Denied ticket:✒️বঙাইগাঁও জিলাৰ অভয়াপুৰী সমষ্টিত প্রার্থিত্বক কেন্দ্ৰ কৰি শাসক দল বিজেপিত অন্তঃকন্দলৰ সৃষ্টি হৈছে। বছৰ বছৰ ধৰি দলক সেবা আগবঢ়াই অহাৰ পাছতো অন্তিম সময়ত আন দলৰ পৰা অহা নেতাই প্রার্থিত্ব লাভৰ সম্ভাৱনাত অনিশ্চয়তাৰ সৃষ্টি হৈছে বিজেপিৰ প্রার্থিত্ব প্রত্যাশীৰ মাজত। এনে এজন প্রার্থিত্ব প্রতাশী তথা যুৱ নেতা সঞ্জয় ৰায়ে কালি সম্ভাৱনা ক্ষীণ দেখি হুক হুকাই কান্দোনত ভাগি পৰে।
উল্লেখ্য যে পূৰ্বৰ দক্ষিণ অভয়াপুৰী বিধানসভা সমষ্টি অনুসূচিত জাতিৰ বাবে সংৰক্ষিত আছিল যদিও সমষ্টি পুনৰ নিৰ্ধাৰণৰ পাছত নৱগঠিত অভয়াপুৰী সমষ্টি সংৰক্ষণমুক্ত হৈ পৰে। সমষ্টিটোত ১৯৮৫ৰ পৰা ক্ৰমে ইউএনএফ, কংগ্রেছ, অগপ, এআইইউডিএফৰ পৰা প্ৰতিনিধিত্ব কৰি আহিছিল আৰু সময়ে সময়ে বিজেপিয়ে প্রতিদ্বন্দ্বিতা আগবঢ়ায় যদিও কোনোবাৰে দলীয় প্রার্থীয়ে জয়লাভ কৰা নাছিল।
অৱশ্যে পৰৱৰ্তী সময়ত সমষ্টিটোত শাসক দলৰ ভেটি শক্তিশালী হৈ উঠে। ইয়াৰ পৰিপ্ৰেক্ষিতত সমষ্টিটোৰ একমাত্ৰ পৌৰসভা অভয়াপুৰী এককভাৱে বিজেপিয়ে দখল কৰাৰ উপৰি বিগত পঞ্চায়ত নির্বাচনত ব্যাপক সফলতা অর্জন কৰে। গতিকে সমষ্টিটোৰ দলীয় স্থিতিৰ প্ৰতি লক্ষ্য ৰাখি জিলা বিজেপিৰ সভাপতি উজ্জ্বল কান্তি ৰায়, সমাজকর্মী ৰুদ্ৰ কুমাৰ পাঠক, বিজেপি যুৱ মৰ্চাৰ কেন্দ্ৰীয় সভাপতি সঞ্জয় ৰায়, প্রাক্তন জিলা সভাপতিদ্বয় হিমানী অধিকাৰী আৰু সুকেন ৰায়, চিকিৎসক ইতিশ বৰদলৈ আদিয়ে এইবাৰ সমষ্টিটোৰ পৰা দলীয় প্রার্থিত্ব প্রত্যাশা কৰে।
আনহাতে মিত্রজোটৰ অংশীদাৰ অগপৰ দপৰা প্ৰাক্তন বিধায়ক ভূপেন ৰায় প্রার্থিত্ব প্রত্যাশী হৈ উঠাত মিত্রজোটৰ মাজত প্রার্থিত্বকেন্দ্রিক যুঁজ আৰম্ভ হয়। শেহতীয়াভাৱে মুখ্যমন্ত্রী ড° হিমন্ত বিশ্ব শর্মাই বিজেপিয়ে অভয়াপুৰীত নির্বাচন খেলিব বুলি নিশ্চিতি দিয়াত প্রাক্তন বিধায়ক ৰায়ৰ অংকত আউল লাগে। এনে অৱস্থাত দলীয় প্রার্থিত্ব পালে তেওঁ বিজেপিত যোগদান কৰিবলৈ মনস্থ কৰে। সেই মর্মে তেওঁ গেৰুৱা বসন পৰিধান কৰে। চাৰিবাৰৰ বিধায়ক ৰায়ৰ এই বিজেপি গমনে দলৰ প্ৰাৰ্থিত্ব প্রত্যাশীসকলৰ আশাত চেঁচা পানী ঢালে। প্রার্থিত্বৰ পৰা বঞ্চিত হোৱাৰ উমান পাই আজি কান্দোনত ভাঙি পৰে সঞ্জয় ৰায়।
সুদীর্ঘ ১২ বছৰৰো অধিক কাল দললৈ সেৱা আগবঢ়াই অহাৰ পাছত শেষ মুহূৰ্তত প্রার্থিত্বৰ পৰা বঞ্চিত হোৱাৰ সম্ভাৱনা প্রকট হোৱাত ৰায়ে নির্দলীয়ভাৱে নির্বাচনত অৱতীৰ্ণ হ’বলৈ যো-জা চলোৱা বুলি সূত্ৰই প্ৰকাশ কৰিছে।