Uriamghat Eviction:✒️গোলাঘাটৰ উৰিয়ামঘাটত চৰকাৰী ভূমিত বাস কৰা পৰিয়ালসমূহলৈ জিলা প্রশাসনে উচ্ছেদৰ জাননী জাৰি কৰাৰ পাছতে সেই স্থান ত্যাগ কৰি বহু পৰিয়ালে নগাঁও, মৰিগাঁও, হোজাই আদি জিলাত থিতাপি লোৱাৰ চেষ্টা চলাইছে। ইতিমধ্যে উৰিয়ামঘাটৰ পৰা পৰিয়ালসমূহৰ সামগ্রীভর্তি শ শ বাহন এই অঞ্চলসমূহৰ দিশে ধাৱমান হৈছে।
ইয়াকে লৈ স্থানীয় দল-সংগঠন তথা সচেতন নাগৰিকসকল সক্রিয় হৈ পৰিছে। উৰিয়ামঘাটৰ পৰা অহা পৰিয়ালসমূহে যাতে তেওঁলোকৰ অঞ্চলসমূহত থিতাপি ল’ব নোৱাৰে, ইয়াকে লৈ একাংশ অঞ্চলত পহৰাৰো ব্যৱস্থা কৰা হৈছে। অর্থাৎ উৰিয়ামঘাট এৰা পৰিয়ালসমূহৰ বিৰুদ্ধে ঠায়ে ঠায়ে একপ্ৰকাৰ ‘ন’ এন্ট্রি’ জাৰি কৰা হৈছে।
উল্লেখ্য যে উচ্ছেদৰ জাননী লাভ কৰাৰ পাছতে উৰিয়ামঘাটৰ পৰা শশ সামগ্রীভর্তি বাহন ৩৭ নম্বৰ ৰাষ্ট্ৰীয় ঘাইপথৰে নগাঁও, মৰিগাঁও, হোজাই আদি জিলাত প্রবেশ কৰিছে। যোৱা নিশা হোজাইত এনে ১১খন সামগ্রীভর্তি বাহন প্রবেশ কৰে। ইয়াৰে দুখন বাহন আৰক্ষীয়ে জব্দ কৰাৰ লগতে আঠজনক আটক কৰিছে।
হোজাইত প্ৰৱেশৰ চেষ্টা কৰা লোকসকলে স্বীকাৰ কৰিছে যে তেওঁলোকে উৰিয়ামঘাটত বাস কৰিছিল আৰু উচ্ছেদৰ জাননী লাভ কৰি উৰিয়ামঘাট দয়ালপুৰৰ পৰা হোজাইৰ পশ্চিম যোগীজান অভিমুখে আহি আছিল। উল্লেখ্য যে যোগীজান অভিমুখী সামগ্রীভর্তি বাহন দুখন স্থানীয় লোকে আবদ্ধ কৰি ৰাখি আৰক্ষীক খবৰ দিয়ে আৰু আৰক্ষীয়ে বাহন দুখন জব্দ কৰাৰ লগতে আঠজনক আটক কৰে।
আনহাতে, ঘটনাৰ সন্দৰ্ভত জিলাখনৰ আৰক্ষী অধীক্ষক সৌৰভ গুপ্তাই কয় যে হোজাই, উদালি, ডবকাৰ আকাশীগংগাৰ হালধিআটিত মুঠ ১১খন সামগ্রীভর্তি বাহন উৰিয়ামঘাটৰ পৰা প্ৰৱেশ কৰিছিল আৰু তেওঁলোকক সোধপোছ কৰি ওভতাই পঠোৱা হৈছে।
অৱশ্যে দুটা পৰিয়ালৰ হোজাইত মাটি-বাৰী থকাত তেওঁলোকক প্ৰবেশৰ অনুমতি দিয়া হয় বুলি আৰক্ষী বিষয়াজনে সদৰী কৰিছে।
কলিয়াবৰৰ ৰেকা পাহাৰত ঘৰ সাজিছে উৰিয়ামঘাট এৰি অহা পৰিয়ালে
আনহাতে, উৰিয়ামঘাট এৰি অহা একাংশ পৰিয়ালে কলিয়াবৰৰ ৰেকা পাহাৰত ঘৰ সজাক লৈ অঞ্চলটোত তীব্র উত্তেজনা বৃদ্ধি পাইছে। উল্লেখ্য যে উৰিয়ামঘাটৰ পৰা সামগ্ৰীভর্তি বাহন যোৱা নিশা ৰেকা পাহাৰত উপস্থিত হয় আৰু সংশ্লিষ্ট পৰিয়ালসমূহে তাতে ঘৰ সাজিবলৈ চেষ্টা কৰাৰ সময়তে কলিয়াবৰ বীৰ লাচিত সেনাই বাধা প্রদান কৰে। বীৰ লাচিত সেনাৰ সদস্যসকলে তিনিখন সামগ্রীভর্তি বাহনসহ তেওঁলোকক সেই স্থানৰ পৰা খেদি পঠিয়ায়। ইয়াৰ পাছতে বেকা পাহাৰৰ গাঁওপ্রধানে সেই অঞ্চলত স্থান বিচাৰি অহা কোনো লোকক আশ্রায় নিদিবলৈ ৰাইজক আহ্বান জনাইছে। লগতে স্থানীয় লোক অভিযোগ কৰিছে যে যোৱা দুই-তিনি বছৰত ৰেকা পাহাৰত বহু লোকে বসতি স্থাপন কৰাৰ লগতে বৃহৎ বৃহৎ খেতি মাটিও বেদখল কৰিছে। এই কার্যত গাঁওপ্রধানজন জড়িত বুলিও স্থানীয় লোকে দাবী কৰিছে।
আনহাতে, কলিয়াবৰৰ ৩৭ নম্বৰ ৰাষ্ট্ৰীয় ঘাইপথতো বীৰ লাচিত সেনা সক্রিয় হৈ আছে আৰু সন্দেহজনক সামগ্রীভর্তি বাহনসমূহৰ বিৰুদ্ধে অভিযান অব্যাহত ৰাখিছে। আজিৰ দিনটোত ৰাষ্ট্ৰীয় ঘাইপথৰে অহা বহুকেইখন সামগ্রীভর্তি বাহন বখাই বীৰ লাচিত সেনাৰ সদস্যসকলে সোধপোছ কৰে আৰু ইয়াকে লৈ ৰাষ্ট্ৰীয় ঘাইপথত এক হুলস্থুলীয়া পৰিৱেশৰো সূচনা হয়।
শেষত আৰক্ষীয়ে এই বাহনসমূহ কলিয়াবৰ সীমা পাৰ কৰি দিয়াৰ আশ্বাস প্রদান কৰাৰ পাছতহে পৰিস্থিতি নিয়ন্ত্রণলৈ আহে। আনহাতে, কলিয়াবৰ ওপৰ গাঁৱৰ এটা ভাড়া ঘৰত দুখন ই-ৰিক্সাৰ জৰিয়তে সন্দেহজনক লোকে আশ্রয় লৈ থকা খবৰ লাভ কৰি বীৰ লাচিত সেনাই অভিযান চলায় আৰু আশ্ৰয় লৈ থকা পৰিয়ালসমূহক খেদি পঠিয়ায়।
ধিং, ৰূপহীহাট, জুৰীয়া, মৈৰাবাৰী অঞ্চলত প্রবেশ ঘটিছে একাংশ লোকৰ
ইফালে, উৰিয়ামঘাটৰ পৰা বহু সামগ্ৰীভর্তি বাহন নগাঁৱত প্রবেশ ঘটিছে আৰু ইয়াকে লৈ স্থানীয় খিলঞ্জীয়া লোকসকল সন্দিহান হৈ পৰিছে। একাংশ লোকে সন্দেহ প্রকাশ কৰিছে যে এইসকল লোকে নগাঁও-মৰিগাঁৱৰ সংখ্যালঘু অঞ্চলত বা চৰ অঞ্চলত থিতাপি ল’ব পাৰে, কিম্বা সদ্যহতে কোনো আত্মীয়ৰ ঘৰত আশ্ৰয় লৈ পুনৰ চৰকাৰী ভূমি বেদখলৰ চেষ্টা চলাব পাৰে।
স্থানীয় লোকে সদৰী কৰা অনুসৰি, উৰিয়ামঘাটৰ পৰা সামগ্রী কঢ়িয়াই অনা বাহনসমূহ নগাঁৱৰ ধিং, ৰূপহীহাট, জুৰীয়া, মৈৰাবাৰী অঞ্চলত প্রবেশ ঘটিছে। অৱশ্যে ইয়াৰে কিছু সংখ্যক লোকৰ নিজা ভূমি আছে বুলিও চর্চা চলিছে যদিও এই সন্দর্ভত জিলা প্রশাসনৰ ওচৰত নিশ্চিত তথ্য নাই। সেয়ে নগাঁৱৰ সচেতন মহলে এই ক্ষেত্রত জিলা প্রশাসন আৰু আৰক্ষীক সষ্টম হ’বলৈ দাবী জনাইছে।
চামগুৰিত পহৰা দিছে আছু-বীৰ লাচিত সেনাই ঘূৰাই পঠিয়ালে সামগ্রীভর্তি বাহন
আনহাতে, উৰিয়ামঘাট এৰি অহা পৰিয়ালসমূহৰ বিৰুদ্ধে চামগুৰিতো অভিযান চলিছে। চামগুৰিত বীৰ লাচিত সেনা আৰু সদৌ অসম ছাত্র সন্থাৰ সদস্যসকলে যোৱা নিশাৰে পৰা ৰাষ্ট্ৰীয় ঘাইপথত পহৰা অব্যাহত ৰাখিছে আৰু কে’বাখনো সামগ্রীভর্তি বাহন চামগুৰি তিনিআলিৰ পৰা ওভতাই পঠিয়াইছে। উল্লেখ্য যে নিশা স্থানীয় সচেতন লোক আৰু বীৰ লাচিত সেনাই বহুকেইখন সামগ্রীভর্তি বাহন ৰখাই সোধপোছ কৰে। ইয়াৰে কেইখনমান বাহন আৰক্ষীক গতাই দিয়াৰ লগতে কে’বাখনো বাহন ওভতাই পঠিয়ায়। অৱশ্যে আৰক্ষীক গতাই দিয়া বাহনসমূহ পৰৱৰ্তী সময়ত গন্তব্য স্থানলৈ যাবলৈ আৰক্ষীয়ে অনুমতি প্রদান কৰে। আনহাতে, এনে অভিযানক লৈ ধর্মীয় সংখ্যালঘু অঞ্চলত ব্যাপক প্রতিক্ৰিয়াৰ সৃষ্টি হৈছে। ইয়াকে লৈ অঞ্চলে অঞ্চলে মৃদু উত্তেজনাৰো সৃষ্টি হৈছে। সম্প্রতি চামগুৰি অঞ্চলৰ ভাড়াঘৰসমূহত সচেতন নাগৰিকসকলে তীক্ষ্ণ দৃষ্টি ৰাখিছে।
ভাৰতীয় ভূমিহীনক থানাত আবদ্ধ কৰি ওভতাই পঠোৱা গ্রহণযোগ্য নহয়: আমছু
ইফালে, হোজাইত প্রৱেশৰ চেষ্টা কৰা লোকসকলক থানাত আবদ্ধ কৰি ৰখা আৰু ওভতাই পঠিওৱা ঘটনাত প্রতিক্রিয়া প্রকাশ কৰিছে হোজাই জিলা আমছুৰ সভাপতি কবিৰ আহমেদে। আহমেদে কয় যে ভাৰতীয় ভূমিহীন লোকক থানাত আবদ্ধ কৰি ওভতাই পঠোৱাটো গ্রহণযোগ্য হোৱা নাই। ভূমিহীন লোকসকলে উচ্ছেদৰ জাননী লাভ কৰাৰ পাছত নিজ নিজ গৃহলৈ অহাৰ লগতে আত্মীয়ৰ ঘৰলৈ আহিছে যদিও আৰক্ষীয়ে বাধা প্রদান কৰিছে। যিসকল লোকৰ ভেটি-মাটি একচনা হৈ আছে, তেওঁলোককো আৰক্ষীয়ে যাবলৈ দিয়া নাই। কেৱল ম্যাদী পট্টা থকা লোককহে যাবলৈ দিছে বুলি তেওঁ মন্তব্য কৰে। আমছুৰ নেতাজনে কয়, ‘এইসকল লোক যদি বিদেশী, তেন্তে গ্ৰেপ্তাৰ নকৰে কিয়? গ্রেপ্তাৰ কৰি শাস্তি প্রদান কৰক। পেটৰ তাড়নাত ভাৰতীয় ভূমিহীন লোক এখন জিলাৰ পৰা আন এখন জিলালৈ যাব নোৱাৰে নেকি? এয়া বিজেপি চৰকাৰৰ সংখ্যালঘুক ভাতে মৰাৰ সিদ্ধান্ত। এনে কার্য কোনো কাৰণতে গ্রহণযোগ্য হ’ব নোৱাৰে।’
ভূমি থকাৰ পাছতো আন জিলাত ভূমি বেদখল কৰাসকলক আঁতৰাই পঠাব লাগে: আছু
ইফালে, কেৱল উৰিয়ামঘাটেই নহয়, অসমৰ বনাঞ্চল, চৰকাৰী ভূমি, সত্ৰৰ ভূমিত সন্দেহজনক বাংলাদেশীৰ অবৈধ
বেদখল চলিছে আৰু এই বেদখল উচ্ছেদ হ’ব লাগিব বুলি মন্তব্য কৰিছে সদৌ অসম ছাত্ৰ সন্থাৰ সভাপতি উৎপল শর্মাই। কলিয়াবৰত উচ্ছেদৰ প্ৰসংগত আছুৰ সভাপতিজনে কয়, ‘উৰিয়ামঘাটত বেদখল উচ্ছেদৰ যো-জা চলাৰ সময়তে উক্ত অঞ্চলৰ বহু পৰিয়াল আহি নগাঁৱত সোমাইছে। এই লোকসকল যদি ইয়াৰ পৰা গৈছিল, তেওঁলোক নিশ্চয় ভূমিহীন নহয়। ভূমিহীন যদি নহয়, তেওঁলোকে অন্য ঠাইৰ ভূমি দখল কৰিবলৈ কিয় যায়? যদি তেওঁলোক ধিং, ৰূপহী, নগাঁও, লাহৰীঘাটৰ নহয়, তেন্তে তাৰ পৰা আহি ইয়াত এক নতুন বোজাৰ সৃষ্টি কৰিব।’ তেওঁ লগতে কয়, ‘অসমত য’তেই সংৰক্ষিত বনাঞ্চল, চৰকাৰী ভূমি, সত্ৰৰ ভূমি আছে, তাতেই সন্দেহজনক অবৈধ বাংলাদেশী নাগৰিকে বেদখল কৰিছে। সন্দেহজনক অবৈধ বাংলাদেশী নাগৰিকসকলক তাৰ পৰা উচ্ছেদ কৰিবই লাগিব।’ প্রকৃত ভূমিহীন ভাৰতীয় নগাবিকক সংস্থাপন দিওঁতে চৰকাৰক সতৰ্কতা অবলম্বন কৰিবলৈ আহ্বান জনাই আছুৰ সভাপতি শৰ্মাই কয়, ‘বৈধ ভাৰতীয় ভূমিহীন নাগৰিকক সংস্থাপন দিওঁতে, যিখন জিলাৰ ভূমি হেৰুৱাইছিল, সেই জিলাতে সংস্থাপনৰ ব্যৱস্থা কৰিব লাগে।’ লগতে তেওঁ অবৈধ বেদখলকাৰীয়ে নিজা ইচ্ছানুসাৰে চৰকাৰী ভূমি বেদখল কৰি থিতাপি লোৱা কার্য গ্রহণযোগ্য নহয় বুলি সভাপতি শর্মাই মন্তব্য কৰি কয় যে বেদখলকাৰীৰ ব্যাপক জন বিস্ফোৰণ তথা তেওঁলোকৰ দ্বাৰা হোৱা অবাধ প্রব্রজনে একো একোটা সমষ্টিৰ জনগাঁথনি সলনি হৈ পৰিছে। ফলত খিলঞ্জীয়া মানুহে এটা সমষ্টিৰ পৰা নিজৰ বিধায়কজনো জয়ী কৰাব নোৱাৰাৰ এক পৰিৱেশৰ সূচনা হৈছে। সেয়ে জনগাঁথনিৰ সলনিৰ সুযোগ দিব নালাগে বুলি তেওঁ মন্তব্য কৰে।
