Apcc President Gaurav Gogoi:
দেশত বর্তমান অঘোষিত জৰুৰীকালীন অৱস্থা চলিছে। ভোটাৰ তালিকা গণতন্ত্ৰৰ মূল অস্ত্র। এয়া অতি গুৰুত্বপূর্ণ বিষয়; কিন্তু আজি অঘোষিত জৰুৰীকালীন অৱস্থা চলিছে য’ত আমাৰ নিৰপেক্ষ নির্বাচন আয়োগ বা ভোটাৰ তালিকা নাই। আয়োগে আজি এখন শুদ্ধ ভোটাৰ তালিকাই দেখুৱাব পৰা নাই। ইয়ে প্রমাণ যে আজি প্রধানমন্ত্রী নৰেন্দ্ৰ মোদী আৰু মুখ্যমন্ত্রী ড: হিমন্ত বিশ্ব শৰ্মাৰ কাৰ্যকালৰ জৰুৰীকালীন অৱস্থা আটাইতকৈ ভয়াৱহ।’
তেওঁ চৰকাৰে ভোটাৰ তালিকাত বৃহৎ অনিয়ম কৰা বুলি অভিযোগ কৰি কয় যে ভোটাৰ তালিকাত বৃহৎ খেলি-মেলি আছে। যাৰ বাবে এইবাৰ পঞ্চায়তত বহু ডেকা ল’ৰাই ভোট দিব নোৱাৰিলে বুলি গগৈয়ে অভিযোগ কৰে। তেওঁ কয়, ‘যিসকল তৰুণ প্রজন্মই লোকসভা নির্বাচনত এটা নির্দিষ্ট অঞ্চল বা ভোটগ্রহণ কেন্দ্রত ভোট দিছিল তেওঁলোকে সেই একেটা স্থানতে পৰৱৰ্তী বিধানসভাৰ উপ-নির্বাচন বা পঞ্চায়ত নিৰ্বাচনত ভোটাৰ তালিকাত নাম বিচাৰি নাপালে। ফলত বহু ডেকা ল’ৰাই ভোট দিব নোৱাৰিলে।
বৃহস্পতিবাৰে সাংবাদিকৰ স’তে হোৱা এক বার্তালাপত এইদৰে কয় অসম প্রদেশ কংগ্ৰেছ কমিটীৰ সভাপতি তথা লোকসভাৰ বিৰোধী উপ-দলপতি গৌৰৱ গগৈয়ে। ভোটাৰ তালিকাত বিজেপি চৰকাৰে অনিয়ম কৰা বুলি অভিযোগ কৰি তেওঁ কয় যে বহু ভোটাৰে সেইবাবেই তালিকাত নাম বিচাৰি নাপালে। গণতন্ত্রক হেয় কৰাৰ ই এক ভয়াৱহ প্ৰৱণতা বুলি উল্লেখ কৰি তেওঁ কয় যে এই বিষয়ত দলে তথ্য-প্রমাণ সংগ্রহ কৰি আছে আৰু বিষয়টো ৰাইজৰ মাজলৈ লৈ যাব।
প্রধানমন্ত্রী মোদী আৰু মুখ্যমন্ত্রী শর্মাই অঘোষিত জৰুৰীকালীন অৱস্থা জাপি দিয়া বুলি অভিযোগ উত্থাপন কৰি তেওঁ কয় যে মোদীয়ে কেন্দ্ৰত স্বেচ্ছাচাৰী চৰকাৰ আৰু মুখ্যমন্ত্রী শৰ্মাই ৰাজ্যত স্বেচ্ছাচাৰী চৰকাৰ চলাইছে। বিৰোধীক ভীতিগ্রস্ত কৰিবলৈ চেষ্ট কৰা হৈছে আৰু প্ৰতিবাদী কণ্ঠক ৰোধ কৰাৰ লগতে গণতান্ত্রিক প্রতিষ্ঠানসমূহক পদ্ধতিগতভাবে দুর্বল কৰা বুলিও তেওঁ কয়।
ইপিনে, দলৰ পুনৰুত্থানৰ প্ৰসংগত গৌৰৱ গগৈয়ে কয় যে ৮৮ জন পর্যবেক্ষকক তৃণমূলত নিয়োগ কৰা হৈছে। এইসকলে তৃণমূল পর্যায়ত বিতং তথ্য সংগ্ৰহ কৰিছে। বিগত এমাহত তেওঁৰ দলীয় সভাপতিত্বৰ মূল্যায়ন যথেষ্ট ইতিবাচক বুলি গগৈয়ে উল্লেখ কৰে। দলৰ সন্মুখত সময় কম আৰু এতিয়া কংগ্ৰেছৰ বাবে সময়ে শত্রু বুলি তেওঁ কয়।
তেওঁ কয় যে আগন্তুক বিধানসভা নিৰ্বাচনৰ বাবে দলক পুনৰ সংগঠিত আৰু পুনৰুজ্জীৱিত কৰিবলৈ সম্প্ৰতি কংগ্ৰেছে সময়ৰ বিপৰীতে দৌৰিব লগা হৈছে। দলৰ সংগঠন শক্তিশালী কৰিব লাগিব আৰু বুথ পৰ্যায়ত সংগঠন শক্তিশালী হ’লে যুঁজ দিব পাৰিব বুলি প্ৰদেশ কংগ্ৰেছৰ নৱনিৰ্বাচিত সভাপতিজনে কয়। গগৈয়ে কয়, ‘সময় আমাৰ শত্রু। সময় আজি অতি চমু।
আমি এই কম সময়ৰ ভিতৰতে আমাৰ লক্ষ্য সাধনৰ বাবে কাম কৰিব লাগিব। খৰতকীয়াকৈ কাম কৰোতে কেতিয়াবা লক্ষ্যভ্রষ্ট হোৱাৰ আশংকাও থাকে। সেয়েহে আমি সাবধানো হ’ব লাগিব।’ তেওঁ কয় যে দলৰ প্ৰতিটো শাখাকে শক্তিশালী কৰি তোলা হৈছে আৰু ব্যৱধানসমূহ দূৰ কৰা হৈছে। গগৈয়ে কয়, ‘আমি সকলোৱে একেলগে কাম কৰি আছো আৰু আমাৰ মাজত সুসমন্বয় আছে।’ বিগত সময়ছোৱাত কংগ্ৰেছৰ উত্থানত বিজেপি অস্বস্তিৰ মুখত পৰিছে।
তেওঁ কয়, ‘বিজেপি চৰকাৰে সংবাদ মাধ্যমক যিদৰে দোষাৰোপ কৰিবলৈ লৈছে, ইয়ে প্রমাণ যে কংগ্ৰেছৰ জনপ্রিয়তা বৃদ্ধি পাইছে।’ আজি ইয়াত একাংশ সাংবাদিকৰ স’তে হোৱা বার্তালাপত তেওঁ কয় যে বিগত এটা মাহ যথেষ্ট গুৰুত্বপূৰ্ণ আছিল। তেওঁ সভাপতিৰূপে দায়িত্ব গ্ৰহণৰ আজি এমাহ সম্পন্ন হ’ল।
বিজেপি চৰকাৰৰ বিৰুদ্ধে যুঁজত বান-গৰাখহনীয়া, ছিণ্ডিকেট, কেন্দ্রীয় আঁচনি ৰূপায়ণত অনিয়ম, দুর্নীতি, জাতিগণনা দলৰ মূল ইছ্যু হ’ব বুলি উল্লেখ কৰি তেওঁ কয় যে কিদৰে অনুসূচিত জাতি, জনজাতি, অন্যান্য পাছ পৰা শ্ৰেণীৰ লোকসকলক সহায় কৰিব পাৰি এই বিষয়েও গুৰুত্ব সহকাৰে গ্ৰহণ কৰা হৈছে।
তদুপৰি ৰাজ্যত স্বায়ত্তশাসিত পৰিষদৰ সমস্যাসমূহো অন্যতম গুৰুত্বপূর্ণ বিষয়। ভোটাৰৰ সংখ্যা বৃদ্ধি আৰু শক্তিশালী জয় হস্তগত কৰিবলৈ ৰাজ্যৰ ১২৬ টা বিধানসভা সমষ্টিলৈ যাব বুলিও তেওঁ কয়। তেওঁ কয়, ‘নীতিগতভাবে আমি প্ৰতিটো সমষ্টিৰ পৰাই যুঁজ দিবলৈ প্ৰস্তুতি চলাইছো।
কিন্তু এয়া কেৱল জয়লাভৰ কথা নহয়, আমি শক্তিশালী জয়লাভ কৰিব লাগিব। তেওঁ কয়, ‘বিগত এমাহত তৃণমূল পর্যায়ৰ পৰা যথেষ্ট ভাল সঁহাৰি আহিছে আৰু সেয়েহে মুখ্যমন্ত্ৰীৰ অস্থিৰতা অস্বাভাৱিকভাৱে বৃদ্ধি পাইছে।
বিজেপি চৰকাৰে কৰা অসমৰ স্বাৰ্থবিৰোধী কামবোৰৰ বিৰুদ্ধে জনজাগৰণ আনিবলৈ চেষ্ট কৰা হৈছিল আৰু এই কামত আমাৰ দল সফল হৈছে। যুঁজ এখন হ’ব এই মনোভাবৰে কংগ্ৰেছৰ মনোবল এতিয়া দৃঢ় কৰা হৈছে।’ তেওঁ কয় যে গণতন্ত্র চতুর্থ স্তম্ভৰ স্বাধীনতা সুৰক্ষিত কৰিবলৈ কংগ্ৰেছ দল সংঘবদ্ধ। আজি সংবাদ মাধ্যমে তীব্র হেঁচাৰ মাজত কাম কৰিব লগা হৈছে বুলিও গগৈয়ে কয়।
