Ahmedabad plane crash:আহমেদাবাদত সংঘটিত হোৱা এয়াৰ ইণ্ডিয়াৰ বিমান দুৰ্ঘটনাত গুজৰাটৰ পৰিচালক মহেশ জিৰাৱালাৰ মৃত্যু। ডিএনএ পৰীক্ষাৰ অন্তত তেওঁৰ মৃতদেহ চিনাক্ত কৰা হৈছে বুলি শনিবাৰে এগৰাকী বিষয়াই জানিবলৈ দিয়ে।
১২ জুনত আহমেদাবাদত সংঘটিত হোৱা এক ভয়ানক বিমান দুৰ্ঘটনাত ২৪২ জন যাত্ৰীৰ ভিতৰত ২৪১ জন যাত্ৰীৰে মৃত্যু হয়। অৱশ্যে যাত্ৰীসকলৰ লগতে বিমানখন দুৰ্ঘটনাগ্ৰস্ত হোৱা অঞ্চলত বহু স্থানীয় লোকৰো মৃত্যুৰ আশংকা কৰা হৈছে। এই তালিকাত আছিল গুজৰাটী পৰিচালক মহেশ জিৰাৱালা।
দুৰ্ঘটনাৰ পাছৰ পৰাই তেওঁৰ কোনো সন্ধান পোৱা নাছিল। তেওঁৰ মোবাইল লুকেচনো দুৰ্ঘটনাস্থলীৰ পৰা মাত্ৰ ৭০০ মিটাৰ দূৰত পোৱা গৈছে । এনে পৰিস্থিতিত বিমান দুৰ্ঘটনাত মহেশৰ মৃত্যু হোৱা বুলি ধাৰণা কৰা হৈছিল।
যদিও মহেশৰ মৃত্যু হোৱা বুলি পৰিয়ালৰ লোকে মানি ল’ব বিচৰা নাছিল, তথাপিও পৰিয়ালৰ এজন সদস্যই ডি এন এৰ নমুনা লৈ আহিছিল। এইবাৰ সেই নমুনাটো মিলি গ’ল। লগতে এখন জ্বলি যোৱা স্কুটিৰ কিছু অংশ ঘটনাস্থলীৰ পৰা উদ্ধাৰ কৰা হৈছে।
সেই স্কুটীখনৰ ইঞ্জিন আৰু চেছিছ নম্বৰ মিলাই চোৱা হৈছে। তথ্য অনুসৰি,মহেশে ব্যৱহাৰ কৰা গাড়ীখনৰ ইঞ্জিন আৰু চেছিছ নম্বৰো মিল খায়। অৱশ্যে চিকিৎসালয় কৰ্তৃপক্ষই মহেশৰ মৃতদেহ এতিয়াও পৰিয়ালক গতাই দিয়া নাই।
উল্লেখযোগ্য যে আহমেদাবাদৰ বিমান দুৰ্ঘটনাই নিমিষতে সকলো সলনি কৰিলে। সেইদিনা গুজৰাটৰ আহমেদাবাদৰ পৰা ২৪২ জন লোকক লৈ যোৱা এ আই ১৭১ বিমানে লণ্ডনলৈ যাত্ৰা আৰম্ভ কৰে।
অৱশ্যে উৰণৰ পাছত ওপৰলৈ উঠি যোৱাৰ পৰিৱৰ্তে নামিবলৈ ধৰিলে। বিমানখনে বিমানবন্দৰৰ কাষতে থকা মেডিকেল কলেজৰ হোষ্টেলত খুন্দা মাৰে। এক বৃহৎ বিস্ফোৰণৰ ফলত সমগ্ৰ হোষ্টেলত জুই লাগিল।
যদিও এই বিমান দুৰ্ঘটনাত থকা ২৪১ জন লোকৰ মৃত্যু হয়, তথাপিও তাৰে এজন যাত্ৰী বিশ্বকুমাৰ ৰমেশে ধ্বংসাৱশেষৰ পৰা ওলাই আহি সকলোকে আচৰিত কৰি তুলিলে।
অৱশ্যে বিমানখনত থকা যাত্ৰীসকলৰ উপৰিও ঘটনাৰ সময়ত তাত থকা স্থানীয় নাগৰিকসকলৰো এই দুৰ্ঘটনাৰ ফলত মৃত্যু হয়।সেই তালিকাত সংযোজন হ’ল গুজৰাটৰ পৰিচালক মহেশৰ নাম ।
