Doboka:
সৰবৰাহকাৰী চক্ৰৰ কৱলত হোজাই ডবকাৰ দুই কলেজীয়া ছাত্রী। ডবকাৰ ১৭ বছৰীয়া যমজ ভগ্নীৰ স’তে ইনষ্টাগ্রামত বন্ধুত্ব গঢ় লৈ উঠিছিল কিন্নৰ ৰুকচানা বেগম খান ওৰফে ফার্জিনাৰ। এই সুযোগতে দুই কিশোৰীক অপহৰণ কৰি বহিঃৰাজ্যলৈ লৈ যোৱা ঘটনাই চাঞ্চল্যৰ সৃষ্টি কৰিছে।
সূত্রই জনোৱা মতে, এগৰাকী ছাত্রী ডবকাৰ হাজী আনফৰ কলেজৰ আনগৰাকী আমবাৰী ৰাজীৱ গান্ধী একাডেমীৰ ছাত্ৰী। কিন্নৰ ফাৰ্জিনাই চুতৰালিৰে উক্ত পৰিয়ালটোৰ স’তে অতি ঘনিষ্ঠ সম্পর্ক গঢ়ি তুলিছিল। পৰৱৰ্তী সময়ত অতি কৌশলেৰে যমজ ভগ্নীক অপহৰণ কৰি ৰেলেৰে দিল্লীলৈ লৈ যোৱাৰ অভিযোগ কৰিছে ভূক্তভোগী পৰিয়ালে।
তথ্য মতে, ফাৰ্জিনাৰ ঘৰ হোজাই জিলাৰ যোগীজানত, কর্মসূত্রে ফার্জিনা দিল্লী, মুম্বাইত সঘনে অহা-যোৱা কৰি থাকে তিনিমাহ পূর্বে ইনস্টাগ্রামত যমজ ভগ্নীৰ স’তে বন্ধুত্ব আৰম্ভ হয় আৰু তাৰ পাছত পৰিয়ালটোৰ স’তে এক মধুৰ সম্পৰ্ক গঢ় লৈ উঠে। যোৱা দেওবাৰৰ পৰা দুয়োগৰাকী কিশোৰী সন্ধানহীন হৈ থকাত পৰিয়ালটোৰ মাজত হাহাকাৰ পৰিস্থিতিৰ সৃষ্টি হৈছে। ভুক্তভোগী পৰিয়ালে ডবকা আৰক্ষী থানাত এজাহাৰ দাখিল কৰিছে যদিও ডবকা থানাৰ ভাৰপ্ৰাপ্ত আৰক্ষী বিষয়া দিলীপ বণিয়াই কোনো গুৰুত্ব প্রদান নকৰাৰ অভিযোগ তুলি পৰিয়ালে হোজাই আৰক্ষী অধীক্ষক, আৰক্ষী সঞ্চালক প্রধান আৰু মুখ্যমন্ত্ৰীৰ হস্তক্ষেপ বিচাৰিছে।
স্থানীয় দল-সংগঠনে এই ঘটনাৰ স’তে বৃহৎ নাৰী সৰবৰাহ চক্র জড়িত হৈ আছে বুলি সন্দেহ প্রকাশ কৰিছে। ইপিনে, জিলা আৰক্ষী অধীক্ষকক হোজাই আমছুৱে এক স্মাপকপত্র প্রদান কৰে। স্মাৰক পত্ৰত উল্লেখ কৰা মতে, হোজাই জিলাত মানৱ সৰবৰাহকাৰীৰ চক্র সক্ৰিয় হৈ থকাৰ কথা অৱগত কৰে আৰু শীঘ্ৰে ব্যৱস্থা গ্ৰহণৰ দাবী উত্থাপন কৰে।