কৰ’না ভাইৰাছক প্ৰতিৰোধৰ কাৰণে দিয়া তলাবন্ধৰ কাৰণে সম্প্ৰতি জনসাধাৰণ গৃহবন্দী ৷ তাৰ মাজতে কলিয়াবৰৰ আকাশত দেখা গৈছে শ্যামল কপৌ বা সেউজীয়া কপৌ হিচাপে চিহ্নিত দুষ্প্ৰাপ্য পক্ষী ৷ কলিয়াবৰৰ বননিত এতিয়া নিৰ্জনতাৰ আঁৰ লৈ নিবিঘ্নে পাখি মেলিছে এই কপৌ প্ৰজাতিৰ চৰাইজাকে ৷ সকলোতে তলাবন্ধৰ নিমাওমাও তথা নিস্তব্ধ পৰিবেশৰ মাজত কলিয়াবৰৰ কলং সূতিৰ পাৰৰ ডাঠ বননিত পৰিলক্ষিত হৈছে এই ইংৰাজীত ‘ইমৰেল্ড ড’ভ’ (Emerald dove) নামেৰে পৰিচিত তথা তামিলনাডুৰ জাতীয় পক্ষী হিচাপে স্বীকৃত শ্যামল কপৌ ৷ ’কুৰু- কুৰু – কুৰুৰহ’ শব্দ কৰি সাধাৰণতে অকলশৰীয়াকৈ, যোৰপাতি বা সৰু সৰু দল বান্ধি ওখ গছ থকা হাবি, বাগিচা আদি অঞ্চলত বসবাস কৰে এই প্ৰজাতিৰ চৰাইবিধে ৷ ২৩ৰ পৰা ২৮ ছেণ্টিমিটাৰ দৈৰ্ঘ্যৰ আমাৰ সাধাৰণতে দেখা পোৱা কপৌ চৰাইতকৈ সামান্য সৰু আকাৰৰ এই চৰাইবিধৰ ওজন ৯০ৰ পৰা ১৮০গ্ৰাম হ’ব ৷
এপ্ৰিলৰ পৰা ছেপ্তেম্বৰৰ মাজৰ সময়ছোৱাত এইবিধ চৰায়ে কনী পাৰি ১২-১৫ দিনৰ ভিতৰত পোৱালি ফুটাই ইহঁতৰ আপদাল কৰে ৷ সাধাৰণতে এটা বা দুটা বগা বা ঘিউ বৰণীয়া কনী পাৰে মাইকী চৰাইজনীয়ে ৷ অতিকৈ ধুনীয়া এই চৰাইবিধৰ মতা চৰাইটোৰ ঠোঁটটোৰ বৰণ ৰঙা-গুলপীয়া৷ মুৰটো ছাঁইৰঙী আৰু ডিঙিৰ পৰা পেটৰ অংশলৈকে তাম বৰণৰ পাখিৰে আবৃত৷ দুয়োখন ডেউকা গাঢ় সেউজীয়া৷ ডেউকাত ৰ’দ পৰি চিকমিকনি উঠি এক সুকীয়া শোভা প্ৰত্যক্ষ কৰোৱাই ৷ ডেউকাৰ ওপৰৰ ফালে দুই এটা শুদ্ধ বগা পাখিৰ আঁচ দেখা যায় ৷ ঠেঙৰ ৰং গুলপীয়া, নখ ক’লা-কজলা৷ মতা চৰাইটোৰ তুলনাত মাইকী চৰাইজনী দেখাত কিছু পৃথক ৷ গছৰ গুটি, শস্য আৰু কোঁহপাত খাই জীৱন নিৰ্বাহ কৰা এই দুষ্প্ৰাপ্য সেউজীয়া কপৌ চৰাই ভাৰতৰ তামিলনাডুকে ধৰি নিদিষ্ট স্থান তথা শেহতীয়াকৈ নগাঁও জিলাৰ কলিয়াবৰৰ কলঙৰ পাৰৰ ডাঠ হাবিৰ লগতে চুবুৰীয়া ৰাষ্ট্ৰ ম্যানমাৰ, থাইলেণ্ড, মালয়েছিয়া, ভিয়েটনাম, দক্ষিণ চীন, ফিলিপাইন, ইণ্ডোনেছিয়াৰ লগতে অষ্ট্ৰেলিয়াৰ হাবিতো দেখা পোৱা যায় ৷
১৯৭২ চনৰ বন্যপ্ৰাণী সুৰক্ষা আইন মতে দুষ্প্ৰাপ্য পক্ষীৰ তালিকাত স্থান লাভেৰে সুৰক্ষাৰ ওপৰত গুৰুত্ব দিয়া এই পক্ষীবিধৰ কলিয়াবৰৰ বননিত হঠাৎ প্ৰৱেশক লৈ উৎসাহিত হৈ পৰিছে পক্ষীপ্ৰেমী প্ৰতিজন লোক ৷ ইয়াৰ মাজতে এতিয়া কনী পাৰি বংশবৃদ্ধি কৰাৰ সময়চোৱাত কলিয়াবৰৰ বননিত এই ধুনীয়া চৰাইজাকৰ উপস্থিতিয়ে জীপাল কৰিছে সকলোৰে মন৷ অৱশ্যে সাধাৰণতে লোকচকক্ষুত ধৰা নিদিয়া এই চৰাই প্ৰজাতিক সুৰক্ষা দিবৰ বাবে ইতিমধ্যেই মন বান্ধিছে কেইগৰাকীমান কলিয়াবৰীয়াই ৷ ইতিমধ্যেই সৰ্বত্ৰ তলাবন্ধৰ বাবে পৰিৱেশ নিকা হৈ পৰাৰ লগতে সকলোতে নিমাওমাও পৰিবেশ তথা নিস্তব্ধতাই বিৰাজ কৰাৰ বাবেই এনে বহু দুষ্প্ৰাপ্য পক্ষীকূলৰ কলিয়াবৰৰ বনভূমিলৈ আগমন ঘটাৰ সম্ভাৱনাৰ কথা প্ৰকাশ কৰিছে পক্ষীপ্ৰেমীসকলে ৷ সকলোৰে আশা, সেউজীয়া চৰাইজাকে জীপাল কৰক কলিয়াবৰৰ শ্যামলী বননি ৷