দৈনিক অগ্ৰদূত ডিজিটেল ডেস্ক : প্ৰকৃতিৰ ৰুদ্ৰৰোষত নেপাল। হিমালয়ৰ কোলাত থকা দেশখনত ডাৱৰ বিস্ফোৰণজনিত বৰষুণৰ লগতে আকস্মিক বানত এতিয়ালৈকে ৩১ জনৰ মৃত্যু হোৱা বুলি ঘোষণা কৰা হৈছে। ১০৫ জন ভাৰতীয়সহ ৪০০ কৈলাসযাত্ৰী সন্ধানহীন হৈ আছে।
এই পৰিস্থিতিত ফোনযোগে দুৰ্যোগত মৃত্যু হোৱা লোকসকলৰ প্ৰতি শোক প্ৰকাশ কৰাৰ লগতে প্ৰধানমন্ত্ৰী বলেন্দ্ৰ শ্বাহক সহায়ৰ আশ্বাস দিলে ভাৰতৰ প্ৰধানমন্ত্ৰী নৰেন্দ্ৰ মোদীয়ে।
এক্স হেণ্ডেলত দিয়া এটা পোষ্টত মোদীয়ে লিখিছে, “প্ৰধানমন্ত্ৰী বলেন্দ্ৰ শ্বাহৰ স’তে কথা পাতিছোঁ। নেপালত বানত প্ৰাণহানিৰ ঘটনাত শোক প্ৰকাশ কৰিছোঁ। এই কঠিন সময়ত ভাৰতৰ জনসাধাৰণ নেপালৰ ভাই-ভনীসকলৰ কাষত আছে।”
মোদীয়ে আৰু লিখিছে, “নেপালক সম্ভৱপৰ সকলো ধৰণৰ মানৱীয় সহায় আগবঢ়াবলৈ ভাৰত সাজু। উদ্ধাৰ আৰু সাহায্য অভিযানক লৈ আমাৰ দলসমূহে চুবুৰীয়া দেশখনৰ প্ৰশাসনৰ স’তে ঘনিষ্ঠভাৱে সমন্বয় সাধন কৰি আছে।”
সূত্ৰৰ খবৰ অনুসৰি, এই বিপৰ্যয়ৰ সূত্ৰপাত চীনৰ তিব্বতত। তাৰ পৰাই বানৰ পানী নেপালৰ ৰাছুৱা জিলাত প্ৰৱেশ কৰে। কাঠমাণ্ডুৰ পৰা প্ৰায় ১২৫ কিলোমিটাৰ দূৰত অৱস্থিত এই জিলাখনৰ মাজেৰে বৈ গৈছে ভোটেকোশী নদী। বুধবাৰৰ পুৱাৰে পৰা হঠাৎ নদীখনৰ জলপৃষ্ঠ বৃদ্ধি পাবলৈ ধৰে। ইয়াৰ পাছতে চীন সীমান্তৱৰ্তী সেই জিলাখনত হঠাৎ বান আহে।
আকস্মিক ভয়ংকৰ বানৰ ফলত ৰাছুৱা জিলাত একপ্ৰকাৰ ধ্বংসলীলা চলিছে। ভোটেকোশী নদীৰ পানীত চীন সীমান্তৱৰ্তী তিমুৰ আৰু ছ্যাফ্ৰুবেছী অঞ্চল ভয়ংকৰভাৱে ক্ষতিগ্ৰস্ত হৈছে। তাত বহু ঘৰ-দুৱাৰ, যান-বাহন উটি গৈছে। পানীৰ সোঁতত এখন দলংও উটি গৈছে।
চীনৰ সংবাদ সংস্থা ‘ছিনহুৱা’ৰ খবৰ অনুসৰি, আকস্মিক বানত তিব্বতৰ গাইৰং প্ৰদেশকে ধৰি বহু অঞ্চল ক্ষতিগ্ৰস্ত হৈছে। হতাহতৰ সংখ্যাও বহু। কিন্তু কি কাৰণত এই হঠাৎ বান আহিল, সেয়া এতিয়াও স্পষ্ট হোৱা নাই।
নেপালৰ বান পূৰ্বাভাস বিভাগে জনোৱা মতে, ৰাছুৱাত হোৱা ধাৰাসাৰ বৰষুণৰ বাবেই এই বিপৰ্যয় সংঘটিত হৈছে বুলি ভবাৰ সম্ভাৱনা কম। ফলত তিব্বতৰ পৰা পানী নামি অহাৰ বিষয়টোৱেই অধিক প্ৰকট হৈ পৰিছে। ইয়াৰ লগতে হিমবাহৰ জলাধাৰ ভাঙি হঠাৎ পানী নামি অহা বা ‘গ্লেচিয়েল লেক আউটবাৰ্ষ্ট ফ্লাড’-ৰ সম্ভাৱনাও পৰীক্ষা কৰি চোৱা হৈছে বুলি নেপালৰ সংবাদ মাধ্যম ‘দ্য কাঠমাণ্ডু পোষ্ট’-এ জনাইছে।
নেপাল পৰ্যটন ব’ৰ্ডৰ তথ্য অনুসৰি, বানপীড়িত অঞ্চলৰ পৰা কমেও ৩৮৪ জন পৰ্যটক সন্ধানহীন হৈ আছে। তেওঁলোকৰ ভিতৰত ২৯১ জন বিদেশী আৰু ৯৩ জন নেপালী নাগৰিক। বিষয়াসকলে জনোৱা মতে, বিদেশীসকলৰ ভিতৰত ১০৫ জন ভাৰতীয় নাগৰিক আছে।
আনহাতে, ৰাছুৱা জিলাত নেপাল আৰক্ষীৰ কমেও ২৬ জন বিষয়া এতিয়াও সন্ধানহীন হৈ আছে। ইয়াৰ লগতে নেপালী অৰ্ধসামৰিক বাহিনীৰ কমেও ৭জন জোৱানৰো কোনো সন্ধান পোৱা হোৱা নাই।
নদীৰ কাষৰীয়া বাসিন্দাসকলক সতৰ্ক হৈ থকাৰ নিৰ্দেশ দিয়া হৈছে। মুগলিন অঞ্চলকে ধৰি ত্ৰিশূলী নদীৰ কাষৰীয়া বাসিন্দাসকলক স্থানান্তৰিত হোৱাৰ নিৰ্দেশ দিছে নেপালৰ প্ৰশাসনে। ভয়ংকৰ এই দুৰ্যোগক লৈ উদ্বিগ্ন নেপালৰ প্ৰধানমন্ত্ৰী বলেন্দ্ৰ শ্বাহ। তেওঁ জনাইছে যে দুৰ্যোগ মোকাবিলাৰ বাবে দুৰ্যোগ ব্যৱস্থাপনা দল, চিকিৎসকৰ দল, স্কাউট আৰু ৰেড ক্ৰছৰ কৰ্মীসকল নামি পৰিছে। ক্ষতিগ্ৰস্ত অঞ্চলসমূহলৈ অতিৰিক্ত এম্বুলেন্স আৰু চিকিৎসাকৰ্মী প্ৰেৰণ কৰা হৈছে।
