Sarrsar ji 3:
পাঞ্জাবী কণ্ঠশিল্পী দিলজিৎ দোছাঞ্জৰ আগন্তুক ছবি চৰ্দাৰ -৩ ৰ চৰ্চা অব্যাহত। চৰ্দাৰ জী ৩ ছবিখন বিতৰ্কত সোমাই পৰিছে আৰু ইয়াৰ কাৰণ হৈছে ছবিখনত পাকিস্তানী অভিনেত্রী হানিয়া আমিৰৰ উপস্থিতি।
বর্তমান ভাৰতত পাকিস্তানী শিল্পীয়ে কাম কৰাত নিষেধাজ্ঞা আৰোপ কৰা হৈছে। তেনেকুৱাতে দিলজিৎ দোছাঞ্জৰ ছবি চৰ্দাৰ জী-৩ৰ ট্ৰেইলাৰমুকলি কৰাৰ পাছত ছবিখনত পাকিস্তানী অভিনেত্ৰী গৰাকীৰ উপস্থিতিয়ে পৰিৱেশ গৰম কৰি তুলিছে ! বৰ্তমান নিষিদ্ধ কৰা হৈছে ২৭ জুনত মুক্তি পাবলগীয়া ছবিখন। এতিয়া এই গোটেই বিষয়টোৰ ওপৰত দিলজিতৰ মেনেজাৰৰ বক্তব্য আহিছে।
দিলজিৎ দোছাঞ্জৰ মেনেজাৰ সোণালী সিঙে নিজৰ ইনষ্টাগ্ৰামত এক দীঘলীয়া বিবৃতি প্রকাশ কৰিছে। তেওঁইয়াক হতাশাজনক আৰু অন্যায় বুলি অভিহিত কৰিছে। কণ্ঠশিল্পীগৰাকীৰ প্রাক্তন মেনেজাৰে লিখিছে, ‘দিলজিতে নিজৰ কলাৰে প্ৰেম আৰু ভ্ৰাতৃত্ববোধৰ প্ৰসাৰ ঘটাইছে, ভাৰত-পাকৰ সম্পৰ্ক উত্তেজনাময় হৈ নথকাৰ সময়ত ছবিখনৰ শ্বুটিং সম্পূৰ্ণ হৈছিল, এইখন এখন সৰু বাজেটৰ ছবি, যিখন কষ্টোপার্জিত ধনেৰে নিৰ্মাণ কৰা হৈছে, মুক্তি নোহোৱাৰ বাবে বহুতে লোকচানৰ সম্মুখীন হ’ব লাগিব।’ বিতৰ্কৰ বাবে দিলজিতে ছবিখন ভাৰতত মুক্তি নিদিয়াৰ সিদ্ধান্ত লৈছে।
কণ্ঠশিল্পীগৰাকীৰ মেনেজাৰে এই পদক্ষেপক প্রশংসা কৰিছে। তেওঁ নিজৰ পোষ্টটোত আৰু লিখিছে, ‘হয়তো আমি নিজকে প্রশ্ন কৰাটো প্রয়োজন, প্রতিবাৰেই তেওঁৰ দেশপ্রেম প্রমাণ কৰাটো কিয় প্রয়োজনীয়? দিলজিতে ভাৰতক বিশ্ব পর্যায়ত গৌৰৱান্বিত কৰি তুলিছে আৰু নিজৰ দেশত তেওঁ বাৰে বাৰে স্পষ্টীকৰণ দিবলগীয়া হৈছে, ই বহু ক্ৰুৰ মেম্বাৰ আৰু পৰিয়ালৰ জীৱিকাৰ প্ৰশ্ন, যদি ছবিখন মুক্তি নাপাই, তেন্তে এই সকলো লোকে হয়তো বৃহৎ লোকচানৰ সন্মুখীন হ’বলগীয়া হ’ব।’ ব’ৰ্ডাৰ ২১ নির্মাতা জে পি দত্তক দিলজিতক ছবিখনৰ পৰা আঁতৰাই দিবলৈ দাবী জনাইছে ফিল্ম ফেডাৰেছনে।
ফেডাৰেছনে ছবিখনক প্রমাণ পত্র নিদিবলৈ চেন্সৰ ব’ৰ্ডক অনুৰোধ জনাইছে। মেনেজাৰে এই কথাতো মাত মাতিছে। তেওঁ লিখিছে, ‘দিলজিত সেইজন ব্যক্তি যাক প্ৰধানমন্ত্ৰীয়ে ভাৰতৰ এখন গাঁৱৰ পুত্ৰ বুলি অভিহিত কৰিছিল।’ দিলজিতৰ মেনেজাৰে চৰ্দাৰ জী ৩ৰ বিষয়ে কয়, ‘এইখন কোনো ডাঙৰ কৰ্প’ৰেট হাউছৰ ছবি নহয়, যিয়ে বৃহৎ লোকচানৰ আঘাত সহ্য কৰিব পাৰিব, ই কাৰোবাৰ জীৱনৰ উপাৰ্জন আৰু ই সম্পূৰ্ণৰূপে ধ্বংস হোৱাৰ আশংকা আছে।’
