New Delhi Railway Station
কুম্ভত তীৰ্থযাত্ৰীৰ ভিৰ, ষ্টেচনত ঠেলা হেঁচাত মৃত অন্তত ১৮, আহত বহুতো
নতুন দিল্লীৰ এটা ৰে’ল ষ্টেচনত যাত্ৰীসকলৰ মাজত ভিৰৰ বাবে হোৱা ঠেলা হেঁচাত তিনিটা শিশু আৰু ১৪ গৰাকী মহিলাসহ কমেও ১৮ জন লোক নিহত হয়। আহত বহুতো।
প্ৰাথমিক তথ্য অনুসৰি, শনিবাৰে নিশা প্ৰায় ১১ বজাত ষ্টেচনত হোৱা ঠেলা হেঁচাৰ পাছত চাৰিগৰাকী মহিলা অজ্ঞান হৈ পৰে। তেওঁলোকক উদ্ধাৰ কৰা কৰি ওচৰৰ চিকিৎসালয়লৈ লৈ যোৱা হয়।
সংবাদ সংস্থা এএনআইৰ মতে, পৰিস্থিতি নিয়ন্ত্ৰণ কৰিবলৈ চাৰিখন অগ্নি নিৰ্বাপক গাড়ী ঘটনাস্থলীলৈ ততাতৈয়াকৈ প্ৰেৰণ কৰা হয়। কিছু সময়ৰ পাছতে, হতাহতসকলৰ খবৰ পোৱা গৈছে।
প্ৰথমতে, ১৫ জনলোকৰ মৃত্যু হোৱাৰ খবৰ পাই। পাছত, দিল্লী আৰক্ষীয়ে ১৮ জন লোকৰ মৃত্যু নিশ্চিত কৰে।
দেওবাৰে ৰে’লৱেই এই ক্ষতিপূৰণ ঘোষণা কৰে। মৃতকৰ পৰিয়ালক দিয়া হ’ব ১০ লাখ টকা। ইয়াৰ উপৰিও শনিবাৰৰ ঘটনাত গুৰুতৰভাৱে আহত হোৱা সকলে লাভ কৰিব ডেৰ-দুই লাখ টকা। সামান্য আঘাতপ্ৰাপ্তসকলক এক লাখ টকা দিয়া হ’ব।
ৰে’লৱে সূত্ৰ অনুসৰি, শনিবাৰে নিশা কুম্ভ মেলাৰ পৰা অহা তীৰ্থযাত্ৰীসকলৰ স’তে নতুন দিল্লী ষ্টেচনৰ ১৩ আৰু ১৪ নং প্লেটফৰ্মত ভিৰ লাগে। যাত্ৰীসকলে এইটোও অভিযোগ কৰে যে এই দুখন প্লেটফৰ্মত ৰেলখন বিলম্বিত হয়।
কিছুমানে দাবী কৰে যে দুখন ৰেল বাতিল কৰা হৈছিল ফলস্বৰূপে, ভিৰৰ মাজত এক শ্বাসৰুদ্ধ পৰিস্থিতিৰ সৃষ্টি হয়। বহুতে দাবী কৰে যে সেই দুটা প্লেটফৰ্মত এক পদপিষ্ট পৰিস্থিতিৰ সৃষ্টি হৈছিল। উল্লেখ্য যে,ৰেলৱেই দাবী কৰে যে এই সকলোবোৰ উৰাবাতৰি ।
আনহাতে ঘটনাটোত শোক প্ৰকাশ কৰিছে প্ৰধানমন্ত্ৰী নৰেন্দ্ৰ মোডীয়ে । “পদপিষ্ট ত প্ৰাণ হেৰুওৱা লোকসকলৰ পৰিয়াললৈ সমবেদনা জ্ঞাপন কৰিছো। আহতসকলৰ দ্ৰুত আৰোগ্যৰ বাবে প্ৰাৰ্থনা জনাইছো।ক্ষতিগ্ৰস্তসকলৰ লগত প্ৰশাসন আছে। ”
ৰে’লমন্ত্ৰী অশ্বিনী বৈষ্ণৱেও শোক প্ৰকাশ কৰিছে। তেওঁ এক উচ্চ পৰ্যায়ৰ তদন্তৰ নিৰ্দেশ দিয়ে। প্ৰতিৰক্ষা মন্ত্ৰী ৰাজনাথ সিঙেও শোক প্ৰকাশ কৰিছে।
