এখন তৰাদেখা ছালৰ তলতে কনমাণি দুই পুত্ৰক বুকুত সাৱটি দিনৰাতি পাৰ কৰিছে এজন দিব্যাংগ লোকে ৷ নাম তেওঁৰ ৰাজেশ প্ৰজা, ঘৰ কলিয়াবৰৰ চিকনি-বৰহোলা অঞ্চলত ৷ এটা উৱলি যোৱা জুপুৰীতে থাকে এই ৰাজেশ প্ৰজাৰ তিনিজনীয়া পৰিয়াল । মাতৃহাৰা দুটি কণমাণি পুত্ৰক বুকুত সাৱটি বহুকেইটা বছৰ বসবাস কৰিছে পিতৃ ৰাজেশ প্ৰজাই ।
উল্লেখ্য যে, বিশেষ ভাৱে সক্ষম লোকজনৰ ভৰি এখন লেঙেৰা হোৱা বাবেই উপাৰ্জনৰ পথ উলিয়াব নোৱাৰে দুৰ্ভগীয়া ৰাজেশ প্ৰজাই । বৰ্ণাতীত এক জীৱন কাহিনী এইগৰাকী লোকৰ ৷ চৰকাৰৰ দৃষ্টি নপৰা এই পৰিয়ালটোৱে আজি পৰ্যন্ত নাপালে এটা চৰকাৰী বাসগৃহ। বতাহ-বৰষুণ দিলেই উজাগৰী নিশা পাৰ কৰিবলগীয়া হয় পৰিয়ালটোৱে । ভঙা টিনপাতৰ মাজৰে সৰকি অহা বৰষুণৰ পানীৰে তেওঁলোকৰ ঠুনুকা সপোনবোৰ চুৰমাৰ কৰি পেলায় ।
ঘৰৰ ভিতৰৰ পৰাই নিশাৰ আকাশৰ তৰা গণিব পৰাকৈ জৰাজীৰ্ণ ঘৰটোৰ চাৰিবেৰৰ অৱস্থা অতি শোচনীয় । পাকঘৰ¸ শোৱনি কোঠা বুলি ঘৰটোত নাই কোনো বিশেষ কোঠা, আছে কেৱল চৌপাশে উৱলি যোৱা দুখীয়াৰ ভঙা পঁজাৰ মৰ্মবেদনা । শোৱাপাটীৰ দৃশ্য দেখিলে প্ৰতিজন হৃদয়বানৰে চকুপানী বৈ আহিব ।
যি সময়ত চৰকাৰে এটাও মাটিৰ ঘৰ নাথাকে বুলি ঘোষণা কৰিছে তেনে সময়তে এইখন অসমৰে কলিয়াবৰ চিকনি বৰহোলাৰ ৰাজেশ প্ৰজাই বৰষুণৰ পৰা বাচিবলৈ টিৰপালৰে সৰ্বশৰীৰ ঢাকি জীৱন অতিবাহিত কৰিবলগীয়া হৈছে। দুবেলা-দুসাঁজ কোনোমতে খুজি-মাগি যোগাৰ কৰি পোহপাল দিবলগীয়া হৈছে দুই সন্তানক। চৰকাৰী ৰেচন কাৰ্ড আছে যদিও সেয়া আজিৰ তাৰিখত পৰ্যাপ্ত নহয় ।
ওচৰৰে সুহৃদয়বান দুই একে খাবলৈ দিয়া সামগ্ৰীৰে কোনোমতে চলাই নিছে পৰিয়ালটি । সন্তানক এযোৰ ভাল কাপোৰ পিন্ধাব নোৱাৰা দুখত পিতৃ ৰাজেশে হিয়া-ঢাকুৰি কান্দে আৰু কেতিয়াবা উচুপি উঠে । চৰকাৰে তেওঁলোকৰ পৰিয়ালটিক উদ্ধাৰ কৰিব বুলি ৰাজেশে বহু আশাৰে বাট চাইছিল । কিন্তু চৰকাৰ তথা জনপ্ৰতিনিধিয়ে আজি পৰ্যন্ত সহায় কৰিবলৈ আগবাঢ়িল নাহিল ৰাজেশৰ পৰিয়ালটিক । এই অভিযোগ খোদ দুৰ্ভগীয়া ৰাজেশ প্ৰজাৰ ।
সন্তানক ভাল মানুহ কৰি গঢ়ি তুলিবলৈ সপোন দেখা ৰাজেশে পৰিস্থিতিৰ বাবে থমকি ৰ’ব লগা হৈছে । কণমানি সন্তান দুটি স্কুলত শিক্ষা লবলৈ পঠিয়াইছে যদিও সেইয়া কিমান দিনলৈ অব্যাহত থাকিব তাক লৈ চিন্তিত হৈ পৰিছে পিতৃ ৰাজেশ ৷ কাৰণ পৰিয়ালটিৰ আৰ্থিক অৱস্থা শূণ্য বুলি ক’লেও ভুল কৰা নহ’ব।
চৰকাৰ তথা জনপ্ৰতিনিধিক পুনৰবাৰ সহায়-ভিক্ষা কৰি পৰিয়ালটিক উদ্ধাৰ কৰিবলৈ কৰযোৰে আহ্বান জনাইছে ৰাজেশ প্ৰজাই । চৰকাৰে যদি সু- দৃষ্টি নিক্ষেপ নকৰে, তেন্তে সন্তানসহ পিতৃয়ে আত্মহত্যা কৰিবলৈ বাধ্য হ’ব বুলি দুখেৰে প্ৰকাশ কৰিছে লোকজনে ।
বিকশিত অসমৰ শ্ল’গান দিয়া দুখীয়াৰ চৰকাৰ বুলি সততে কৈ অহা চৰকাৰখনে এই দুৰ্ভগীয়া পৰিয়ালটোক চৰকাৰখনৰ কোনো এখন আঁচনিয়ে সামৰি ল’বনে, এই লৈ প্ৰশ্ন কৰিছে হৃদয়বান লোকজনে ৷
