DGP GP Singh:জি পি সিঙৰ বিদায়
অসম আৰক্ষীৰ নতুন ডিজিপিৰ বাবে পাঁচজনীয়া তালিকা
চিআৰপিৰ সঞ্চালক প্রধান পদত নিযুক্তি অসমৰ অভিজ্ঞতাৰে দেশৰ কাম কৰিম:সিং
: অৱশেষত সকলো চৰ্চাৰ অন্ত পেলাই অসম আৰক্ষীৰ পৰা বিদায় ল’লে সঞ্চালক প্রধান জ্ঞানেন্দ্র প্রতাপ সিঙে। কেন্দ্রীয় কেবিনেটৰ নিযুক্তি সমিতিয়ে সিঙক কেন্দ্ৰীয় সংৰক্ষিত আৰক্ষী বাহিনী (চিআৰপিএফ) ৰ সঞ্চালক প্রধানৰূপে নিযুক্তি প্রদান কৰিছে।
চিআৰপিএফৰ সঞ্চালক প্রধান হিচাপে সিঙে ২০২৭ৰ ৩০ নৱেম্বৰলৈ কাৰ্যনিৰ্বাহ কৰিব পাৰিব। ভাৰতীয় আৰক্ষী সেৱাৰ ১৯৯১ বেটচৰ অসম-মেঘালয় কেডাৰৰ বিষয়া সিঙে ২০২৩ৰ ৩১ জানুৱাৰীত অসম আৰক্ষীৰ সঞ্চালক প্ৰধানৰূপে নিযুক্তি হৈছিল। বিভিন্ন সময়ত বিতৰ্কৰ আৱৰ্তত নাম সোমাই পৰা সিং ইয়াৰ পূৰ্বে বিশেষ আৰক্ষী সঞ্চালক প্রধান আছিল। ইয়াৰ পূৰ্বে সিং কেন্দ্ৰীয় সংস্থাৰ অধীনস্থ এছপিজিত কৰ্মৰত আছিল।
আনহাতে, ২০১৩ত তেওঁ মহাপৰিদৰ্শক হিচাপেৰাষ্ট্ৰীয় অনুসন্ধান সংস্থা (এনআইএ) ত কৰ্মৰত আছিল। দীর্ঘদিন কেন্দ্রীয় সংস্থাত কৰ্মৰত থকাৰ মাজতে ২০১৯ৰ ডিচেম্বৰত সিঙক জৰুৰীভাৱে অসমলৈ বদলি কৰা হৈছিল। সেই সময়ত ৰাজ্যত গুৰুতৰ ৰূপ ধাৰণ কৰা নাগৰিকত্ব সংশোধনী আইন বিৰোধী আন্দোলন দমনৰ বাবেই নিশাৰ ভিতৰতে গৃহ মন্ত্রণালয়ে সিঙক অসমলৈ বদলি কৰি পঠিয়াইছিল। আইন-শৃংখলা শাখাৰ বিশেষ সঞ্চালক প্রধানৰূপে নিযুক্তি দিয়া সিং তদাৰকী আৰু দুর্নীতি নিবাৰক শাখাৰো সঞ্চালক হৈছিল।
আগন্তুক গণ্যৰাজ্য দিৱসৰ পাছতহে অসম এৰাৰ সম্ভাৱনা থকা সিঙে নতুন নিযুক্তিক লৈ কয়, ‘মোৰ ওপৰত যি দায়িত্ব ন্যস্ত কৰা হৈছে, তাক অভিজ্ঞতাৰ আধাৰত মই সফলতাৰে পালন কৰিবলৈ সক্ষম হ’ম বুলি বিশ্বাস কৰো। অসমত মোৰ যথেষ্ট অভিজ্ঞতা হৈছে। সেই অভিজ্ঞতাৰ আধাৰত মই দেশত কাম কৰিম।’ জিপি সিঙৰ বিদায়ৰ পাছত অসম আৰক্ষীৰ শীৰ্ষ পদটো কোনে চম্ভালিছে, তাৰ চৰ্চাও সমানে চলিছে।
ইতিমধ্যে গৃহ বিভাগে পাঁচজনীয়া তালিকা প্রস্তুত কৰিছে। এই তালিকাত নাম থকাসকল হ’ল ক্রমে বৰ্তমানৰ বিশেষ সঞ্চালক প্রধান হৰমিৎ সিং, মানৱ অধিকাৰ আয়োগৰ সঞ্চালক আৰ প্ৰসাদ মীনা, কেন্দ্রীয় ডেপুটেচনত থকা এ ভি ৱাই কৃষ্ণা আৰু দীপক কুমাৰৰ নাম। এই তালিকাত অসম আৰক্ষীৰ অপৰাধ অনুসন্ধান বিভাগৰ সঞ্চালক মুন্না প্ৰসাদ গুপ্তাৰ নামো আছে।