কলগাছিয়াৰ ক্ষুদ্ৰখোৱাত আই আৰু মানাহ নৈৰ বিধ্বংসী গৰাখহনীয়া

বিগত দুমাহত জনীয়া সমষ্টিৰ ক্ষুদ্ৰখোৱা আৰু দক্ষিণ অভয়াপুৰী সমষ্টিৰ সন্তোষপুৰ গাঁৱৰ ৬৫ টা পৰিয়ালৰ ঘৰ, মাটি, ভেটি, খেতি-পথাৰ সম্পূৰ্ণভাৱে আই আৰু মানাহ নদীৰ বিধ্বংসী গৰাখহনীয়াত জাহ গৈছে । সমাজসেৱক নুৰুল হকৰ এডোখৰ ঠাইত সৰ্বস্বান্ত ৬৫ টা পৰিয়ালে কেম্প পাতি নৰক যন্ত্ৰণাত অনিদ্ৰা ৰজনী কটাইছে । কেম্পটোত নাই বিশুদ্ধ খোৱাপানী, খাদ্য, শৌচাগাৰ আৰু দৰৱ ।

চৰকাৰে দুই কেজি চাউল যোগান ধৰিয়েই দায়িত্ব সামৰাৰ অভিযোগ ভুক্তভোগী খহনীয়াগ্ৰস্ত ৰাইজৰ । গাঠিৰ ধন খৰচ বাঁহৰ পাৰকুপাইনেৰে গৰাখহনীয়া প্ৰতিৰোধৰ চেষ্টা কৰিছে খহনীয়াগ্ৰস্ত ৰাইজে । চৰকাৰৰ ওচৰত গৰাখহনীয়াত সৰ্বস্বান্ত হোৱা লোকে পুনৰ সংস্থাপনৰ দাবী জনাইছে । চৰকাৰে পুনৰ সংস্থাপনৰ ব্যৱস্থা নকৰিলে খহনীয়াগ্ৰস্ত ৬৫ টা পৰিয়ালে আই আৰু মানাহ নদীত সমূহীয়া আত্ম জাহ দিয়াৰ ভাবুকি প্ৰদান কৰিছে ।