✒️কয়লাৰ অবৈধ খনন আৰু সৰবৰাহতে ক্ষান্ত নাথাকি এইবাৰ মুখ্যমন্ত্ৰীৰ ঘনিষ্ঠ দেবোলাল গর্লোচাই এক ৰাজহুৱা সম্পত্তি ব্যক্তিগত সম্পদত পৰিণত কৰাৰ তথ্য পোহৰলৈ আহিল। উত্তৰ কাছাৰ স্বায়ত্তশাসিত পৰিষদৰ মুখ্য কার্যবাহী সদস্যজনে জিলাখনৰ বড় হাফলঙত চাৰি বছৰ পূৰ্বে উদ্বোধন কৰা এক অনাথ আৰু পৰিত্যক্ত শিশুগৃহক ব্যক্তিগত বিলাসী হোটেললৈ ৰূপান্তৰিত কৰিছে।
উল্লেখ্য যে বিভিন্ন উন্নয়নমূলক কামত ব্যৱহৃত নপেছব’ল চেন্ট্রেল পুল অৱ ৰিছ’ৰ্চেজ (এনএলচিপিআৰ) আঁচনিৰ প্ৰায় তিনি কোটি টকা (২.৯৮ কোটি টকা) ব্যয়ৰে বড় হাফলঙত নির্মিত এই অনাথ আৰু পৰিত্যক্ত শিশুগৃহ এক জাকজমকীয়া অনুষ্ঠানত স্বয়ং মুখ্যমন্ত্রী ড° হিমন্ত বিশ্ব শৰ্মাই উদ্বোধন কৰে।
কে’বাজনো সতীর্থ মন্ত্ৰীৰ উপস্থিতিত ২০২১ৰ ২৬ জুলাইত মুখ্যমন্ত্ৰীয়ে উদ্বোধন কৰা এই শিশুগৃহত কৰ্মচাৰীৰ আৱাস আৰু এটা বৃত্তিমূলক প্রশিক্ষণ কেন্দ্রও আছে। পিছপৰা পাহাৰীয়া জিলাখনত স্থাপন কৰা এনে এক ব্যৱস্থা মুকলি কৰাৰ বাবে মুখ্যমন্ত্রীক তেতিয়া বিভিন্নজনে প্রশংসাও কৰে।
আশ্চর্যজনকভাৱে মুকলিৰ চাৰি বছৰৰ পাছত সম্পূৰ্ণ ৰাজহুৱা পুঁজিৰে নির্মিত এই শিশুগৃহ এখন ব্যক্তিগত বিলাসী হোটেললৈ ৰূপান্তৰিত হৈছে। যোৱা ২৭ জুলাইত এই ব্যয়বহুল হোটেল মুখ্য কার্যবাহী সদস্য গর্লোচাই মুকলি কৰে। ইয়াৰ লগে লগে জিলাখনত ক্ষোভৰ সৃষ্টি হৈছে।
অনাথ শিশু গৃহটোকে ব্যক্তিগত বিলাসী হোটেললৈ ৰূপান্তৰিত কৰাৰ পূৰ্বে ২০২২ৰ ফেব্ৰুৱাৰীত গৃহটোৰ কিছু অংশ ভাঙি পুনৰ নিৰ্মাণ কৰা হয়। অৱশ্যে এই পুনৰ নিৰ্মাণৰ কাৰণ ব্যাখ্যাৰ পৰা উত্তৰ কাছাৰ স্বায়ত্তশাসিত পৰিষদ বিৰত আছে।
এতিয়া প্রশ্ন উত্থাপিত হৈছে যে সম্পূৰ্ণ চৰকাৰী পুঁজিৰে নিৰ্মিত এক ৰাজহুৱা সম্পত্তি কিদৰে বাণিজ্যিক সম্পদ তথা বিলাসী হোটেলত পৰিণত হ’ব পাৰে। অৱশ্যে বিষয়টোৰ সন্দৰ্ভত স্বায়ত্তশাসিত পৰিষদৰ মুখ্য কার্যবাহী সদস্য গর্লোচাৰ লগতে ডিমা হাছাওৰ জিলা আয়ুক্ত মুনীন্দ্র নাথ ভাটেই মুখ খোলা নাই।
জিলাখনৰ তদানীন্তন উপায়ুক্ত সীমান্ত দাসে সাংবাদিকক জনায় যে ঘটনা সম্পর্কে তেওঁ অৱগত নহয়। স্থানীয় লোকে এই অনিয়মৰ উচ্চ পৰ্যায়ৰ তদন্ত দাবী কৰি সৰৱ হৈ উঠিছে। লক্ষ্যণীয় যে উত্তৰ কাছাৰ পাহাৰ স্বায়ত্তশাসিত পৰিষদৰ বহু বিতর্কিত মুখ্য কার্যবাহী সদস্য গর্লোচা মুখ্যমন্ত্ৰীৰ ঘনিষ্ঠৰূপেও চর্চিত।
কিছু মাহ পূর্বে তেওঁৰ পত্নী জড়িত থকা জিলাখনৰ উমৰাংছ’ৰ এটা অবৈধ কয়লা খনিত কে’বাজনো শ্রমিক আবদ্ধ হৈ মৃত্যুমুখত পৰিছিল। ইয়াক লৈ চৌদিশে তীব্র প্রতিক্ৰিয়াৰ সৃষ্টি হ’লেও গর্লোচা অথবা তেওঁৰ পত্নীৰ বিৰুদ্ধে কোনো ব্যৱস্থা গ্ৰহণৰ পৰা চৰকাৰ বিৰত থাকে।
খোৱাপানীৰো সুবিধা নথকা গৃহত ৰাখিছে অনাথ শিশুক
অভিযোগ অনুসৰি এনএলচিপিআৰ পুঁজিৰে বড় হাফলঙত মুখ্যমন্ত্রীয়ে মুকলি কৰা শিশুগৃহটো কোনো দিনেই এনে শিশুক ৰখাৰ বাবে ব্যৱহাৰ নহ’ল। তাৰ পৰিৱৰ্তে গৃহটো মুকলিৰ প্ৰায় এবছৰৰ পাছত ২০২২ৰ ১৪ জুলাইত গোপনে অনাথ শিশু আলয় জিলাখনৰ কটু বাপু নামৰ এক অঞ্চললৈ স্থানান্তৰিত কৰা হয়।
অৱশ্যে এই নতুন স্থানত গৃহটো মুখ্যমন্ত্ৰীয়ে উদ্বোধন কৰা নাছিল। মুখ্যমন্ত্ৰীৰ পৰিৱৰ্তে গৃহটো উদ্বোধন কৰে গর্লোচাই। অভিযোগ অনুসৰি এই নতুন শিশুগৃহত থকা সা-সুবিধাসমূহ একেবাৰে উপযুক্ত নহয়। আনকি শিশুগৃহটোত বিশুদ্ধ খোৱাপানীৰো অভাৱ। শিশুসকলৰ বাবে উপযুক্ত বিছনাও নাই।
গতিকে গৃহটোৰ শিশুসকলে শুবলৈ নিজে যি পাৰে যোগাৰ কৰি লয়; অথচ চৰকাৰে এনে শিশুৰ বাবে ৰাজহুৱা পুঁজিৰ তিনি কোটি টকা ব্যয় কৰি এটা গৃহও নিৰ্মাণ কৰে। এই সমগ্র ঘটনা পোহৰলৈ অহাৰ পাছত ৰাজ্যত চলি থকা অবাধ লুণ্ঠন দেখি সচেতন ৰাইজ স্বায়ত্তশাসিত পৰিষদ তথা ৰাজ্য চৰকাৰক ধিক্কাৰ দিছে।
