Abu Dhabi:
সংযুক্ত আৰৱ আমিৰাতৰ আবু ধাবিত চাৰিমহীয়া শিশুক হত্যাৰ অভিযোগত মৃত্যুদণ্ড প্ৰাপ্ত ৩৩ বছৰীয়া ভাৰতীয় মহিলা শ্বাহজাদী খানৰ মৃত্যুদণ্ড কাৰ্যকৰী কৰা হৈছে । আজি সোমবাৰে দিল্লী উচ্চ ন্যায়ালয়ক এই কথা অৱগত কৰে ভাৰতৰ বৈদেশিক পৰিক্ৰমা মন্ত্ৰালয়ে । এনডিটিভিৰ তথ্য অনুসৰি ভাৰতৰ উত্তৰ প্ৰদেশৰ বাণ্ডা জিলাৰ বাসিন্দা শ্বাহজাদী খানক সংযুক্ত আৰব আমিৰশ্বাহীৰ আইন আৰু নিয়মৰ অধীনত মৃত্যুদণ্ড কাৰ্যকৰী কৰা হৈছে ।
ভাৰতৰ অতিৰিক্ত ছলিচিটৰ জেনেৰেল চেতন শৰ্মাই কয় যে আবুধাবিত থকা ভাৰতীয় দূতাবাসে ২৮ ফেব্ৰুৱাৰীত শ্বাহজাদীক ফাঁচী দিয়াৰ কথা আনুষ্ঠানিকভাৱে নিশ্চিত কৰিছে। লগতে ভাৰত কৰ্তৃপক্ষই সকলো ধৰণৰ সহায় আগবঢ়াইছে আৰু পাঁচ মাৰ্চত শ্বাহজাদীৰ অন্ত্যেষ্টিক্ৰিয়া সম্পূৰ্ণ হোৱাৰ কথাও উল্লেখ কৰে।
ভাৰতৰ বৈদেশিক পৰিক্ৰমা মন্ত্ৰালয়ৰ তথ্য অনুসৰি শ্বাহজাদী খান আবুধাবিৰ আল ৱাথবা কাৰাগাৰত বন্দী হৈ আছিল। তেওঁৰ তত্বাৱধানত থকা এটি শিশুৰ মৃত্যুৰ অপৰাধত তেওঁক মৃত্যুদণ্ডৰ শাস্তি প্ৰদান কৰা হয়। শ্বাহজাদীৰ পিতৃ শ্বব্বিৰ খানে দাখিল কৰা আবেদনত কোৱা হৈছে যে ২০২১ চনৰ ডিচেম্বৰ মাহত তেওঁৰ কন্যাই বৈধ ভিছাৰে আবুধাবিলৈ গৈছিল। ২০২২-আগষ্টত, তেওঁৰ নিয়োগকৰ্তাই এটা পুত্ৰ সন্তান জন্ম দিয়ে। তাৰ পাছতে শ্বাহজাদীক শিশুটোৰ চোৱাচিতা কৰিবলৈ নিযুক্ত কৰা হয়।
২০২২ চনৰ সাত ডিচেম্বৰত, নিয়মীয়া টিকাকৰণ প্ৰাপ্ত কৰাৰ পাছতে শিশুটোৰ মৃত্যু হয়। আৱেদন অনুসৰি, ২০২৩ চনৰ ডিচেম্বৰত এটা ভিডিঅ’ ৰেকৰ্ডিং মুকলি কৰা হৈছিল। এই ভিডিঅ’টোত শ্বাহজাদী খানে শিশুটোক হত্যা কৰাৰ কথা স্বীকাৰ কৰিছে বুলি দাবী কৰা হৈছে। অৱশ্যে তেওঁৰ পৰিয়ালে অভিযোগ কৰিছিল যে স্বীকাৰোক্তিটো বলপূৰ্বক অত্যাচাৰৰ জৰিয়তে লোৱা হৈছিল। শ্বাহজাদীৰ পৰিয়ালে অভিযোগ কৰে যে তেওঁক শাৰীৰিক আৰু মানসিকভাৱে অত্যাচাৰ কৰা হৈছিল।
ইফালে, শিশুটোৰ পিতৃ-মাতৃয়ে তেওঁৰ মৃত্যুৰ পাছত মৰণোত্তৰ পৰীক্ষা কৰিবলৈ অস্বীকাৰ কৰে। শ্বাহজাদীৰ পৰিয়ালে অভিযোগ কৰে যে ভাৰতীয় দূতাবাসে শ্বাহজাদীক আইনী সাহায্য আগবঢ়াইছিল যদিও তেওঁক হত্যাকাণ্ডৰ কথা স্বীকাৰ কৰিবলৈ বাধ্য কৰাইছিল। ইয়াৰ উপৰিও শ্বাহজাদীক দিয়া আইনী সাহায্য পৰ্যাপ্ত নহয় বুলিও অভিযোগ উত্থাপন হয়।
২০২৩ চনৰ ছেপ্টেম্বৰ মাহত শ্বাহজাদীৰ আবেদন খাৰিজ কৰা হয় আৰু ২০২৪ চনৰ ২৮ ফেব্ৰুৱাৰীত তেওঁৰ মৃত্যুদণ্ড বাতিল কৰা হয়। তাৰ পাছত ২০২৪ চনৰ মে’ মাহত শ্বব্বিৰ খানে নতুন ‘দয়াৰ আবেদন’ দাখিল কৰে। ১৪ ফেব্ৰুৱাৰীত শ্বাহজাদীয়ে তেওঁক কাৰাগাৰৰ পৰা ফোন কৰি জনাই যে তেওঁৰ মৃত্যুদণ্ড শীঘ্ৰে কাৰ্যকৰী হ’ব পাৰে।
এনে পৰিস্থিতিত ২০ ফেব্ৰুৱাৰীত শ্বব্বিৰ খানে ভাৰতৰ বৈদেশিক পৰিক্ৰমা মন্ত্ৰালয়ক কন্যাৰ আইনী মৰ্যাদা আৰু স্বাস্থ্যৰ বিষয়ে জানিবলৈ আনুষ্ঠানিকভাৱে অনুৰোধ জনায় যদিও কিন্তু তেওঁ কোনো আপডেট নাপালে। ভাৰতীয় আদালতে এই ঘটনাক ‘দুখজনক আৰু দুৰ্ভাগ্যজনক’ বুলি মন্তব্য কৰে।