Induction:✒️আজিকালি বহুত ঘৰত ৰান্ধনিঘৰত গেছৰ বিকল্প হিচাপে ইনডাকশ্বন কুকটপ ব্যৱহাৰ কৰা দেখা যায়। গেছৰ দাম বৃদ্ধি, কেতিয়াবা গেছৰ সংকট আদি কাৰণত বহু পৰিয়ালৰ বাবে ইনডাকশ্বন এক নিৰ্ভৰযোগ্য সহায়ক হৈ উঠিছে।
ব্যৱহাৰ কৰাটো সহজ হ’লেও এই বৈদ্যুতিক যন্ত্ৰটোৰ যত্ন লোৱা খুবেই প্রয়োজনীয়। সঠিকভাৱে পৰিষ্কাৰ নকৰিলে কম দিনতেই ইনডাকশ্বন বেয়া হৈ যাব পাৰে ।
দৈনিক ৰন্ধা-বঢ়াৰ সময়ত দাইলৰ পানী, ভাতৰ ফেন, গাখীৰ বা মাছ-মাংসৰ জোল ইনডাকশ্বনৰ ওপৰত পৰাটো সাধাৰণ কথা। এই দাগবোৰ সময়মতে চাফা নকৰিলে শুকাই যায় আৰু পাছত পৰিষ্কাৰ কৰাটো কঠিন হৈ পৰে।
তদুপৰি বেয়াকৈ পৰিষ্কাৰ কৰিলে পেনেলৰ বুটাম বা ছেটিঙছৰো ক্ষতি হ’ব পাৰে। সেয়ে ইনডাকশ্বন পৰিষ্কাৰ কৰাৰ সঠিক নিয়ম জনাটো অতি দৰকাৰ।
ইনডাকশন পৰিষ্কাৰ কৰাৰ এটা সহজ উপায় হৈছে ভিনেগাৰ ব্যৱহাৰ কৰা। প্রথমে এখন শুকান কাপোৰৰে ইনডাকশ্বনৰ ওপৰভাগ ভালকৈ মচি লওক। তাৰ পাছত ভিনেগাৰত অলপ পানী মিহলাই এটা মিশ্রণ তৈয়াৰ কৰক।
সেই মিশ্রণত কাপোৰ ভিজাই ইনডাকশ্বনৰ ওপৰটো মচি দিলে সহজেই দাগ আঁতৰ হয় আৰু চাফা হৈ পৰে।
যদি ইনডাকশ্বনৰ ওপৰত বেজি দাগ থাকে, তেন্তে বেকিং চ’ডা ব্যৱহাৰ কৰিব পাৰে। অলপ গৰম পানীত বেকিং চ’ড়া মিহলাই লওক। তাৰ পাছত সূতাৰ কাপোৰ বা কঁপাহ সেই মিশ্রণত ভিজাই ইনডাকশনৰ ওপৰত অলপ ঘঁহি মচি লওক। এই পদ্ধতিত কঠিন দাগো সহজে আঁতৰ হয়।
বহুতে বাচন ধোৱাৰ বাবে যি চাবোন ব্যৱহাৰ কৰে, সেইটো ইনডাকশন পৰিষ্কাৰ কৰাতো সহায়ক হয়। কিন্তু চাবোনটো পোনে পোনে ইনডাকশ্বনৰ ওপৰত নাঢালিব। গৰম পানীত অলপ চাবোন মিহলাই লওক। তাৰ পাছত কাপোৰ বা কোমল স্ক্রাবাৰৰে লাহে লাহে মচি দিলে দাগবোৰ আঁতৰ হয়। যদি দাগ বেছি হয়, তেন্তে মিশ্রণত অলপ বেকিং চ’ড়াও ব্যৱহাৰ কৰিব পাৰে।
ইনডাকশ্বন পৰিষ্কাৰ কৰাৰ আগতে কিন্তু চুইচ অফ কৰক আৰু প্লাগ খুলি ল’ব। বন্ধন কার্য শেষ হোৱাৰ লগে লগে পৰিষ্কাৰ কৰিবলৈ নাযাব। কুকটপ সম্পূর্ণ ঠাণ্ডা হ’লেহে মচিব। প্রতিদিনে পানীত ভিজাই পৰিষ্কাৰ কৰাৰ প্রয়োজন নাই। দৈনিক ব্যৱহাৰৰ পাছত এখন শুকান কাপোৰৰে মচি দিলেই যথেষ্ট। সপ্তাহত অন্ততঃ এবাৰ ভালকৈ পৰিষ্কাৰ কৰিলে ইনডাকশ্বন দীঘলীয়া সময়ইলৈ ভালে থাকে।
সামান্য যত্ন আৰু সঠিক পৰিষ্কাৰৰ অভ্যাসে ইনডাকশ্বন কুকটপ বহু বছৰ ধৰি ভাল অৱস্থাত ৰাখিব পাৰে। সেয়ে ইয়াৰ সঠিক যত্ন লোৱাটোও সমানেই গুৰুত্বপূর্ণ।