Bokakhat Incident:
বোকাখাতৰ পানবাৰী চিআৰপিএফ শিৱিৰত সংঘটিত গ্ৰেণেড বিস্ফোৰণৰ দৰে ঘটনাৰ পৰা কথমপি ৰক্ষা পৰিল গুৱাহাটী, তেজপুৰ আৰু লখিমপুৰ। বোকাখাতৰ পাণবাৰী আৰক্ষী শিবিৰত অলপতে সংঘটিত হোৱা বিস্ফোৰণটোত জড়িত তিনিজনক গ্ৰেপ্তাৰৰ পাছতে এই উদ্বেগজনক তথ্য পোহৰলৈ আহিছে। শুকুৰবাৰে গুৱাহাটীত এক সংবাদমেলত মুখ্যমন্ত্রী ড: হিমন্ত বিশ্ব শর্মাই কয় যে এই বিস্ফোৰণৰ লগত জড়িত চক্ৰটোৰ এজনৰ বাদে বাকীকেইজনক গ্ৰেপ্তাৰ কৰা হৈছে। সেই কেইজনৰ হাতৰ পৰা তিনিটা গ্রেণেড আৰু এটা পিষ্টলো উদ্ধাৰ কৰা হৈছে।
মুখ্যমন্ত্রীয়ে কয়, ‘বোকাখাতৰ পাছত এই চক্ৰটোৱে তেজপুৰ, লখিমপুৰ আৰু গুৱাহাটীতো বিস্ফোৰণৰ পৰিকল্পনা কৰিছিল। গ্ৰেপ্তাৰ কৰা কেইজনৰ ভিতৰত কোনেও বৰ্তমান উগ্ৰপন্থী সংগঠনৰ লগত জড়িত নহয়। অৱশ্যে আটাইকেইজন অপৰাধমূলক কাৰ্যত পূৰ্বৰে পৰা জড়িত। তেওঁলোকক কোনে গ্ৰেণেড বিস্ফোৰণৰ বাবে উৎসাহিত কৰিছিল, সেই তথ্য স্পষ্ট হোৱা নাই।’ ইয়াৰ বাবে জেৰা অব্যাহত আছে। বাংলাদেশত ৰাজনৈতিক পট পৰিৱৰ্তনৰ ফলতো অসমত এনে ধৰণৰ ঘটনা সংঘটিত হোৱাৰ সম্ভাৱনা নুই কৰিব নোৱাৰি বুলি মুখ্যমন্ত্ৰীয়ে বক্তব্যত উল্লেখ কৰে।
# আমি সকলো খবৰ জানো:ডিজিপি
ইপিনে, আজি কাজিৰঙাত অসম আৰক্ষীৰ সঞ্চালকপ্ৰধান হৰমীত সিঙে কয় যে সংঘটিত ঘটনাৰ সকলো তথ্য তেওঁলোক অৱগত হৈছে। তাৰ ভিত্তিত বৰ্তমান অভিযান আৰু তদন্ত অব্যাহত আছে। সিঙে সদৰী কৰে যে যি তিনিজনক গ্ৰেপ্তাৰ কৰা হৈছে, তেওঁলোক হ’ল- বোকাখাতৰ ৰূপজ্যোতি দাস, তেজপুৰৰ ভবেশ কলিতা আৰু লখিমপুৰৰ সঞ্জীৱ বৰুৱা। সঞ্জীৱ বৰুৱাৰ পৰা বিস্ফোৰণৰ বাবে সাজু কৰি ৰখা এটা গ্ৰেণেড আৰু এটা পিষ্টল উদ্ধাৰ কৰা হৈছে। একেদৰে তেজপুৰৰ ভবেশ কলিতাৰ পৰা আন এটা গ্ৰেণেড উদ্ধাৰ কৰা হৈছে।
সিঙে কয়, ‘নিৰাপত্তা বাহিনী, আৰক্ষী অথবা কেন্দ্রীয় সশস্ত্র বাহিনীক আক্রমণ কৰিবলৈ এই গ্রেণেডকেইটা ৰখা হৈছিল। এই গোটেই ঘটনাত ছয়-সাতজন লোক জড়িত থকাৰ সন্দেহ কৰা হৈছে। আমি এতিয়ালৈকে যিখিনি তথ্য পাইছো, তাৰ ভিত্তিত তিনিজনক গ্ৰেপ্তাৰ কৰা হৈছে আৰু অংকুৰ দাস নামৰ এজনে পলায়ন কৰি আছে। মূল ষড়যন্ত্রকাৰীজনক আমি বিচাৰি আছো। ভবেশ কলিতা আৰু সঞ্জীৱ বৰুৱাই বিস্ফোৰণৰ পৰিকল্পনাৰ কথাবোৰ সদৰী কৰিছে।’ অৱশ্যে সিঙে ঘটনাৰ আঁৰৰ্ত কেনে ধৰণৰ ষড়যন্ত্র লুকাই আছিল, তাক সদৰী কৰাৰ পৰা বিৰত আছিল।
ইপিনে, তেজপুৰৰ বেবেজীয়া আৰক্ষী চকীৰ অন্তৰ্গত মিলনপুৰ ওচৰচুবুৰিৰ ভবেশ কলিতা ওৰফে কেনাইৰ বাসগৃহৰ ঢেঁকীশালত লুকুৱাই থোৱা অৱস্থাত সক্রিয় গ্ৰেণেডটো উদ্ধাৰ কৰে। শুকুৰবাৰে বিয়লি সেনাৰ বোমা বিশেষজ্ঞই পথাৰত এই গ্রেণেডটো নিষ্ক্রিয় কৰে। ধৃত ভবেশ ওৰফে কেনাইৰ আচৰণক লৈ স্থানীয় লোক পূৰ্বৰ পৰাই বেআইনী কার্যত জড়িত বুলি সন্দিহান আছিল। অঞ্চলটোত ধিতিঙালি কৰি ফিতাহি মাৰি ঘূৰি ফুৰা লোক বুলি কেনাই ৰাইজৰ মাজত পৰিচিত।
ইপিনে, আৰক্ষী শিবিৰত গ্রেণেড বিস্ফোৰণত ব্যৱহাৰ কৰা মটৰ চাইকেলখন আৰক্ষীয়ে জব্দ কৰিবলৈ সক্ষম হৈছে। উল্লেখ্য যে যোৱা ২৫ জুনত সংঘটিত গ্রেণেড বিস্ফোৰণটোৰ লগত গঁড চিকাৰী অথবা ড্ৰাগছ সৰবৰাহত জড়িত বুলি প্ৰথমতে সন্দেহ কৰা হৈছিল। অৱশ্যে প্রকৃততে কোন জড়িত সেই তথ্য অদ্যাপি স্পষ্ট হোৱা নাই।