শিশু বা কম বয়সীয়াসকলৰ ক্ষেত্ৰত কৰ’না ভাইৰাছৰ সংক্ৰমণৰ হাৰ অত্যন্ত কম হ’লেও একেবাৰে শূণ্য নহয় । আকৌ কোনো কোনো ব্যতিক্ৰমী ক্ষেত্ৰত কৰ’নাত আক্ৰান্ত শিশু বা নাবালক-নাবালিকাৰ শৰীৰত আন কেতবোৰ উপসৰ্গয়ো দেখা দিয়া পৰিলক্ষিত হৈছে । এনে এক জটিল পৰিস্থিতিৰ সন্মুখীন হৈছিল আমেৰিকাৰ লুইচিয়ানাৰ ক’ভিংটনৰ এগৰাকী ১২বছৰীয়া নাবালিকা । দুবাৰকৈ হৃৎস্পন্দন বন্ধৰ লগতে একাধিক অংগ বিকল হোৱাৰ পাছতো কৰ’নাক জয় কৰি সম্প্রতি সম্পূৰ্ণ সুস্থ জুলিয়েট ডালে নামৰ নাবালিকাগৰাকী । ক’ভিড-১৯ পজিটিভ হোৱাৰ সমান্তৰালকৈ জুলিয়েট আক্রান্ত হৈছিল ‘মাল্টিছিষ্টেম ইনফ্লেমেটৰী ছিন্ড্ৰ’মত । যাৰ প্ৰকোপত নাবালিকাগৰাকী গুৰুতৰভাৱে অসুস্থ হৈ পৰাত আনকি দুবাৰকৈ হৃৎস্পন্দনো বন্ধ হৈ পৰিছিল । অৱশ্যে কঠিন যুঁজত জয়ী হৈ তেওঁ এতিয়া সুস্থ হৈ স্বগৃহলৈ উভতি গৈছে । আনকি কেতিয়া হৃদযন্ত্ৰই কাম কৰিবলৈ বন্ধ কৰিছিল, সেই কথাও জুলিয়েটৰ মনত নাই । ৰোগক জয় কৰি এই ১২বছৰীয়া নাবালিকাই সম্প্ৰতি আনন্দ মনেৰে নিজগৃহত বহি অনলাইনত স্কুলৰ পাঠদানত অংশগ্ৰহণ কৰি আছে ।
পৰিয়ালৰ সূত্ৰই জনোৱা মতে, কিছুদিন ধৰি অসুস্থতা অনুভৱ কৰি আছিল আমেৰিকাৰ প্ৰথম ‘মাল্টিছিষ্টেম ইনফ্লেমেটৰী ছিন্ড্ৰ’ম’ আক্ৰান্ত জুলিয়েট । বমি, ক্লান্তি আৰু জ্বৰৰ সমান্তৰালকৈ ওঁঠ জুৰি ক্ৰমাৎ নীলাভ হৈ পৰিছিল । পৰিস্থিতি ক্ৰমাৎ জটিল হোৱা দেখি পিতৃ-মাতৃয়ে জুলিয়েটক হাস্পতাললৈ নিয়ে । পৰীক্ষাত দেখা গ’ল যে জুলিয়েট ক’ভিড পজিটিভ হোৱাৰ লগতে এনে এবিধ জটিল ৰোগত আক্ৰান্ত, যি ৰোগ বিশ্বত বিগত কিছু মাহত ব্ৰিটেইন আৰু ইটালীৰ কিছু কম সংখ্যক শিশুৰ মাজতহে দেখা গৈছে । চিকিৎসকৰ তৰফৰ পৰা জনোৱা হয় যে এই উপসৰ্গৰ নাম মাল্টিছিষ্টেম ইনফ্লেমেটৰী ছিন্ড্ৰ’ম । জুলিয়েটক ভেন্টিলেটৰত ৰখা হয় । পাছত ঠিক কৰা হ’ল যে নাবালিকাক এয়াৰলিফটত আন হাস্পতাললৈ নিয়া হ’ব । কিন্তু তেতিয়াই বিপত্তি ঘটে ।
চিকিৎসক সকলে জনায় যে জুলিয়েটৰ কাৰ্ডিয়াক এৰেষ্ট হৈছে । কিছু সময়ৰ পাছত জনা গ’ল যে জুলিয়েটক সুস্থ কৰি তোলা হৈছে ।ইয়াৰ কিছু সময়ৰ পাছত হেলিকপ্টাৰৰ বাবে অপেক্ষা কৰি থকা সময়তে আকৌ এবাৰ সৰু ছোৱালী জনীৰ হৃৎস্পন্দন বন্ধ হৈ পৰে ।ইয়াৰ সমান্তৰাল কৈ একাধিক অংগও বিকল হ’বলৈ ধৰে । অৱশ্যে চিকিৎসকৰ প্ৰচেষ্টাত এইবাৰো বিপদ দূৰ হ’ল । জ্ঞান ঘূৰাই পোৱা পাছত জুলীয়েটে গমো নাপালে যে তেওঁৰ হৃৎস্পন্দন দুবাৰকৈ বন্ধ হৈছিল । কন্যা সন্তানৰ পুনৰ্জন্মৰ বাবে চিকিৎসক সকলক বিশেষভাৱে ধন্যবাদ জ্ঞাপন কৰে জুলিয়েটৰ পিতৃ-মাতৃয়ে ।