বিগত ১৫ দিনৰ ধাৰাবাহিকতা অব্যাহত ৰাখি আজিও ভাৰতত বিশ্বৰ সকলো ৰাষ্ট্ৰৰ ভিতৰত এদিনত সৰ্বাধিক লোক কৰ’নাত আক্ৰান্ত হয় ৷ যোৱা ২৪ ঘন্টাত দেশত ৬৫ হেজৰৰো অধিক লোকৰ শৰীৰত কৰ’নাৰ সংক্ৰমণ ধৰা পৰে ৷ ইয়াৰ ফলত দেশত মুঠ আক্ৰান্তৰ সংখ্যা ২৮,২৩,১৯১ জনলৈ বৃদ্ধি হয় । আনহাতে মৃতকৰ সংখ্যা বৃদ্ধি পায় ৫৩,৮৪৯ জন ।
ইপিনে প্ৰয়োজনীয় অনুমোদন লাভ কৰিলে ভাৰতৰ বজাৰলৈ প্ৰথম আমদানি হ’ব পাৰে অক্সফৰ্ড বিশ্ববিদ্যালয়ে আৱিষ্কাৰ কৰা প্ৰতিষেধক ।সেয়া আহিব পাৰে এই বছৰৰ শেষত তথা আগন্তুক বৰ্ষৰ আৰম্ভণিতে জানুৱাৰী বা ফ্ৰেব্ৰুৱাৰীত । ইয়াৰ পূৰ্বে তিনিটা স্তৰৰ ট্ৰায়েল সফলতাৰে অতিক্ৰম কৰি কোনো ধৰণৰ প্ৰতিষেধক ভাৰতৰ বজাৰত উপলব্ধ ন’হব বুলি আশা কৰিছে বিশেষজ্ঞসকলে ৷
অক্সফ’ৰ্ডে প্ৰস্তুত কৰা ক’ভিড-১৯ প্ৰতিষেধকৰ ভাৰতত দ্বিতীয় আৰু তৃতীয় পৰ্যায়ৰ পৰীক্ষাৰ বাবে ইতিমধ্যে কেন্দ্ৰীয় ড্ৰাগ কন্ট্ৰ’লাৰৰ পৰা জৰুৰী অনুমোদন লাভ কৰিছে পুনেৰ সংস্থা ছিৰাম ইনষ্টিটিউটে ৷ দুটা পৰ্যায়ত সফল হ’লে ভাৰতত প্ৰতিষেধক প্ৰস্তুৰ বাবে কেন্দ্ৰীয় অনুমোদনৰ প্ৰয়োজন ।একে ধাৰণা কৰিছে আমেৰিকাৰ শীৰ্ষস্তৰৰ মহামাৰী বিশেষজ্ঞ এন্টনী ফ’ছীয়ে ।
তেওঁ কয় যে মানৱ শৰীৰত পৰীক্ষাৰ তিনিটা পৰ্ব ফেজ ৱান, টু আৰু থ্ৰী সফলতাৰে অতিক্ৰম কৰি প্ৰতিষেধক বজাৰলৈ আহিবলৈ অন্তত ৷ চাৰিৰ পৰা ছমাহ সময় আহিব । এই ক্ষেত্ৰত বছৰৰ একেবাৰে শেষলৈ অথবা আগন্তুক বৰ্ষৰ আৰম্ভণিৰ ফালে পৰীক্ষাৰ সকলোবোৰ পৰ্যায়ৰ সফলতা অৰ্জন কৰি কোনো প্ৰতিষেধক বজাৰলৈ অহাৰ সম্ভাৱনা নাই ।
ফ’ছীয়ে কয় যে যিমানসংখ্যক প্ৰয়োজন তাৰ অৰ্ধেক প্ৰতিষেধক যদি আগন্তুক বছৰত প্ৰস্তুত কৰা সম্ভৱ হয় তেন্তে বিশ্বজুৰি কৰ’না সংক্ৰমণ বহু পৰিমাণে ৰোধ হ’ব । বিশেষজ্ঞসকলৰ মতে অক্সফৰ্ডৰ সহযোগী সংস্থা এষ্ট্ৰা জেনেকাৰ স’তে সদ্য চুক্তি সম্পন্ন কৰে অষ্ট্ৰেলিয়াৰ চৰকাৰে ৷ দেশৰ প্ৰধানমন্ত্ৰী স্কট মৰিছনে ঘোষণা কৰিছে যে এই প্ৰতিষেধক অষ্ট্ৰেলিয়াত প্ৰস্তুত কৰা হ’ব আৰু দেশখনৰ নাগৰিকসকলক বিনামূলীয়াকৈ দিয়া হ’ব ৷