Fake Doctors:দেশৰ ভিতৰতে সৰ্বাধিক ভুৱা চিকিৎসক থকা অসমত ৰোগীৰ জীৱনক লৈ হেতালি খেলি থকা এনে অপৰাধীৰ বিৰুদ্ধে ৰহস্যজনকভাৱে থমকিল চৰকাৰী অভিযান।
ৰাজ্যৰ প্রান্তে প্রান্তে সক্রিয় হৈ আছে বহু সংখ্যক ভুৱা চিকিৎসক। চিকিৎসা বিজ্ঞানৰ প্ৰয়োজনীয় অর্হতা নথকাকৈয়ে এইসকল লোকে নিজকে চিকিৎসক বুলি দাবী কৰি ৰাজনৈতিক পৃষ্ঠপোষকতা লাভৰ লগতে একাংশ দালালৰ জৰিয়তে সংশ্লিষ্ট কর্তৃপক্ষক হাত কৰি বিনা বাধাই চলাই গৈছে ৰমৰমীয়া ব্যৱসায়।
উল্লেখ্য যে কেন্দ্ৰীয় তদন্তকাৰী সংস্থাৰ এক প্রতিবেদনত পোহৰলৈ আহিছে যে দেশৰ ভিতৰতে সর্বাধিক ভুৱা চিকিৎসক থকা ৰাজ্য হৈছে অসম। বিভিন্ন ডিপ্ল’মা আৰু বিদেশৰ ভুৱা ডিগ্ৰী লৈ একাংশ লোকে ভুৱা প্ৰমাণপত্ৰৰে চিকিৎসা পৰিষদত নাম পঞ্জীয়ন কৰি বিভিন্ন স্থানত ৰোগীৰ জীৱনক লৈ হেতালি খেলি চিকিৎসা সেৱা প্ৰদান কৰি আহিছে।
এনে ভুৱা চিকিৎসকৰ বিৰুদ্ধে এসময়ত চিবিআইয়ে অসমৰ কে’বাটাও স্থানত তালাচী অভিযান চলাইছিল। একেদৰে অসম চিকিৎসা পঞ্জীয়ন পৰিষদৰ তদাৰকী শাখা, স্বাস্থ্য বিভাগ, অসম আৰক্ষীয়ে সময়ে সময়ে অভিযান চলাই বহু সংখ্যক ভুৱা চিকিৎসকক গ্ৰেপ্তাৰ কৰিছে যদিও ভুৱা চিকিৎসকৰ এই বজাৰখন আজিও অবাধে চলি আহিছে ৰমৰমীয়াকৈ।
এই সংক্ৰান্তত গুৱাহাটী উচ্চ ন্যায়ালয়ত এক গোচৰ চলি আছে যদিও নির্বিঘ্নে ৰাজ্যৰ বিভিন্ন প্রান্তত এতিয়াও ভুৱা চিকিৎসক সক্রিয় হৈয়ে আছে। তাৎপর্যপূর্ণ বিষয়টো হ’ল এয়ে যে সংশ্লিষ্ট বিভাগসমূহে একাংশ ক্লিনিক তথা ব্যক্তিগত স্বাস্থ্য কেন্দ্রত সময়ে সময়ে ভুৱা চিকিৎসকৰ সন্ধানত তালাচী চলাইছিল যদিও এই অভিযান ৰহস্যজনকভাৱে স্থবিৰ হৈ পৰে।
তাৰ মাজতে পোহৰলৈ আহিছে যে ৰাজনৈতিক পৃষ্ঠপোষকতাত আৰু একাংশ দালালক নিয়োজিত সংশ্লিষ্ট অভিযানকাৰী বিভাগৰ একাংশ বিষয়া-কৰ্মচাৰীক হাত কৰি ভুৱা চিকিৎসকে চলাই গৈছে ৰমৰমীয়া ব্যৱসায়।
অভিযোগ অনুসৰি, স্বয়ং মুখ্যমন্ত্ৰীৰ সমষ্টিতো সক্রিয় হৈ আছে ভুৱা চিকিৎসক। ইফালে, বিগত দুই-তিনিটা বর্ষত অসমত অর্ধশতাধিক ভুৱা চিকিৎসকক গ্ৰেপ্তাৰ কৰা হৈছে। চলিত বর্ষত তথা যোৱা এপ্রিলত সংশ্লিষ্ট কর্তৃপক্ষই বৰপেটাৰ বিভিন্ন প্ৰান্তত ভুৱা চিকিৎসকৰ বিৰুদ্ধে মাৰাথন অভিযান চলাইছিল।
এই অভিযানত বহু সংখ্যক ভুৱা দন্ত চিকিৎসকৰ তথ্য পোহৰলৈ আহে। এই অভিযানত পোহৰলৈ অহা এই ২৬ জন ভুৱা দন্ত চিকিৎসকৰ বিৰুদ্ধে কি ব্যৱস্থা গ্রহণ কৰা হ’ল, সেয়াহে আজি পর্যন্ত ৰাইজৰ অৱগত নহ’ল। ৰহস্যজনকভাৱে বিষয়টো তাতেই তল পৰি ৰ’ল।
ইয়াৰ উপৰি যোৱা মে’ত কলিয়াবৰৰ পৰা এজন ভুৱা হোমিঅ’পেথিক চিকিৎসকক সংশ্লিষ্ট বিভাগৰ সহযোগত আৰক্ষীয়ে গ্ৰেপ্তাৰ কৰিছিল। উল্লেখ্য যে কেন্দ্রীয় তদন্তকাৰী সংস্থাৰ প্ৰতিবেদনত অসমত সর্বাধিক ভুৱা চিকিৎসক সক্রিয় হৈ থকাৰ তথ্য পোহৰলৈ অহাৰ পাছতো এই ক্ষেত্ৰত চৰকাৰখনৰ যিসকলে সক্রিয় হ’ব লাগিছিল, তেনে হোৱা দেখা নগ’ল।
ফলত বৰপেটাকে ধৰি পশ্চিম আৰু উত্তৰ অসমৰ বহুকেইখন জিলাৰ লগতে কামৰূপ গ্রাম্য জিলাতো বহু সংখ্যক ভুৱা চিকিৎসকে ক্লিনিক খুলি নীতিবহির্ভূতভাৱে ৰোগীৰ জীৱনক লৈ হেতালি খেলি অনায়াসে চিকিৎসাৰ নামত অবৈধ বেহা চলাই গৈছে।
এনে সন্দেহজনক চিকিৎসকক আজিও সংশ্লিষ্ট বিভাগৰ তদন্তই ঢুকি পোৱা নাই। অভিযোগ উঠিছে যে এনে সন্দেহজনক চিকিৎসকে ৰাজনৈতিক পৃষ্ঠপোষকতা আৰু একাংশ দালাল নিয়োজিত কৰি সংশ্লিষ্ট পক্ষক হাত কৰিয়েই এনে ব্যৱসায় চলাই গৈছে।
