Pengong Lake in Ladakh:
লাডাখৰ পেংগং হ্ৰদত ছুপাৰবাইক নমাই বিভিন্ন কেৰামতালি দেখুওৱাৰ বাবে এজন ইউটিউবাৰৰ বিৰুদ্ধে আইনী ব্যৱস্থা গ্ৰহণ কৰিলে প্রশাসনে। তেওঁৰ বিৰুদ্ধে নিয়ম উলংঘা কৰাৰ অভিযোগ অনা হৈছে।
আৰক্ষী সূত্ৰই জনোৱা মতে, ইউটিউবাৰৰ বিৰুদ্ধে ভাৰতীয় ন্যায় সংহিতাৰ ১২৫ আৰু ২৯২ ধাৰাত গোচৰ ৰুজু কৰা হৈছে। তদুপৰি নিজৰ জীৱনৰ লগতে আনৰ জীৱন বিপদাপন্ন কৰাৰ অভিযোগতো এজেহাৰ দাখিল কৰা হৈছে। লেহ আৰক্ষীয়ে নিজৰ ‘এক্স’ হেণ্ডলত জনাইছে যে পেংগং হ্ৰদৰ নিষিদ্ধ অঞ্চলত প্ৰৱেশ কৰি পঞ্চাশ লাখটকীয়া অত্যাধুনিক Hayabusa মটৰ চাইকেল লৈ বিভিন্ন কেৰামতালি দেখুওৱাৰ অভিযোগত এজন ইউটিউবাৰৰ বিৰুদ্ধে গোচৰ ৰুজু কৰা হৈছে।
অৱশ্যে আৰক্ষীয়ে ইউটিউবাৰজনৰ নাম সদৰী কৰা নাই। কেৱল পেংগঙেই নহয়, মুৰবা বালিয়াড়িতো তেওঁ একেই একে কাম কৰিছে, যিটো সম্পূৰ্ণৰূপে নিয়মবিৰুদ্ধ।
ইউটিউবাৰৰ এই ফটো আৰু ভিডিঅ’ সামাজিক মাধ্যমত বিয়পি পৰাৰ লগে লগে সমালোচনা আৰম্ভ হয়। তেওঁৰ বিৰুদ্ধে আইনী ব্যৱস্থা লোৱাৰ বিষয়টোক বহুতেই প্রশংসা কৰিছে। লেহ আৰক্ষী আৰু প্ৰশাসনৰ তৰফৰ পৰা পর্যটকসকলক উদ্দেশ্য কৰি জনোৱা হৈছে যে তেওঁলোকে যাতে যিকোনো পৰিস্থিতিতে এনে কাম নকৰে, যি লাডাখৰ বাস্তুতন্ত্ৰৰ ওপৰত কোনো ধৰণৰ প্ৰভাৱ পেলাব পাৰে।
তথ্য অনুসৰি, উক্ত ইউটিউবাৰজনে বিভিন্ন ছুপাৰবাইক লৈ ভ্লগ কৰে। লেহতো তেওঁ সেইদৰেই ভ্লগ কৰে আৰু কিছু ক্ষেত্রত সংশ্লিষ্ট অঞ্চলৰ নিয়ম ভংগ কৰিয়েই কৰে। সেই ফটো নিজৰ সামাজিক মাধ্যমত প’ষ্ট কৰে। লেহ আৰক্ষীৰ দৃষ্টিগোচৰ হোৱাৰ লগে লগে ইউটিউবাৰজনৰ বিৰুদ্ধে ব্যবস্থা গ্ৰহণ কৰে।