Arunodaya Scheme:✒️বিগত প্রায় এদশক ধৰি অসমৰ ৰাজনীতিত মহিলা আকৰ্ষণৰ এক অন্যতম আঁচনিৰূপে চর্চিত হৈ আহিছে ‘অৰুণোদয়’ আঁচনি। শাসকীয় দল বিজেপিয়ে যদি এই আঁচনিখনক নির্বাচনী ব্রহ্মাস্ত্রৰূপে ব্যৱহাৰ কৰি আহিছে, তাৰ বিপৰীতে বিৰোধী দলসমূহে ইয়াৰ পৰা বঞ্চিত মহিলাক লৈ বা আঁচনিৰ ধন বৃদ্ধি কৰাৰ ৰাজনীতি চলাই আহিছে।
সম্প্ৰতি নলবাৰীৰ টিহু সমষ্টিৰ একাংশ মহিলাই আঁচনিখনৰ ব্যৱহাৰিক ক্ষেত্ৰৰ এক ফোঁপোলা স্বৰূপ উদঙাই দিলে স্বয়ং এজন কেবিনেট মন্ত্ৰীৰ সন্মুখত। এই ঘটনা টিহু সমষ্টিৰ অন্তৰ্গত ফুলগুৰিৰ। উল্লেখ্য যে ঠিকাদাৰ আৰু নলবাৰী লোক নিৰ্মাণ বিভাগ (পথ)ৰ খীৰতী গাই স্বৰূপ, বালিজাৰ আৰু ফুলগুৰি সংযোগী পথৰ ফুলগুৰি জানৰ ওপৰত পকী দলঙৰ আধাৰশিলা স্থাপন কৰিবলৈ উপস্থিত হয় মন্ত্রী তথা স্থানীয় বিধায়ক চন্দ্ৰমোহন পাটোৱাৰী।
আবেলি ৪-৩০ বজাত উক্ত আধাৰশিলা স্থাপন কৰি এই উপলক্ষে আয়োজিত সভাত মন্ত্রীজনে ভাষণ দি থকাৰ মাজতে একাংশ মহিলাই আগুৰি ধৰি অন্যান্য আঁচনিৰ লগতে ‘অৰুণোদয়’ আঁচনি সন্দৰ্ভত উপর্যুপৰি প্ৰশ্নৰ অৱতাৰণা কৰে। ক্ষুব্ধ মহিলাসকলে ‘আমাক কিয় অৰুণোদয়ৰ নামত নচুৱাই থকা হ’ল’, ‘আমাৰ এক টকাৰে ঠগিলে নেকি?’, ‘আমি কিয় অৰুণোদয় নাপাওঁ’, ‘আপোনাৰ দালালবোৰে আমাক কিয় কথা ক’বলৈ নিদিয়ে’ আদি বিভিন্ন প্রশ্নৰে পৰিৱেশ উত্তাল কৰি তোলে। চুবুৰিৰ দ্বন্দ্বত পৰিণত হোৱাত সভাখনত চৰম বিশৃংখল পৰিস্থিতিৰ সৃষ্টি হয়। ফুলগুৰিৰ এগৰাকী মহিলা নীলিমা বর্মনে অভিযোগ কৰে, ‘আমাৰ একাউণ্টত এটকাহে সোমাইছে। মন্ত্রী-মুখ্যমন্ত্রীয়ে কয় এটা, কৰে এটা। আমি তেওঁলোকৰ ভাষণতে সন্তুষ্ট থাকিব লগা হৈছে। চকু অপাৰেছন কৰিব লাগে, ঘৰৰ মানুহ অসুস্থ। এনেদৰে সভাই-সমিতিয়ে আমাক মাতি আনে। কিন্তু আঁচনিৰ ধনখিনি নাপাওঁ।’
উল্লেখ্য যে নৱেম্বৰত চামতাত অনুষ্ঠিত এখন সভা সম্বোধন কৰি মুখ্যমন্ত্রী ড° হিমন্ত বিশ্ব শর্মাই টিহু সমষ্টিৰ ২৮,১০০ মহিলাই অৰুণোদয় আঁচনিৰ ধন লাভ কৰি থকাৰ লগতে নতুনকৈ পুনৰ তিনি হেজাৰে এই আঁচনি লাভ কৰিব বুলি ভাষণত প্রকাশ কৰিছিল। আনহাতে, উক্ত সভাত অধিকাংশ মহিলাৰ এনে ভূমিকাত অৱশেষত মন্ত্রী পাটোৱাৰীয়ে ভাষণ বাদ দি বিভিন্ন ধৰণে ক্ষুব্ধ মহিলাসকলক সন্তুষ্ট কৰাৰ চেষ্টা চলায়।
ইয়াৰ লগে লগে ক্ষুব্ধ মহিলাসকলে ‘দালালৰাজ বন্ধ কৰক’, ‘দালালকেইটাই আপোনাক কথা ক’ব নিদিয়ে’ আদিকে ধৰি কে’বাটাও অভিযোগ তোলে। অৱশ্যে মন্ত্রীজনে সকলোকে নিজস্বভাবে মন্ত্ৰীজনৰ লগত প্রত্যক্ষ যোগাযোগ ৰখাৰ আহ্বান জনায়।