Uriamghat Eviction:✒️’আমাৰ ককা, দেউতাহঁতক নগা খেদিবলৈ ইয়ালৈ আনিছিল। আমি এতিয়া ক’লৈ যাম?’ এই মন্তব্য উৰিয়ামঘাটৰ ৰেংমা বনাঞ্চলৰ একাংশ বেদখলকাৰী পৰিয়ালৰ কিছুসংখ্যক মহিলাৰ। মঙলবাৰৰ পৰা গোলাঘাট জিলাৰ মেৰাপানীৰ অসম-নগালেণ্ড সীমান্তবর্তী উৰিয়ামঘাটত আৰম্ভহ’ল চৰকাৰী বহু চর্চিত উচ্ছেদ অভিযান।
বন বিভাগ-জিলা প্রশাসন-আৰক্ষীৰ বিশাল বাহিনীৰ উপস্থিতিত উৰিয়ামঘাটৰ ৰেংমা সংৰক্ষিত বনাঞ্চলত কালি বেদখলকাৰীসকলৰ ঘৰত বুলড’জাৰ চলে। ৰাজ্যৰ ভিতৰতে সৰ্ববৃহৎ উচ্ছেদ অভিযানৰূপে চৰ্চিত এই উচ্ছেদ অভিযানৰ নেতৃত্ব দিয়ে স্বয়ং বন বিভাগৰ বিতর্কিত বিশেষ মুখ্য সচিব এম কে যাদব, অসম আৰক্ষীৰ মহাপৰিদৰ্শক (আইন-শৃংখলা) অখিলেশ কুমাৰ সিং আৰু জিলা আয়ুক্ত পুলক মহন্তই।
অৱশ্যে উচ্ছেদৰ জাননী পোৱাৰ পাছতে বনাঞ্চলখনৰ ভূমি বেদখল কৰি থকা সকলৰ ৮০ শতাংশই ঘৰ-বাৰী এৰি আঁতৰি যায়। অৱশিষ্ট ২০ শতাংশক উচ্ছেদৰ বাবে প্রশাসনে অভিযান আৰম্ভ কৰে। উল্লেখ্য যে যোৱা ২১ জুলাইত বন বিভাগে উচ্ছেদৰ জাননী জাৰি কৰি সাতদিনৰ ভিতৰত বেদখলকাৰীসকলক ঘৰ খালী কৰিবলৈ নির্দেশ দিয়ে।
এই নির্দেশ পোৱাৰ পাছতে বেদখলকাৰীসকলৰ বৃহৎ সংখ্যকে বিভিন্ন ঘৰ-বাৰী এৰি আঁতৰি যাবলৈ আৰম্ভ কৰে। ১১ হেজাৰ বিঘা ভূমি বেদখলকাৰীৰ কবলৰ পৰা মুক্ত কৰাৰ উদ্দেশ্যে বন বিভাগে আৰম্ভ কৰা এই উচ্ছেদ অভিযান সাতদিন ধৰি চলিব। কালি পুৱা আঠ বজাৰ পৰা কটকটীয়া নিৰাপত্তা বেষ্টনীৰ মাজত আৰম্ভ হোৱা এই উচ্ছেদ অভিযানত ব্যৱহৃতৰ বাবে গোলাঘাট আৰু মেৰাপানীৰ উপৰি তিনিচুকীয়া, শিৱসাগৰৰ পৰাও বুলড’জাৰ অনা হৈছে।
উচ্ছেদ অভিযান আৰম্ভ হোৱাৰ পাছতে একাংশ বেদখলকাৰী কান্দোনত ভাঙি পৰে। এই অভিযানৰ সময়ত উচ্ছেদথলীত দুহেজাৰতকৈ অধিক অসম আৰক্ষীৰ জোৱান, পাঁচশ বন সুৰক্ষা কৰ্মী, চিআৰপি নিয়োগ কৰা হয়। ৰাজ্যৰ বিভিন্ন প্ৰান্তৰ পৰা গাড়ীয়ে গাড়ীয়ে নিৰাপত্তাৰক্ষীৰ দল উচ্ছেদথলীলৈ অনা হয়। এই কটকটীয়া নিৰাপত্তাৰ মাজত বেদখলকাৰীসকলৰ ঘৰ-দুৱাৰত বুলড’জাৰ চলিছে।
চকুৰ সম্মুখতে সপোনৰ ঘৰখন ভাঙি পৰা দেখি একাংশ বেদখলকাৰীয়ে ক্রন্দনৰত অৱস্থাত কয়, ‘আমি ক’লৈ যাম? আমাৰ বেলেগত ক’তো মাটি নাই। ইয়াতে জন্ম হৈছো। পঢ়ি-শুনি ডাঙৰ হৈছো।’
একাংশ বেদখলকাৰীয়ে মুখ্যমন্ত্রী ড° হিমন্ত বিশ্ব শর্মাকো তেওঁলোকৰ প্ৰতি সদয় হ’বলৈও আহ্বান জনায়। আনহাতে, অভিযোগ অনুসৰি নগা খেদিবলৈ অনা দুই-এজন লোকৰ পৰা অঞ্চলটো বেদখলকাৰীয়ে ছানি ধৰে। কালক্ৰমত গোঁজেই গজালি হৈ এই বেদখলকাৰীসকলে সম্পূর্ণ ৰেংমা সংৰক্ষিত বনাঞ্চল অবৈধভাবে দখল কৰি বিশাল সাম্রাজ্য গঢ়ি তোলে। বেদখলীকৃত ভূমিত কেৱল ঘৰ-দুৱাৰে নহয়, দোকান-বজাৰো গঢ়ি তোলে। একেদৰে একোটা বেদখলকাৰী পৰিয়ালে বনাঞ্চলৰ পৰা এশৰ পৰা দুশ বিঘা পর্যন্ত অবৈধভারে বেদখল কৰি তামোলবাৰীও পাতে। বহুতে শাক-পাচলিৰ খেতিও কৰে।
অৱশ্যে শিলৰ ব্যৱসায়কে ধৰি অবৈধ মাৰণাস্ত্ৰ আৰু চুপাৰি ব্যৱসায়ত একাংশ বেদখলকাৰী লিপ্ত হোৱাৰ অভিযোগ উত্থাপন হৈছে। বিশাল নিৰাপত্তাৰক্ষী লৈ প্রশাসনে আৰম্ভ কৰা এই উচ্ছেদ অভিযানৰ সময়ছোৱা কালি শান্তিপূর্ণভাবে অতিবাহিত হয়।
৪.২ হেক্টৰ বনাঞ্চলৰ ১২০ টা অবৈধ ব্যবসায়িক প্রতিষ্ঠান উৎখাত
ৰেংমা সংৰক্ষিত বনাঞ্চলৰ বিদ্যাপুৰ অঞ্চলত কালি উচ্ছেদ অভিযান চলে। সূত্রই জনোৱা মতে এই অভিযানৰ সময়ত প্রায় ৪.২ হেক্টৰ বনাঞ্চলৰ ভূমিত অবৈধভাৱে স্থাপন কৰা কমেও ১২০ টা ব্যৱসায়িক প্রতিষ্ঠান উৎখাত কৰা হয়। এই বজাৰ সংলগ্ন বিদ্যাপুৰ গাঁৱতো একে সময়তে উচ্ছেদ অভিযান চলে। চৰকাৰী তথ্য অনুসৰি অঞ্চলটোৰ সোণাৰীবিল টোপ, দুই নম্বৰ পিঠাঘাট, দুই নম্বৰ দয়ালপুৰ, তিনি নম্বৰ দয়ালপুৰ, দলনিপথাৰ, খেৰবাৰী, বিদ্যাপুৰ, বিদ্যাপুৰ বজাৰ, দুই নম্বৰ মধুপুৰ, আনন্দপুৰ, ৰজাপুখুৰী আৰু গেলাজানত উচ্ছেদ অভিযানৰ আওতাত সামৰি লোৱা হৈছে। সংৰক্ষিত বনাঞ্চলখনৰ সম্পূৰ্ণ অঞ্চলক নটা খণ্ডত ভাগ কৰিছে জিলা প্রশাসনে।
