Boko Incident:
উন্নতমানৰ ছাগলী পুহি জীৱিকাৰ পথ মুকলি কৰা কামৰূপৰ পছৰীয়াৰ এক আদর্শ দম্পতীৰ সপোন ছাৰখাৰ কৰিলে দুর্বৃত্তই। পছৰীয়া নিৱাসী দিবাকৰ কলিতা আৰু তেওঁৰ পত্নী ভনিতা কলিতাই স্থাপন কৰা ‘মা পদুমী ছাগলী ফার্ম’ৰ ৮০ টাৰো অধিক ছাগলীক দুর্বৃত্তই খাদ্যৰ স’তে বিহ মিহলাই খুৱাই হত্যা কৰাৰ তথ্য পোহৰলৈ আহিছে। এই নিৰীহ প্রাণীকেইটা উন্নতজাতৰ আছিল। মৃত ছাগলীবোৰৰ মাজত ৪০ জনীৰো অধিক গাভিনী ছাগলী আছিল বুলি পামৰ গৰাকী কলিতাই জনায়। আন ছাগলীবোৰৰ মাজত খাহী ছাগলীও আছিল। যোৱা শনিবাৰে দুর্বৃত্তই পামখনৰ ছাগলীবোৰ বিহ মিহলি খাদ্য খুৱাই বুলি সূত্রই জনায়। ৮০ টাৰো অধিক ছাগলীৰ এনেদৰে মৃত্যু হোৱাত পামৰ গৰাকীৰ ৫০ লাখৰো অধিক টকা লোকচান হৈছে বুলি জনায়।
নিতৌ বর্ধিত ৰূপ লোৱা পামখনক লৈ কোনো লোক ঈর্যান্বিত হৈয়ে এই দুষ্কাৰ্য সংঘটিত কৰা বুলি চর্চা চলিছে। এই দুষ্কাৰ্যৰ স’তে জড়িতৰ বিৰুদ্ধে আৰক্ষী-প্ৰশাসনক কঠোৰ ব্যৱস্থা ল’বলৈ দাবী জনাইছে স্থানীয় ৰাইজে। সম্প্রতি পামৰ গৰাকী কলিতা দম্পতীয়ে দিনতে এন্ধাৰ দেখিছে। ভুক্তভোগী পৰিয়ালে জনোৱা মতে, সমাগত ইংৰাজী নৱবৰ্ষ আৰু মাঘ বিহু উপলক্ষে ছাগলী ঠিক কৰি পামৰ গৰাকীক বিভিন্ন অঞ্চলৰ গ্ৰাহকে আগধনো দিছিল।
উল্লেখ্য যে ছাগলী পালনৰে স্বাৱলম্বিতাৰ ক্ষেত্ৰত এক বিপ্লৱৰ সৃষ্টি কৰিছিল কলিতা দম্পতীয়ে। তেওঁলোকে জনোৱা মতে, বিগত কৰ’না মহামাৰীৰ তলাবন্ধৰ সময়ত ব্যক্তিগত প্ৰতিষ্ঠানৰ চাকৰি বাদ দি বন্ধন বেংকৰ পৰা ৮০ হেজাৰ টকাৰ ঋণ লৈ তেওঁলোকে উন্নতমানৰ ছাগলী পালন কৰিবলৈ লয়। ধনৰ অধিক প্রয়োজন হোৱাত কলিতাৰ পত্নীয়ে সোণৰ চেইনো বন্ধকত থয়। এনেদৰে কষ্টৰে গঢ়ি তোলা ছাগলী পামখনতে দুর্বৃত্তই তাণ্ডর চলালে। এই সম্পৰ্কত ভুক্তভোগী পৰিয়ালে দদৰা আৰক্ষী থানাত এজাহাৰ দাখিল কৰিছে। ঘটনা সন্দৰ্ভত পামৰ গৰাকী কলিতাই জনোৱা মতে বিহ মিহলি খাদ্য খাই অসুস্থ হোৱা ছাগলীবোৰক সুস্থ কৰিবলৈ পশু চিকিৎসকে যৎপৰোনাস্তি চেষ্ট চলায় যদিও সফল নহ’ল।
ফলত কৰুণভাৱে এটাৰ পাছত আনটো ছাগলীয়ে মৃত্যুক আঁকোৱালি লয়। তেওঁৰ পামত বিটেল, ছিৰোহি, টোটাপাৰি, বাৰবাৰী, জঘ্রানা, ব্লেক বেংগল, যমুনাপাৰি আদি প্ৰজাতিৰ ১২৫ টা ছাগলী আছিল। প্রথম অৱস্থাত কলিতা দম্পতীয়ে ১১ টা ছাগলীৰে পামখন আৰম্ভ কৰিছিল। পৰৱৰ্তী সময়ত ৰাজস্থান, পঞ্জাৱ আদিৰ পৰা উন্নতজাতৰ ছাগলী তেওঁলোকে আনিবলৈ লয়। এনেদৰে তিলতিলকৈ গঢ়ি তোলা পামখনৰ ছাগলীবোৰৰ অধিকাংশ নিকৃষ্ট মানসিকতাৰ লোকে নিঃশষ কৰাত কলিতা দম্পতীয়ে মূৰে-কপালে হাত দিছে।
