Famous industrialist Ratan Tata passes away:
শাৰদীয় দুৰ্গোৎসৱৰ আনন্দ উছাহৰ মাজতে দেশবাসীৰ বাবে আহিল এক দুখৰ খবৰ ৷ দেশবাসীক কন্দুৱাই নেদেখাস্থানলৈ গ’ল গৈ উদ্যোগ জগতৰ মহীৰূহ ৰতন টাটা ৷ মুম্বাইৰ ব্ৰীচকেণ্ডি হাস্পতালত আজি নিশা শেষ নিশ্বাস ত্যাগ কৰে প্ৰখ্যাত শিল্পীপতি গৰাকীয়ে ৷ উল্লেখ্য যে গুৰুতৰ ভাৱে অসুস্থ হৈ চিকিৎসাধীন হৈ আছিল চিকিৎসালয় খনত। মৃত্যুৰ সময়ত টাটাৰ বয়স আছিল ৮৬ বছৰ ।
টাটা গ্রুপৰ অধ্যক্ষ “ৰতন টাটাৰ শেহতীয়াকৈ স্বাস্থ্যৰ অৱনতি ঘটাত তেওঁক ইন্টেনচিভ কেয়াৰ ইউনিট (আইচিইউ)ত ৰখা হৈছিল। সোমবাৰে তেওঁক মুম্বাইৰ ব্ৰীচকেণ্ডি হাস্পতালত ভর্তি কৰোৱাৰ পাছত আজি নিশা তেওঁ শেষ নিশ্বাস ত্যাগ কৰে । ২০২২ত অসম চৰকাৰৰ সৰ্বোচ্চ সম্মান ‘অসম বৈভৱ’ বঁটাৰে সন্মান জনোৱা টাটাৰ মৃত্যুত সম্প্রতি দেশজুৰি শোকৰ ছাঁ পৰিছে।
ইফালে, টাটাক চিকিৎসালয়ৰ পৰা যাবলৈ দিয়া হৈছিল। ইয়াৰ পাছতে টাটাই নিজৰ এক্স হেণ্ডেলত সদৰী কৰে যে নিয়মীয়া স্বাস্থ্য পৰীক্ষাৰ বাবেহে তেওঁক চিকিৎসালয়লৈ নিয়া হৈছে। তেওঁৰ স্বাস্থ্যৰ অৱস্থা গুৰুতৰ বুলি হোৱা চৰ্চাবোৰ উৰা বাতৰি বুলিও উল্লেখ কৰিছিল। অথচ বয়স আৰু বয়সজনিত চিকিৎসা সাহায্যৰ বাবেহে তেওঁ চিকিৎসালয়খনলৈ গৈছিল। নিজৰ স্বাস্থ্য ভালে থকা বুলিও টাটাই লিখিছিল।
ইয়াৰ বিপৰীতে আজি বিশিষ্ট উদ্যোগপতিজনৰ স্বাস্থ্যজনিত সমস্যা গুৰুতৰ হৈ পৰাত তেওঁক আইচিইউত ৰখা হৈছিল। টাটা ছনছ, টাটা ইন্ডাস্ট্রীজ, টাটা ম’টৰ্ছ, টাটা ষ্টীল আৰু টাটা কেমিকেলৰ চেয়াৰমেন এমেৰিটছ উদ্যোগপতিজনৰ মৃত্যুৰ খবৰে সকলোকে শোকস্তব্ধ কৰি তুলিছে। তেওঁৰ মৃত্যুত প্ৰধানমন্ত্ৰী নৰেন্দ্ৰ মোদী,গৃহমন্ত্ৰী অমিত শ্বাহ,প্ৰতিৰক্ষা মন্ত্ৰী ৰাজনাথ সিং,অসমৰ মুখ্যমন্ত্রী ড° হিমন্ত বিশ্ব শর্মাকে ধৰি বিভিন্নজনে শোকপ্রকাশ কৰিছে। উল্লেখ্য যে ১৯৩৭ৰ ২৮ ডিচেম্বৰত টাটাৰ জন্ম হৈছিল।
আনহাতে মহাৰাষ্ট্ৰৰ মুখ্যমন্ত্ৰী একনাথ শিণ্ডেই বুধবাৰে নিশা মুম্বাইত কয় যে উদ্যোগপতি ৰতন টাটাৰ অন্তিম সংস্কাৰ সম্পূৰ্ণ ৰাষ্ট্ৰীয় মৰ্যাদাৰে সম্পন্ন কৰা হ’ব । তেওঁ লগতে কয় যে জনসাধাৰণে তেওঁৰ প্ৰতি অন্তিম সন্মান জনোৱাৰ বাবে বৃহস্পতিবাৰে পুৱা ১০ বজাৰ পৰা আবেলি ৪ বজালৈ ৰতন টাটাৰ নশ্বৰদেহ এন চি পি এত ৰখা হৈছে ।
ইপিনে, তেওঁৰ প্ৰতি শ্ৰদ্ধাৰ চিনস্বৰূপে মহাৰাষ্ট্ৰ চৰকাৰে বৃহস্পতিবাৰে ৰাজ্যিক শোক দিৱস ঘোষণা কৰিছে । এই সময়ছোৱাত সকলো কাৰ্যালয়তে ৰাষ্ট্ৰীয় পতাকা অৰ্ধনমিত থাকিব আৰু সকলো ধৰণৰ মনোৰঞ্জনমূলক অনুষ্ঠান বাতিল কৰা হৈছে ।
টাটাৰ মৃত্যুত মুখ্যমন্ত্ৰী গৰাকীইে এক্সৰ এটা পোষ্টত কয় যে ২০০৮ ত মুম্বাই আক্ৰমণৰ পিচত তেওঁ দেখুওৱা সংকল্প সকলোৱে সদায় মনত ৰাখিব । একেদৰে মহাৰাষ্ট্ৰৰ উপ-মুখ্যমন্ত্ৰী দেবেন্দ্ৰ ফাড়নভিছে ৰতন টাটাৰ মৃত্যু দেশৰ বাবে ডাঙৰ ক্ষতি বুলি উল্লেখ কৰে । ৰতন টাটা কেৱল এগৰাকী অতি সফল উদ্যোগপতিয়েই নহয়, তেওঁ দেশ আৰু সমাজৰ বাবে যিধৰণে কাম কৰিছিল তাৰ বাবেও এক ডাঙৰ ব্যক্তিত্ব আছিল ।
তেওঁ কেৱল সফল উদ্যোগ স্থাপন কৰায়ে নহয়, এক ট্ৰাষ্ট স্থাপন কৰিছে, যি হৈছে এক ব্ৰেণ্ড আৰু যিয়ে আমাৰ দেশক এক বিশ্বজনীন প্ৰতিচ্ছবি প্ৰদান কৰিছে । অতি ডাঙৰ হৃদয়ৰ এজন ব্যক্তিয়ে আজি আমাক এৰি গৈছে, এইটো দেশৰ বাবে এক ডাঙৰ ক্ষতি । ফাড়নভিছে সাংবাদিকৰ আগত কয় ।
উল্লেখ্য যে উদ্যোগপতি ৰতন টাটাৰ নশ্বৰদেহ বৃহস্পতিবাৰে পুৱতি নিশা কোলাবাত থকা তেওঁৰ বাসগৃহলৈ অনা হয় । মহীৰূহ গৰাকীক শেষ শ্ৰদ্ধা জনাবৰ সোঁত বৈছে অনুৰাগীৰ ৷ আনহাতে, ৰতন টাটাৰ মৃত্যুৰ পৰিপ্ৰেক্ষিতত মহাৰাষ্ট্ৰ চৰকাৰে মুম্বাইত বৃহস্পতিবাৰে নিৰ্ধাৰণ কৰা সকলো কাৰ্যসূচী বাতিল কৰে ।
প্ৰয়াত ৰতন টাটাৰ নশ্বৰ দেহ আজি বিয়লি ৪ বজাত মুম্বাইৰ ৱৰ্লিত পাৰ্চী ৰীতি-নীতি অনুসৰি ৰাষ্ট্ৰীয় মৰ্যাদাৰে সম্পন্ন হ’ব অন্ত্যেষ্টিক্রিয়া৷ শেষ কৃত্যত কেন্দ্ৰীয় চৰকাৰৰ হৈ ভাগ ল’ব গৃহমন্ত্ৰী অমিত শ্বাহে ৷ আনহাতে ৱৰ্লিৰ অন্ত্যেষ্টিক্রিয়াস্থলীলৈ ভিভিআইপি আৰু ভিআইপিৰ অংশগ্ৰহণৰ প্ৰতি লক্ষ্য ৰাখি মুম্বাই আৰক্ষীয়ে কটকটীয়া সুৰক্ষা বেষ্টনী গঢ়ি তুলিছে ৷ মহাৰাষ্ট্ৰৰ স্বয়ং মুখ্যমন্ত্ৰী গৰাকীয়ে অন্ত্যেষ্টিক্রিয়া তদাৰক কৰিছে ৷
মনকৰিবলগীয়া যে,মহাৰাষ্ট্ৰৰ মুখ্যমন্ত্ৰী একনাথ শিণ্ডেৰ অধ্যক্ষতাত আজি অনুষ্ঠিত কেবিনেটত গ্ৰহণ কৰা হয় এক গুৰুত্বপূৰ্ণ প্ৰস্তাৱ ৷ ৰতন টাটাক মৰণোত্তৰভাবে ভাৰত ৰত্ন প্ৰদানৰ আহ্বান কেন্দ্ৰক ৷