Assam Job Fairs :
চৰকাৰী খণ্ডৰ উপৰি ব্যক্তিগত খণ্ডৰ উদ্যোগ-প্রতিষ্ঠানসমূহত নিযুক্তি উদ্দেশ্যে কেন্দ্ৰীয় চৰকাৰৰ শ্ৰম আৰু নিয়োগ মন্ত্রণালয়ৰ অধীনত তথা ৰাজ্য চৰকাৰসমূহৰ সহযোগত নেছনেল কেৰিয়াৰ ছাৰ্ভিচে (এনচিএছ) অনুষ্ঠিত কৰি অহা নিয়োগ মেলা (জৱ ফেয়াৰ্ছ)ৰ জৰিয়তে অসমৰ মাত্র ৩,২২৩ জন প্রার্থীহে নিৰ্বাচিত হৈছে।
উল্লেখ্য যে চিমেণ্ট উদ্যোগ, ব্যক্তিগত চিকিৎসালয়, বাহন বিক্রী প্রতিষ্ঠান, বিলাসী হোটেল আদিত নিয়োগৰ বাবে ৰাজ্যত নেছনেল কেৰিয়াৰ ছাৰ্ভিচে জিলা নিয়োগ কেন্দ্রসমূহত বিগত বৰ্ষৰ ২৩ ডিচেম্বৰৰ পৰা চলিত বৰ্ষৰ চাৰি জানুৱাৰীলৈ নিয়োগ মেলা অনুষ্ঠিত কৰিছিল।
লাখ লাখ নিবনুৱাৰে ভাৰাক্ৰান্ত অসমত চৰকাৰী চাকৰি নহ’লেও এটা ব্যক্তিগত খণ্ডৰ চাকৰিৰ আশাৰে জিলাই জিলাই হেজাৰ হেজাৰ নিবনুৱাই এই নিয়োগ মেলাসমূহত অংশগ্ৰহণ কৰিছিল যদিও যোৱা পাঁচ বছৰত এনে নিয়োগ মেলাৰ জৰিয়তে ৰাজ্যত মাত্র ৩,২২৩জন প্রার্থীয়েহে নিৰ্বাচিত হ’বলৈ সক্ষম হৈছে।
শ্রম আৰু নিয়োগ মন্ত্রণালয়ে প্ৰকাশ কৰা তথ্য অনুসৰি, ২০১৭ৰ পহিলা এপ্ৰিলৰ পৰা চলিত বৰ্ষৰ ৩০ নৱেম্বৰ পর্যন্ত দেশৰ ৩৪ খন ৰাজ্য তথা কেন্দ্রীয় শাসিত অঞ্চলত নেছনেল কেৰিয়াৰ ছাৰ্ভিচৰ উদ্যোগত মুঠ ২৪,৪০৩খন নিয়োগ মেলা অনুষ্ঠিত হৈছে।
এই সময়ছোৱাত অসমত ১৯৭খন নিয়োগ মেলা অনুষ্ঠিত হৈছে আৰু এইবোৰৰ জৰিয়তে ৰাজ্যখনৰ ৩,২২৩ প্ৰাৰ্থী নিৰ্বাচিত হৈছে বুলি তথ্যত প্ৰকাশ পাইছে।
উল্লেখ্য যে এই নিয়োগ মেলাৰ জৰিয়তে সৰ্বাধিক উপকৃত হৈছে পাঞ্জাৱ, গুজৰাট আৰু উত্তৰ প্ৰদেশ। কেন্দ্ৰীয় নিয়োগ মন্ত্রণালয়ে প্রকাশ কৰা তথ্য অনুসৰি, উল্লিখিত সময়ছোৱাত পাঞ্জাৱত অনুষ্ঠিত মুঠ ৫,৭৬৬খন নিয়োগ মেলাৰ জৰিয়তে দেশৰ ভিতৰতে সৰ্বাধিক ৪,২৪,৬১০ জন প্রার্থী বাছনি হৈছে।
ইয়াৰ বিপৰীতে গুজৰাটত ২,৭৬৫ খন নিয়োগ মেলাৰ জৰিয়তে ৩,৪৫,৯০৭ জন আৰু উত্তৰ প্ৰদেশত ২,০৬৭খন নিয়োগ মেলাৰ জৰিয়তে ১,৯৯,২২০ জন প্রার্থী বাছনি হৈছে।
ইয়াৰ উপৰি মধ্যপ্ৰদেশত অনুষ্ঠিত ৮২৪খন নিয়োগ মেলাৰ জৰিয়তে ৯৮,২০৫ জন, ৯৪৪খন নিয়োগ মেলাৰ জৰিয়তে কৰ্ণাটকত ৫৭,৫৩৪ জন, ৬৪৩খন নিয়োগ মেলাৰ জৰিয়তে ঝাৰখণ্ডত ৪৩,২৮৮জন, ৫১৮খন নিয়োগ মেলাৰ জৰিয়তে তামিলনাডুত ৪১,৭৭৪জন, ৬৪৮খন নিয়োগ মেলাৰ জৰিয়তে ৰাজস্থানত ৪০,৪৪৯ জন, ৭৯০ খন নিয়োগ মেলাৰ জৰিয়তে মহাৰাষ্ট্ৰত ২৩,৬৫৫ জন, ১,৯৯০খন নিয়োগ মেলাৰ জৰিয়তে অন্ধ্ৰপ্ৰদেশত ২৩,০৭৮ জন, ১,০০৯ খন নিয়োগ মেলাৰ জৰিয়তে হিমাচল প্ৰদেশত ২০,৫৪৯ জন, ১,৪৯৬খন নিয়োগ মেলাৰ জৰিয়তে চত্তিশগড়ত ১৮,৮২৭ জন, ১,৯০৯ খন নিয়োগ মেলাৰ জৰিয়তে কেৰালাত ১৮,২৫৯ জন, ৪১৬ খন নিয়োগ মেলাৰ জৰিয়তে ওড়িছাত ১৭,৬৯২ জন, ১৭৪খন নিয়োগ মেলাৰ জৰিয়তে উত্তৰাখণ্ডত ১০,০৬৫ জন আৰু ৫৪২খন নিয়োগ মেলাৰ জৰিয়তে বিহাৰত ৯,৩৬৩ জন প্রার্থী বাছনি হৈছে বুলি নিয়োগ মন্ত্রণালয়ৰ তথ্যত প্ৰকাশ পাইছে।
আনহাতে, হাৰিয়ানাত অনুষ্ঠিত ১৯৮খন নিয়োগ মেলাৰ জৰিয়তে ৬,৯৯৩ জন, ৬০খন নিয়োগ মেলাৰ জৰিয়তে জম্মু-কাশ্মীৰত ৩,৮০০ জন, ৭৮৪ খন নিয়োগ মেলাৰ জৰিয়তে তেলেংগানাত ৩,৭৬২জন, ৫৮ খন নিয়োগ মেলাৰ জৰিয়তে ত্ৰিপুৰাত ২,৩৬৪ জন, ১৫৭খন নিয়োগ মেলাৰ জৰিয়তে মণিপুৰত ২,১৮৬ জন, ছখন নিয়োগ মেলাৰ জৰিয়তে দমন আৰু ডিউত ১,১১৬ জন, ১১খন নিয়োগ মেলাৰ জৰিয়তে গোৱাত ৬০৭ জন, ২১৯খন নিয়োগ মেলাৰ জৰিয়তে পশ্চিমবংগত ৫৯৯ জন, ৫৮খন নিয়োগ মেলাৰ জৰিয়তে দিল্লীত ৩৮১ জন, ১৪ খন নিয়োগ মেলাৰ জৰিয়তে চণ্ডিগড়ত ১৪৩ জন, ছখন নিয়োগ মেলাৰ জৰিয়তে মেঘালয়ত ৫২ জন, সাতখন নিয়োগ মেলাৰ জৰিয়তে ছিকিমত ৪০ জন, চাৰিখন নিয়োগ মেলাৰ জৰিয়তে নগালেণ্ডত ৩১ জন আৰু অৰুণাচল প্ৰদেশত অনুষ্ঠিত হোৱা পাঁচখন নিয়োগ মেলাৰ জৰিয়তে দুজন প্রার্থী বাছনি হৈছে।
উল্লেখ্য যে ২০১৭ৰ পহিলা এপ্ৰিলৰ পৰা চলিত বৰ্ষৰ ৩০ নৱেম্বৰ পৰ্যন্ত নেছনেল কেৰিয়াৰ ছাৰ্ভিচৰ উদ্যোগত দেশৰ ৩৪খন ৰাজ্য আৰু কেন্দ্ৰীয় শাসিত অঞ্চলত মুঠ ২৪,৪০৩ খন নিয়োগ মেলা অনুষ্ঠিত হৈছে, য’ত ১৪,২০,৯৩৬ জন প্রার্থী বাছনি হৈছে বুলি নিয়োগ মন্ত্রণালয়ে তথ্য সদৰী কৰিছে।
