Ahmedabad plane crash report:✒️যোৱা ১২ জুনৰ আহমেদাবাদৰ ভয়াৱহ বিমান দুর্ঘটনাটো সংশ্লিষ্ট বৈমানিকে ইচ্ছাকৃতভাৱে সংঘটিত কৰা বুলি দাবী কৰিছে এজন বিমান পৰিবহণ (এভিয়েচন) বিশেষজ্ঞই।
দেশৰ আগশাৰীৰ বিমান পৰিবহণ বিশেষজ্ঞৰূপে খ্যাত কেপ্টেইন মোহন ৰংগনাথনে দাবী কৰিছে যে দুর্ঘটনাটো বৈমানিকৰ আত্মহত্যাজনিত কাৰণতো হ’ব পাৰে। ব্লেকবক্সত বাণীবদ্ধ হোৱা বিমানখনৰ ককপিটত দুই বৈমানিকৰ দুৰ্ঘটনাৰ প্ৰাক্মুহূৰ্তৰ কথোপকথন, ইঞ্জিনৰ ইন্ধনৰ ছুইচ বন্ধ হোৱা আদি ঘটনাৰ বিশৃংখল কৰি বিশেষজ্ঞজনে এই দাবী কৰিছে।
সংবাদ মাধ্যমৰ আগত কয়, ‘ইঞ্জিনৰ ইন্ধনৰ ছুইচ বন্ধ হাতেৰে কৰা হয়। স্বয়ংক্রিয়ভাবে এই ছুইচ বন্ধ নহয় বা বিদ্যুৎ যোগান কর্তন হ’লেও ইঞ্জিনৰ ইন্ধনৰ ছুইচ বন্ধ নহয়। কাৰণ ইন্ধনৰ এই ছুইচ এটা শ্ল’ট (নির্দিষ্ট স্থান বা আসন)ত থাকে। এই ছুইচ আপুনি হাতেৰে তল-ওপৰ কৰিব লাগিব। গতিকে অমনোযোগিতাবশতঃ এই ছুইচৰ সাল-সলনিৰ প্ৰশ্ন নাহে। এই ছুইচ বন্ধ কৰা কাৰ্য ইচ্ছাকৃতভাৱে কৰাটো নিশ্চিত।’
আনহাতে, বিশেষজ্ঞজনৰ এই মন্তব্যক লৈ দেশে-বিদেশে তুমুল প্রতিক্ৰিয়াৰ সৃষ্টি হৈছে। একাংশই মন্তব্য কৰিছে যে মৃতককো শান্তিত থাকিবলৈ দিয়া নাই। কাৰণ এই ভয়াৱহ দুৰ্ঘটনাত বিমানখনৰ দুই বৈমানিকৰ লগতে সকলো বিমান কৰ্মচাৰীৰো মৃত্যু হয়।
অৱশ্যে এনে বিৰূপ প্রতিক্রিয়া সৃষ্টি হোৱাৰ পূৰ্বে বিশেষজ্ঞ ৰংগনাথনে দাবী কৰে যে এয়াৰ ইণ্ডিয়াৰ যোৱা ১২ জুনৰ বিমান দুর্ঘটনাটোত মৃত্যু হোৱা দুই বৈমানিকৰ এজনৰ স্বাস্থ্যগত দিশ সঠিক নাছিল। বিমান সংস্থাটোৰ বহু সংখ্যক বৈমানিকৰ পৰা তেওঁ এই কথা জানিবলৈ পাইছে বুলি দাবী কৰি বিশেষজ্ঞজনে লগতে কয়, ‘মই জানিব পাৰিছো যে এয়াৰ ইণ্ডিয়াৰ বহু সংখ্যক বৈমানিকে ব’য়িং ড্রীমলাইনাৰ বিমানখনৰ কেপ্টেইন (মূল বৈমানিক) জনৰ স্বাস্থ্যগত অৱস্থা সঠিক নাছিল বুলি প্রকাশ কৰিছে। কেপ্টেইনজন কিছু সময় ধৰি ছুটীতো আছিল। যদি সংস্থাটোৰ শীর্ষ ব্যৱস্থাপনা কর্তৃপক্ষ এই বিষয়ে অৱগত নহয়, তেন্তে তাক লৈ মই আচৰিত হম। কাৰণ এই বিষয়ে সংস্থাটোৰ বহুসংখ্যক বৈমানিক অবগত আছিল।’
অৱশ্যে এএআইবিৰ প্ৰাৰম্ভিক তদন্ত প্রতিবেদনত প্রকাশ পোৱা মতে, দুর্ঘটনাগ্রস্ত বিমানখনৰ দুয়োজন বৈমানিকে শাৰীৰিকভাৱে সুস্থ-সবল আছিল। তেওঁলোক বার্ষিক স্বাস্থ্য পৰীক্ষাতো উত্তীর্ণ হৈছিল। অৱশ্যে ৰংগনাথনে কয় যে দুর্ঘটনাগ্রস্ত বিমানখনৰ কেপ্টেইনজন বিগত কিছু মাহ কিয় ছুটীত আছিল, তাক লৈ এক পুংখানুপুংখ তদন্ত হোৱা উচিত।
এই সম্পৰ্কত ৰংগনাথনে আৰু কয়, ‘এতিয়া মই সক্রিয় বৈমানিক নহয়। কিন্তু মই কৰ্মৰত বৈজ্ঞানিকসকলৰ পৰা যি কথা জানিব পাৰিছো, তাৰ ভিত্তিত দাবী জনাইছো যে বৈমানিকজন কিয় ছুটীত আছিল তাৰ এক সম্পূর্ণ তদন্ত হোৱা উচিত।’ উল্লেখ্য যে বৈমানিকে ইচ্ছাকৃতভাৱে বিমান দুর্ঘটনা সংঘটিত কৰাৰ ঘটনা বিশ্বত বিৰল যদিও অভূতপূর্ব নহয়।
এই সম্পৰ্কত ৰংগনাথনে কয়, ‘২০১৫ত দুর্ঘটনাগ্রস্ত হোৱা জার্মান উইংকছ ফ্লাইট ৯৫২৫ বিমানখন সহবৈমানিকজনে ইচ্ছাকৃতভাৱে ফ্ৰান্সৰ আল্পছলৈ নিয়ে। এই দুৰ্ঘটনাত ডেৰশ লোকৰ প্রাণহানি ঘটে। একেদৰে ১৯৯৯৩ সংঘটিত ইজিপ্ত এয়াৰ ফ্লাইট ৯৯০, ১৯৯৭ৰ শিখ এয়াৰ ফ্লাইট ১৮৫ আৰু ২০২২ত সংঘটিত চীনৰ ইষ্টার্ণ এয়াৰলাইন্সৰ ফ্লাইট ৫৭৩৫ৰ দুৰ্ঘটনা বৈমানিকৰ দ্বাৰা ইচ্ছাকৃতভাৱে সংঘটিত কৰা দুৰ্ঘটনা আছিল।’
তদুপৰি মালয়েছিয়া এয়াৰলাইন্সৰ এখন বিমানৰ দুৰ্ঘটনাও বৈমানিকৰ দ্বাৰা ইচ্ছাকৃতভাৱে সংঘটিত বুলি একাংশ বিশেষজ্ঞই বিশ্বাস কৰে। এনে বিমান দুর্ঘটনাৰ আন কেইটামান উদাহৰণো বিশেষজ্ঞজনে দিয়ে। তেওঁ কয়, ‘মই ছিংগাপুৰত থকাৰ সময়ত ছিল্ক এয়াৰ বিমান দুর্ঘটনা সংঘটিত হয়। মই বৈমানিকৰ বিৰুদ্ধে প্রমাণ দিছিলো। ইণ্ডোনেছিয়া চৰকাৰে দুৰ্ঘটনাটোক যান্ত্রিক বিজুতিৰ ফলত হোৱা বুলি দাবী কৰিছিল। কিন্তু তদন্তত প্রমাণ হয় যে বৈমানিকৰ আত্মহত্যাৰ ফলত দুর্ঘটনাটো সংঘটিত হয়।’
তেওঁ বৈমানিকৰ মানসিক স্বাস্থ্য পৰীক্ষাৰ ব্যৱস্থা কৰিবলৈ ভাৰত চৰকাৰক দাবী জনাইছে। এই সম্পর্কত তেওঁ কয়, ‘ভাৰতত কোনো বিমান সংস্থাই বৈমানিকৰ মানসিক স্বাস্থ্য পৰীক্ষাৰ তথ্য মজুত নাৰাখে। আমি কিছু সংখ্যকে এই বিষয়ে সকীয়াই আহিছো যদিও আমাৰ কথা শুনোতা কোনো নাই। মানুহে কেৱল যোগাযোগ আৰু ভ্ৰমণৰ সময়সূচীতহে গুৰুত্ব আৰোপ কৰে। বৈমানিকসকলক মানুহ নহয়, যন্ত্ৰৰ দৰে ব্যৱহাৰ কৰে। অত্যধিক ভাগৰ আৰু মানসিক চাপে কি কৰিব পাৰে তাৰ প্রতি বিমান সংস্থাই হওক বা নিয়ন্ত্রক কর্তৃপক্ষই হওক বা ন্যায়পালিকাই হওক কোনেও গুৰুত্ব নিদিয়ে।’
তদন্তৰ স্বচ্ছতাক লৈ প্রশ্ন বৈমানিক সংগঠনৰ
এএআইবিৰ তদন্তৰ স্বচ্ছতাক লৈ প্রশ্ন উত্থাপন কৰিছে দেশৰ বৈমানিকসকলৰ সংগঠনে। সংস্থাটোৰ প্ৰাৰম্ভিক তদন্ত প্রতিবেদনে দুর্ঘটনাৰ বাবে এয়াৰ ইণ্ডিয়া বিমানখনৰ দুই বৈমানিকক জগৰীয়া কৰাৰ ইংগিত দিয়া বুলি প্রতিক্রিয়া প্রকাশ কৰি এয়াৰলাইন পাইলট এছ’চিয়েছন অৱ ইণ্ডিয়াই দাবী কৰে যে এই তদন্তৰ স্বচ্ছতাক লৈ সন্দেহ আছে।
তদন্তৰ স্বচ্ছতা বজাই ৰখাৰ স্বাৰ্থত পর্যবেক্ষণৰূপে হ’লেও তদন্ত প্রক্রিয়াত বৈমানিক সংগঠনক জড়িত কৰিবলৈ বৈমানিক সংগঠনটোৱে দাবী উত্থাপন কৰিছে। এই দাবী উত্থাপন কৰি এক বিবৃতিত বৈমানিক সংগঠনটোৰ সঞ্চালক ছাম থমাছে কয়, ‘তদন্তত একপক্ষীয়ভাবে বৈমানিক দুজনৰ ত্ৰুটিৰ দিশ ইংগিত কৰা হৈছে। আমাৰ দাবী হ’ল যে এটা ন্যায্য আৰু তথ্যভিত্তিক তদন্ত হওক।’
থমাছে লগতে দাবী কৰে যে তদন্তৰ যি প্রতিবেদন দাখিল হ’ল তাত কাৰোৰে স্বাক্ষৰ নাই। এনে এখন তদন্ত প্রতিবেদন কেনেদৰে সংবাদ মাধ্যমৰ হাতত পৰিল তাক লৈও তেওঁ প্রশ্ন উত্থাপন কৰিছে। লগতে তেওঁ কয় যে তদন্তত গোপনীয়তা ৰক্ষা কৰাৰ ফলত ইয়াৰ বিশ্বাসযোগ্যতাক লৈ প্রশ্ন উঠিছে।
