিষ্টলটো উলিয়াই সকলোকে লক্ষ্য কৰি নির্বিচাৰে গুলিচালনা কৰে।
মুঠ সাত জাঁই গুলি চলোৱাৰো তথ্য লাভ কৰিছে আৰক্ষীয়ে। গুলিৰ আঘাতত হেলেনা ভৰালী, দেৱৰ্ষি কাশ্যপ, ৰিণিকি ভৰালী আৰু ভূদেৱ ভৰালী থিতাতে বাগৰি পৰে। ইয়াৰ পাছত অভিযুক্ত গগৈ বাহিৰলৈ ওলাই আহে আৰু বাহিৰত ৰৈ থকা সত্যেন্দ্ৰ দাস আৰু নাৰায়ণ দাসৰ ওপৰত গুলিবর্ষণ কৰে। তেজৰ ডোঙাত ছটফটাই থাকে সত্যেন্দ্র পাঠক আৰু ভূদেৱ ভৰালী। পাছত আৰক্ষীয়ে তেওঁলোকক উদ্ধাৰ কৰি গুৱাহাটী চিকিৎসালয় মহাবিদ্যালয় হাস্পতাললৈ প্ৰেৰণ কৰে। চিকিৎসাধীন অৱস্থাতে সত্যেন্দ্র পাঠকৰ মৃত্যু হয়।
এই ভয়ংকৰ হত্যাকাণ্ড সংঘটিত হোৱাৰ খবৰ কিছু সময়ৰ পাছতে ৰাষ্ট্ৰ হৈ পৰে। ফলত মুহূৰ্তৰ ভিতৰত লোকে লোকাৰণ্য হৈ পৰে সমগ্ৰ অঞ্চলটো। ব্যস্ত জিএছ ৰোডৰ দুয়োপাৰে সৃষ্টি হয় অভাৱনীয় যানজট। এনে এক লোমহর্ষক ঘটনাৰ গম ল’বলৈ মহানগৰীখনৰ দূৰদূৰণিৰ পৰাও বহু লোক ঢপলিয়াই আহে।
ADVERTISEMENT
