Eviction:✒️ৰাজ্যত বিজেপি চৰকাৰ এতিয়ালৈকে বিভিন্ন জিলাত ১৪,১০৫ টা পৰিয়ালক উচ্ছেদ কৰা হৈছে। ইয়াৰ বিপৰীতে পুনৰ সংস্থাপন দিয়া হৈছে মাত্র ১,৮১৭ টা পৰিয়ালক।
জৰিয়তে ২,৩২,৫৩৩.৫৬ বিঘা বনভূমি বেদখলমুক্ত বর্তমানৰ ৰাজ্য চৰকাৰখনে শাসনভাৰ লোৱাৰ পাছৰে পৰা ৰাজ্যত প্রায় ধাৰাবাহিকভাবে উচ্ছেদ অভিযান অব্যাহত ৰখা হৈছে। চৰকাৰে দাবী কৰা অনুসৰি বনাঞ্চলৰ ভূমি, চৰকাৰী ভূমি আদিত বেদখল উচ্ছেদ কৰা হৈছে।
বনাঞ্চলৰ ভূমি বেদখলমুক্ত কৰাৰ পাছতে তাত বনভূমি গঢ়ি তোলাৰ কাম কৰা হৈছে। ইয়াৰ বিপৰীতে চৰকাৰী ভূমিত কৰা উচ্ছেদৰ পাছত সেই ভূমি বৃহৎ বৃহৎ পুঁজিপতিক উদ্যোগ স্থাপনৰ বাবে হস্তান্তৰৰ তৎপৰতা চলিছে। আজিও বিধানসভাত মুখ্যমন্ত্রী ড° হিমন্ত বিশ্ব শর্মাই কয় যে অবৈধ দখলৰ বিৰুদ্ধে চৰকাৰৰ উচ্ছেদ অব্যাহত থাকিব।
কে’বাজনো বিধায়কৰ প্ৰশ্নৰ উত্তৰত আজি ৰাজহ আৰু দুর্যোগ ব্যৱস্থাপনা বিভাগৰ মন্ত্ৰী কেশৱ মহন্তই বিধানসভাত সদৰী কৰা অনুসৰি ২০১৬ৰ পৰা বৰ্তমানলৈকে অসমত প্রায় ২,৩২,৫৩৩.৫৬ বিঘা বনভূমিত উচ্ছেদ চলাই বেদখলমুক্ত কৰা হৈছে। ৰাজ্যৰ ২৭ খন জিলাত এই উচ্ছেদ কার্য সম্পন্ন কৰা হৈছে।
জিলাবোৰৰ ভিতৰত বৰপেটাত ২৯১টা, বিশ্বনাথত ৩০৭টা, বঙাইগাঁৱত ৩২১ টা, কাছাৰত ১৪টা, চৰাইদেউত দুটা, দৰঙত ২৭৩১টা, ধেমাজিত ৪৭ টা, ধুবুৰীত ১৪০৯টা, ডিব্ৰুগড়ত ২৩টা, গোৱালপাৰাত ৮৯০টা, গোলাঘাটত ৯১টা, হাইলাকান্দিত ৪৫ টা, হোজাইত ৫৮৬টা, যোৰহাটত এটা, কামৰূপ মহানগৰত ১৩০৯টা, কামৰূপত ১৯৬টা, লখিমপুৰত ৪৬৬টা, নগাঁৱত ৪০৯টা, নলবাৰীত ২৫৬ টা, শিৱসাগৰত ১৬টা, শোণিতপুৰত ৩৪০৮টা, শ্রীভূমিত ৫০৩টা আৰু তিনিচুকীয়াত ৬০৪টা পৰিয়ালক উচ্ছেদ কৰা হয়।
উচ্ছেদিতৰ ভিতৰত ধুবুৰীত ১,২৭৮টা, ডিব্ৰুগড়ত আঠটা, হোজাইত ১৯৬টা, লখিমপুৰত ১২টা, নগাঁৱত ১৯২ টা, শোণিতপুৰত ৬০টা আৰু শ্রীভূমিত ৭১টা পৰিয়ালক এতিয়ালৈকে পুনৰ সংস্থাপিত কৰা হৈছে।
ইপিনে, উচ্ছেদৰ পাছতে পাঁচ হেজাৰৰ অধিক বিঘা ভূমি উদ্যোগৰ নামত আবণ্টন দিয়া হৈছে। অৱশ্যে তেনে উদ্যোগৰ লগত জড়িত চৰকাৰী সংস্থাকে ভূমি আবণ্টন দিয়া হৈছে বুলি ৰাজহ বিভাগে আজি সদৰী কৰে। সেই অনুসৰি ধুবুৰীৰ ৪,৪৮৫ বিঘা দুই কঠা ১৫ লেচা ভূমি সৌৰশক্তি প্ৰকল্পৰ বাবে অসম বিদ্যুৎ বিতৰণ কোম্পানী লিমিটেডক আবণ্টন দিয়া হৈছে।
গোৱালপাৰাৰ এশ বিঘা ভূমি অসম ঔদ্যোগিক উন্নয়ন নিগমক আবণ্টন দিয়া হৈছে। শোণিতপুৰৰ ৬৬০ বিঘা ভূমিও বিদ্যুৎ বিতৰণ কোম্পানী লিমিটেডক দিয়া হৈছে। আবণ্টিত এই বৃহৎ পৰিমাণৰ ভূমিত বৰ্তমানৰ ৰাজ্য চৰকাৰৰ দিনত উচ্ছেদ চলোৱা হৈছিল।
