New law has hit thousands of cab drivers:
চৌদিশে আকাশলংঘী মূল্যবৃদ্ধিয়ে সাধাৰণ জনতাক মাধমাৰ শোধাই অহাৰ সময়তে দৈনিক ব্যয় অনুপাতে সম্প্রতি উপার্জন যথেষ্ট হ্রাস পোৱাত মহানগৰীত বাহন চলাই পৰিয়াল পোহপাল দি অহা হেজাৰ হেজাৰ চালকৰ পৰিয়ালসমূহৰ মাজত একপ্রকাশ হাহাকাৰ লাগিছে। এফালে আকাশলংঘী মূল্যবৃদ্ধি আৰু আনফালে ভূতৰ ওপৰত দানহ পৰাৰ দৰে চৰকাৰী নতুন নতুন আইনে চালকসকলক ঢেঁটুচেপা দিবলৈ আৰম্ভ কৰিছে ।
যাৰ ফলত উপায়হীন হৈ শ শ চালকে ইয়াৰ পৰা পৰিত্ৰাণ পাবলৈ তথা কে’বাটাও দাবীৰে আজিৰে পৰা ধৰ্ণাস্থলী চচলত অনশনৰ কাৰ্যসূচী গ্ৰহণ কৰিছে। অসম ৰাজ্যিক চালক সন্থা আৰু সদৌ অসম কেব ৱেলফাৰ ফেডাৰেছনৰ আহ্বানত ইতিমধ্যে অনশনৰ দৰে কাৰ্যসূচী ৰূপায়ণ কৰি তেওঁলোকে সম্মুখীন হোৱা সমস্যাৰাজি শীঘ্রে সমাধান কৰিবলৈ চৰকাৰক দাবী জনাইছে।
এই সন্দৰ্ভত চালক সন্থাৰ সভাপতি ধ্রুবজ্যোতি অসম আৰু ফেডাৰেছনৰ সভাপতি দীপক ছেত্রীয়ে কয় যে মহানগৰীত কেব সেৱাৰ জৰিয়তে জীৱন নিৰ্বাহ কৰি অহা চালকসকলক অ’লা, উবেৰ আদি কোম্পানীসমূহে নিতৌ নতুন নির্দেশনা জাৰি কৰি চালকসকলৰ ওপৰত মাধমাৰ শোধাই আহিছে। এনে পর্যায় পাইছেগৈ যে দিনটো কঠোৰ পৰিশ্ৰম কৰিও কেব চালকসকলে ন্যূনতম পাৰিশ্ৰমিকৰ পৰা বঞ্চিত হ’বলগীয়া হৈছে। লগতে চৰকাৰে নীতিবহির্ভূতভাবে ব্যক্তিগত বাহনক বাণিজ্যিক ক্ষেত্ৰত ব্যৱহাৰ কৰিবলৈ অনুমতি প্ৰদান কৰি এই সেৱাত জড়িত চালকসকলক কফিনত ভৰাই শেষৰটো গজাল মাৰিবলৈ চেষ্টা কৰিছে বুলি তেওঁলোকে অভিযোগ তোলে।
সমান্তৰালভাৱে তেওঁলোকে সকলোৰে বিকাশৰ কথা কোৱা এই চৰকাৰে চালকসকলৰ বাবে আজিকোপতি কোনোধৰণৰ আঁচনি গ্রহণ নকৰিলে বুলি ক্ষোভ উজাৰি ইয়াৰ বিপৰীতে এশ টকাত ৩০ শতাংশৰ পৰা ৪০ শতাংশ কমিচন আদায় কৰাত কোম্পানীসমূহক ৰক্ষণাবেক্ষণহে দি আহিছে বুলি মন্তব্য কৰে।
উল্লেখ্য যে এই প্ৰতিবাদৰ জৰিয়তে চালকসকলে ১০টাকৈ দাবী উত্থাপন কৰিছে। সন্থাৰ সাধাৰণ সম্পাদক ৰিংকু কুমাৰ দাসে দাবীসমূহ উল্লেখ কৰি কয় যে ২০১৯ৰ কেন্দ্ৰীয় পৰিবহণ আইন অনুসৰি প্ৰতিটো কেব কোম্পানীৰে সকলো কৰ-কাটল অন্তর্ভুক্ত কৰি ২০ শতাংশ কমিচনহে ল’ব পাৰে; কিন্তু এতিয়া এই কোম্পানীসমূহে নীতিবহির্ভূতভাবে ৩০ শতাংশৰ পৰা ৪০ শতাংশ পর্যন্ত কমিচন আদায় কৰি আহিছে।
ইয়াক শীঘ্রে বন্ধ কৰিবলৈ তেওঁ দাবী জনাই লগতে কয় যে সৰু-বৰ সকলো বাহনৰ প্ৰতি কিলোমিটাৰত খৰচৰ বিপৰীতে উপাৰ্জনৰ সঠিক নিৰিখ নির্ধাৰণ কৰক। ব্যক্তিগত বাহন বাণিজ্যিক ক্ষেত্ৰত ব্যৱহাৰ কৰাটো তাৎক্ষণিকভাবে বন্ধ কৰা, বিমানকোঠত বিনামূলীয়া পার্কিঙৰ ব্যৱস্থা কৰা, চালক-যাত্ৰীৰ সুবিধার্থে প্রতিখন বাহনত অত্যাধুনিক চি চি কেমেৰা সংস্থাপন কৰা, সময়ে সময়ে পৰিবহণ বিভাগে লগোৱা বিভিন্ন কৰ তথা অত্যধিক জৰিমনা আদায় তথা এই, অত্যাচাৰ বন্ধ কৰিবলৈ তেওঁ দাবী জনায়।
উল্লেখ্য যে কেব চালকৰ প্ৰতিবাদত অজাপ সভাপতি লুৰীণজ্যোতি গগৈকে ধৰি বহুকেইজন বিশিষ্ট ব্যক্তিয়ে অংশগ্ৰহণ কৰি এই আন্দোলনৰ প্রতি সমর্থন আগবঢ়ায়।
