Illegal Recruitment in SCERT:
দৈনিক অগ্ৰদূত ডিজিটেল ডেক্স:–নিকা নিযুক্তিৰ ধ্বনি দি মুখ্যমন্ত্রী ড: হিমন্ত বিশ্ব শর্মা সমন্বিতে শাসক পক্ষ পুনৰ ভোেট বিচৰাত নামি পৰাৰ সময়তে ৰাজ্যিক শিক্ষা, গৱেষণা আৰু প্রশিক্ষণ প্রতিষ্ঠান (এছচিইআৰটি) ত এগৰাকী সহকাৰী সঞ্চালক নিযুক্তিত অনিয়ম সংঘটিত হোৱাৰ সন্দেহ ঘনীভূত হৈছে। উল্লেখ্য যে যোৱা বছৰ এছচিইআৰটিত নিযুক্তি লাভ কৰা হিমশিখা তালুকদাৰে নিযুক্তিৰ বাবে কি কি অভিজ্ঞতাৰ প্ৰমাণপত্ৰ দাখিল কৰিছিল তথা চাকৰি সংক্ৰান্তীয় তথ্য বিচাৰি এজন জ্যেষ্ঠ সাংবাদিকে স্কুল শিক্ষা বিভাগ আৰু অসম লোকসেৱা আয়োগ (এপিএছচি)ত তথ্যজনাৰ অধিকাৰ আইন (আৰটিআই)ৰ অধীনত আবেদন জনায়ো সংশ্লিষ্ট তথ্য নোপোৱাৰ অভিযোগ উত্থাপন হৈছে।
সাংবাদিকজনে অভিযোগ কৰা অনুসৰি এপিএছচি আৰু শিক্ষা বিভাগে পৰস্পৰে পৰস্পৰলৈ গা ঠেলি সমগ্ৰ বিষয়টো গাপ দিয়াৰ অপচেষ্টা চলাইছে। ইয়াৰ লগে লগে মুখ্যমন্ত্রী ড° শৰ্মাই দাবী কৰা নিকা নিযুক্তিক লৈও সন্দেহৰ উদ্ৰেক হৈছে। আনহাতে, এপিএছচি আৰু স্কুল শিক্ষা বিভাগৰ এই কাৰ্যত ক্ষুব্ধ হৈ সাংবাদিকজন অসম আৰক্ষীৰ চিআইডিৰ দ্বাৰস্থ হৈছে। উল্লেখ্য যে স্বয়ং মুখ্যমন্ত্রী ড° শৰ্মাই পূৰ্বৰ সোণোৱাল চৰকাৰৰ দিনতো নিযুক্তিত অনিয়ম হোৱা বুলি মুকলিকৈ প্ৰকাশ কৰিছে। এই ধাৰা তেওঁৰ দিনলৈ অব্যাহত থকাৰ সম্ভাৱনা উক্ত ঘটনাই প্রকট কৰিছে।
উক্ত আৰটিআই আবেদনকাৰীজনে জনোৱা মতে, ২০১৭ত হিমশিখা তালুকদাৰে প্ৰৱক্তা পদত নিযুক্তি লাভকৰিছিল। পৰৱৰ্তী সময়ত তেওঁ ২০১৯৩ ‘ডায়েট’ আৰু ২০২৩ত ‘এছচিইআৰটি’ত প্রবক্তা নিযুক্তি পাইছিল। ইয়াৰ দুবছৰৰ পাছত অর্থাৎ ২০২৫ত তেওঁ এছচিইআৰটিত সহকাৰী সঞ্চালক নিযুক্তি পায়। অভিযোগ অনুসৰি কেৱল মৌখিক পৰীক্ষাৰ ভিত্তিত উক্ত পদত নিযুক্তি দিয়া হয়।
এই মৌখিক পৰীক্ষাৰ ভিডিঅ’ ৰেকর্ডিং বিচাৰি সাংবাদিকজনে জনোৱা আবেদন এপিএছচিয়ে আওকাণ কৰাৰ অভিযোগ উত্থাপন হৈছে। অথচ চৰকাৰী চাকৰিৰ নিযুক্তিপ্রাপ্তসকলৰ অৰ্হতা সম্পৰ্কীয় তথা আৰটিআইৰ অধীনত জনাবলৈ সংশ্লিষ্ট কর্তৃপক্ষ বাধ্য। লগতে এপিএছচিয়ে জনায় যে তালুকদাৰৰ নিযুক্তি সম্পর্কীয় সকলো তথ্যপাতি শিক্ষা বিভাগক জনোৱা হৈছে। তেতিয়া আবেদনকাৰীজন শিক্ষা বিভাগৰ দ্বাৰস্থ হয়। লক্ষ্যণীয়ভাবে তেতিয়া শিক্ষা বিভাগে আবেদনকাৰীজনক এপিএছচিৰ দ্বাৰস্থ হ’বলৈ পৰামৰ্শ দিয়ে।
