Nature Camp in Kherani:
বিজ্ঞান শিক্ষাক ৰোমাঞ্চক কৰি তোলা আৰু বিজ্ঞানক এক বৃত্তি হিচাপে প্ৰচাৰ কৰাই হৈছে আৰ্যভট্ট বিজ্ঞান কেন্দ্ৰৰ মূল উদ্দেশ্য আৰু লক্ষ্য। আৰু তাৰেই এক অংশ হিচাপে যোৱা বুধবাৰৰ পৰা দুদিনীয়া কাৰ্যসূচীৰে কাৰ্বি আংলঙৰ খেৰণিৰ পদুমণি অৰণ্য আৰু ডিমা হাছাওৰ গল্ফ ফিল্ডৰ জলাশয় সন্দৰ্ভত জ্ঞান প্ৰদানৰ লক্ষ্যৰে ছাত্র-ছাত্ৰীক একগোট কৰাই পৃথকে পৃথকে আয়োজন কৰা হয় দুটাকৈ প্ৰাকৃতিক শিবিৰৰ।
উল্লেখ্য যে আৰ্যভট্ট বিজ্ঞান কেন্দ্ৰ, ৰংখাং খণ্ডৰ উদ্যোগত আৰু অসম বিজ্ঞান প্ৰযুক্তিবিদ্যা আৰু জলবায়ু পৰিৱৰ্তন বিভাগৰ লগতে জিলা ন’ডেল এজেন্সীৰ সহযোগত আয়োজন কৰা এই প্ৰাকৃতিক পৰিৱেশ শিবিৰৰ।গুৰুত্বপূৰ্ণ যে প্ৰাকৃতিক পৰিৱেশ অধ্যয়নৰ এই শিবিৰ অনুষ্ঠানিকভাৱে উদ্বোধন কৰে খেৰণি বন বিভাগৰ বন বিষয়া সুশীল চৰকাৰে। উক্ত আয়োজিত শিবিৰত ৰংখাং খণ্ডৰ অন্তর্গৰ ১০ খন বিদ্যালয়ৰ ৫৫ গৰাকী ছাত্ৰ-ছাত্ৰীয়ে অংশগ্ৰহণ কৰাৰ বিপৰীতে ১২ গৰাকী শিক্ষক-শিক্ষয়ত্ৰীও অংশ লয় এই অনুষ্ঠানত।
প্ৰথম দিনৰ কাৰ্যসূচীত সমলব্যক্তি (resource person) হিচাপে গোবিন্দ কুমাৰ দেৱনাথ, হৰিপদ দাস আৰু দ্বীপেন দাসে অংশ লোৱা কাৰ্যসূচীত খেৰণি বন বিভাগৰ বন বিষয়া সুশীল চৰকাৰে হাতী-মানুহৰ সংঘাত আৰু ইয়াৰ পৰা পৰিত্ৰাণ পাবৰ বাবে লবলগীয়া উপায় সন্দৰ্ভত ব্যাখ্যা আগবঢ়োৱাৰ সমান্তৰালকৈ পদুমণি অৰণ্যত ছাত্ৰ-ছাত্ৰীৰ সহযোগত বৃক্ষৰোপণৰ কাৰ্য্যসূচীও ৰূপায়ন কৰা পৰিলক্ষিত হয়। একেদৰে দ্বিতীয় দিনৰ কাৰ্যসূচী হিচাপে ডিমা হাছাওৰ গল্ফ ফিল্ডত আয়োজন কৰা শিবিৰত ছাত্ৰ-ছাত্ৰী সকলক পৰিবেশ আৰু পৰিবেশৰ ভাৰসাম্যতা, গোলকীয় উষ্ণতা বৃদ্ধিৰ কাৰণ আৰু ইয়াৰ বিৰূপ প্ৰভাৱ আদিৰ উপৰিও জলাশয় আৰু মানৱ জীৱনত থকা ইয়াৰ গুৰুত্ব সম্পৰ্কে আলোকপাত কৰা হয়।
সমান্তৰালকৈ সমল ব্যক্তি হিচাপে উপস্থিত থকা ক্ৰমে বিৰাজ টেৰণ, হৰিপদ দাস আৰু গোবিন্দ দেৱনাথৰ সহায়ত ছাত্ৰ-ছাত্ৰীসকলক গল্ফ ফিল্ডৰ জলাশয়ৰ সংৰক্ষণ, পৰিভ্ৰমী চৰাইৰ বিচৰণস্থলী হিচাপে ইয়াৰ বাবে লবলগীয়া পদক্ষেপ আৰু ইয়াৰ উপকাৰীতাৰ বিষয়ে জ্ঞান প্ৰদান কৰা হয়। উল্লেখযোগ্য যে জিলা ন’ডেল এজেন্সী, ৰংখাং খণ্ডৰ সমন্নয়ক বীৰেন ডেকাই আঁত ধৰা আৰু পৰিচালনা কৰা শিবিৰৰ জৰিয়তে ভৱিষ্যতে যাতে ছাত্ৰ ছাত্ৰী সকলে এক সুপৰিৱেশ গঢ়ি তুলিব পাৰে, তাৰ বাবে প্ৰয়োজনীয় কামকাজবোৰ কৰি যাবলৈ ছাত্ৰ ছাত্ৰীসকলক আহ্বান জনায়। ইয়াৰ উপৰিও শিবিৰত অংশগ্ৰহণ কৰা ছাত্র ছাত্ৰীক প্ৰমাণ পত্ৰ প্ৰদান কৰি উদ্যোগতাই ছাত্র ছাত্ৰীসকল উৎসাহী আৰু আগ্ৰহী কৰাৰ চেষ্টা অব্যাহত ৰখাও পৰিলক্ষিত হয় ।