Bangladesh:✒️বাংলাদেশত সৃষ্টি হোৱা অগ্নিগর্ভ পৰিস্থিতি আৰু তাৰে সুযোগ লৈ ভাৰত বিৰোধী চক্ৰসমূহ প্রকাশ্যে ওলাই অহাৰ পাছত অসমৰ লগত থকা দেশখনৰ আন্তর্জাতিক সীমান্তত নিৰাপত্তা ব্যৱস্থা কটকটীয়া কৰা হৈছে। সীমান্ত অঞ্চলত সাধাৰণ লোকৰ চলা-ফিৰাও নিয়ন্ত্ৰণ কৰা হৈছে।
ইয়াৰ লগে লগে বৃদ্ধি কৰা হৈছে টহলৰ মাত্রা। নিৰীক্ষণ ব্যবস্থাও অতিৰিক্ত বাহিনীৰ হাতত অর্পণ কৰা হৈছে। অসমৰ লগতে মেঘালয় আৰু – ত্ৰিপুৰাতো অনুৰূপ ব্যৱস্থা লোৱা হৈছে। অসমৰ সীমান্তৰ এটা বৃহৎ অংশ উন্মুক্ত হৈ আছে। যাৰ বাবে ধুবুৰী আৰু দক্ষিণ শালমাৰাৰ সীমান্তৰ এটা বৃহৎ অংশ সদায় অতি স্পর্শকাতৰ হৈ আহিছে। ইপিনে, শ্রীভূমি জিলাবে প্রায় নিয়মীয়াকৈ অব্যাহত আছে অনুপ্রবেশকাৰীৰ ভাৰতত প্ৰৱেশৰ চেষ্টা। প্রায় নিয়মীয়াকৈ তেনে অনুপ্রবেশকাৰীৰ দল আৰক্ষী আৰু সীমান্ত বাহিনীয়ে কৰায়ত্ত কৰিবলৈ সক্ষম হৈছে আৰু সেইসকলক ৰাজ্য চৰকাৰৰ নতুন নীতি অনুসৰি লগে লগে ওভতাই পঠিওৱা প্রক্রিয়াও চলি আহিছে।
সীমান্তত থকা নিয়মীয়া সুৰক্ষা ব্যৱস্থাৰ মাজেৰেই ধাৰাবাহিকভাবে অনুপ্ৰৱেশকাৰীৰ দলে অসমত প্রবেশ কৰিবলৈ সক্ষম হোৱাটো নিৰাপত্তাৰ দায়িত্বত থকাসকলৰ বাবে ডাঙৰ প্ৰত্যাহ্বান হৈ পৰিছে। তাতোকৈ উদ্বেগৰ বিষয় হ’ল যে অনুপ্রৱেশ কৰা সকলো লোককে ধৰা পেলোৱাটোও সম্ভৱ হৈ উঠা নাই। এই পৰিস্থিতিৰ প্রতি লক্ষ্য ৰাখি অসম-বাংলাদেশ সীমান্তত নিয়মীয়া টহলৰ বাবে ভাৰতীয় সেনা আৰু আছাম ৰাইফলছকো ভাগে ভাগে দায়িত্ব দিয়া হৈছে।
বিএছএফৰ সঞ্চালনাও বৃদ্ধি কৰা হৈছে। উল্লেখ্য যে অসম আৰু বাংলাদেশৰ আন্তর্জাতিক সীমান্তৰ দৈর্ঘ্য হ’ল প্রায় ২৬৭কিলোমিটাৰ। ধুবুৰী, দক্ষিণ শালমাৰা, মানকাচৰ, কাছাৰ আৰু শ্রীভূমি জিলাৰ লগত বাংলাদেশৰ স’তে আন্তর্জাতিক সীমান্ত সংলগ্ন হৈ আছে। সেয়েহে এই জিলাকেইখনত অতিৰিক্ত বাহিনী নিয়োগ কৰা হৈছে। অসমে মেঘালয় আৰু ত্ৰিপুৰাৰ লগতো যৌথভাবে সীমান্ত সুৰক্ষিত ৰখাৰ অভিযান অব্যাহত ৰাখিছে।
বাংলাদেশত শুকুৰবাৰে এজন হিন্দু শ্রমিকক মৰিয়াই মৰিয়াই হত্যা কৰি পথৰ মাজতে গছত ওলমাই জুলাই দিয়া ঘটনাটোৰ পাছত ভাৰতত তীব্র প্রতিক্ৰিয়াৰ সৃষ্টি হৈছে। ইয়াৰ মাজতে আকৌ ভাৰত বিৰোধী চক্রই উত্তৰ-পূৰ্বাঞ্চলৰ সাতখন ৰাজ্যক ভাৰতৰ পৰা বিচ্ছিন্ন কৰাৰো ভাবুকি দিছে। তেনে ভাবুকিক ভাৰতে বিশেষ গুৰুত্ব সহকাৰে গ্ৰহণ কৰিছে। সেইবাবে ভাৰত বিৰোধী চক্ৰৰ বাংলাদেশ সীমাৰ ভিতৰৰ পৰা যাতে উত্তৰ-পূৰ্বাঞ্চলৰ সাত ৰাজ্যক লৈ কোনো বিশেষ পৰিস্থিতিৰ সৃষ্টি কৰিব নোৱাৰে তাৰ ওপৰত দৃষ্টি ৰাখিবলৈ ৰাজ্যিক গৃহ বিভাগক সতর্ক কৰি দিয়া হৈছে।
কাৰণ উত্তৰ-পূৰ্বাঞ্চলক ভাৰতৰ পৰা বিচ্ছিন্ন কৰাৰ ভাবুকি দিয়াৰ অপশক্তিবোৰ বাংলাদেশৰ ৰাজপথলৈ প্রকাশ্যে ওলাই আহিছে। দেশখনৰ সাম্প্ৰতিক চৰম উত্তেজনাপূর্ণ পৰিস্থিতিৰ মাজতে তেনে চক্রই যাতে কোনো আইন-শৃংখলাজনিত পৰিস্থিতিৰ সৃষ্টি কৰিব নোৱাৰে, তাৰ ওপৰত সতর্ক দৃষ্টি ৰখা হৈছে।
অসমত বাংলাদেশৰ মদতপুষ্ট জেহাদী সংগঠন পূৰ্বৰ পৰা সক্ৰিয় হৈ আহিছে। তেনে সংগঠনৰ বহু অনুগামী ৰাজ্যখনত আছে। ইয়াৰ পৰিপ্ৰেক্ষিতত অসম আৰক্ষীয়ে জিলাবোৰৰ আৰক্ষীক সতর্কতামূলক ব্যৱস্থা গ্রহণ কৰিবলৈ নির্দেশ দিছে। ইয়াৰ অংশৰূপে প্ৰধানকৈ চোৰাংচোৱা ব্যৱস্থাৰ ওপৰত গুৰুত্ব দিবলৈ পৰামৰ্শ দিয়া হৈছে বুলি সূত্রত প্রকাশ।
