Two health office in Nagaon have been rente for many years:
বিকল্প ব্যৱস্থা থকা সত্ত্বেও নগাঁও জিলাৰ স্বাস্থ্য বিভাগৰ একাধিক গুৰুত্বপূর্ণ কাৰ্যালয় বছৰ বছৰ ধৰি ভাড়াঘৰতে চলাই থকা পৰিলক্ষিত হৈছে। এনেদৰে বছৰ বছৰ ধৰি চহৰখনত ভাড়া ঘৰত চলাই থকা হৈছে নগাঁৱৰ স্বাস্থ্য বিভাগৰ অতিৰিক্ত মুখ্য স্বাস্থ্য বিষয়াৰ কার্যালয় আৰু জিলা মেলেৰিয়া বিষয়াৰ কার্যালয়।
এই কার্যালয়সমূহৰ ভাড়াৰ বাবদ চৰকাৰে প্রতি মাহে এক মোটা অংকৰ ধন ব্যয় কৰি থাকিবলগীয়া হৈছে। অথচ এই চৰকাৰী কার্যালয়সমূহ স্বাস্থ্য বিভাগৰ নিজা ভৱনত চলোৱাৰ বিকল্প ব্যৱস্থা আছে। নগাঁও ভোগেশ্বৰী ফুকননী অসামৰিক চিকিৎসালয়ৰ প্ৰায়বোৰ বিভাগেই নগাঁও মেডিকেল কলেজ হাস্পতাললৈ ইতিমধ্যে স্থানান্তৰ কৰা হৈছে।
ফলত চিকিৎসালয়খনত বহু ঘৰ খালী হৈ আছে। ইচ্ছা কৰিলে স্বাস্থ্য বিভাগে বিভাগটোৰ সেই কার্যালয় সমূহ নগাঁও ভোগেশ্বৰী ফুকননী অসামৰিক চিকিৎসালয়লত খালী হৈ থকা ভৱন সমূহলৈ স্থানান্তৰ কৰিব পাৰে।
ইপিনে, নগাঁও চহৰৰ কলঙৰ পাৰত ব্ৰিটিছ চৰকাৰৰ আমোলতে বিগত ১৮৫৪তে অতি আটকধুনীয়াকৈ নিৰ্মাণ কৰা হৈছিল তেতিয়াৰ নগাঁৱৰ চিভিল ছাৰ্জনৰ চৰকাৰী আৱাসগৃহটো। চহৰখনৰ মাজমজিয়াতে এক বৃহৎ অঞ্চলত চাংঘৰৰ আৰ্হিত নিৰ্মাণ কৰা চিভিল ছাৰ্জনৰ চৰকাৰী আৱাস গ্ৰহটোত কে’বাটাও আহল বহল কোঠা আছে।
২০০০ ৰ আগলৈকে জিলা যুটীয়া স্বাস্থ্য সেবা সঞ্চালকজনে এই বাংলোটোকেই নিজা চৰকাৰী আৱাসগৃহ হিচাপে ব্যৱহাৰ কৰিছিল। এই বাংলোটোক চৰকাৰী আৱাসগৃহ ৰূপে ব্যৱহাৰ কৰা অন্তিমজন নগাঁও জিলাৰ যুটীয়া স্বাস্থ্য সেৱা সঞ্চালক আছিল ডাঃ আনন্দৰাম বৰুৱা। ২০০০ৰ পাছৰ পৰা নগাঁও জিলাৰ কোনো এজন যুটীয়া স্বাস্থ্য সেৱা সঞ্চালকেই এই ইতিহাস প্রসিদ্ধ বাংলোটোক চৰকাৰী আৱাসগৃহ হিচাপে ব্যৱহাৰ কৰা নাই।
সকলোৱে নিজা গৃহ অথবা চহৰৰ ভাড়া ঘৰতহে থকা পৰিলক্ষিত হৈছে। ২০০১-২০০২ৰ পৰা এই পৰিত্যক্ত বাংলোটো সম্পূর্ণ পৰিত্যক্ত অৱস্থাত আছে। চৰকাৰে ইচ্ছা কৰিলে সেইটো গৃহ মেৰামতি কৰি তাতো স্বাস্থ্য বিভাগৰ এটা কার্যালয় স্থাপন কৰিব পাৰে। যিহেতু এই আৱাস গৃহটোৰ চৌহদটোও প্রকাণ্ড সেয়েহে চৰকাৰে ইচ্ছা কৰিলে সেইটো চৌহদতেই নগাঁৱৰ স্বাস্থ্য বিভাগৰ কাৰ্যালয় গৃহ নির্মাণ কৰি ভাড়াঘৰত চলাই থকা কার্যালয়সমূহ স্থানান্তৰ কৰিব পাৰে। কিন্তু তাকে নকৰি কাৰ্যালয় গৃহৰ ভাড়াৰ নামতেই মাহে হেজাৰ হেজাৰ টকা অযথা ব্যয় কৰি থকা হৈছে।