Beer Lachit Sena:
দৈনিক অগ্ৰদূত ডিজিটেল ডেস্ক:বীৰ লাচিত সেনাৰ শিৱসাগৰ জিলাৰ শিমলুগুৰি আঞ্চলিক সমিতিৰ সভাপতি মানস জ্যোতি চেতিয়াৰ এক দুৰ্ঘটনাত গুৰুতৰভাৱে আহত হৈ অসম চিকিৎসা মহাবিদ্যালয়ত চিকিৎসাধীন অৱস্থাত মৃত্যু হোৱা ঘটনাক কেন্দ্ৰ কৰি মঙলবাৰৰ পৰা উত্তাল হৈ আছে শিৱসাগৰ ৷ বীৰ লাচিত সেনাৰ শীৰ্ষ নেতা শৃংখল চলিহাই মানসজ্যোতি চুতীয়াৰ দুৰ্ঘটনাজনিত মৃত্যুক পৰিকল্পিত হত্যা বুলি অভিহিত কৰি ইয়াৰ উচিত বিচাৰ লাগিব ৷ অন্যাৰ্থাই বৃহৎ আন্দোলন গঢ়ি তোলাৰ হুংকাৰ প্ৰদান কৰে৷
আনহাতে বীৰ লাচিত সেনাৰ এই দাবীৰ প্ৰতি সহাৰী জনাই ৰাজ্য চৰকাৰে দণ্ডাধীশ পৰ্যায়ৰ তদন্ত ঘোষণা কৰে৷ শিৱসাগৰৰ অভিভাৱক মন্ত্ৰী বিমল বৰাই মুখ্যমন্ত্ৰীৰ নিৰ্দেশত দণ্ডাধীশ পৰ্যায়ৰ তদন্তৰ কথা সদৰী কৰে সংবাদ মাধ্যমত ৷
আনহাতে ৰাজ্য চৰকাৰৰ দণ্ডাধীশ পৰ্যায়ৰ তদন্তৰ ঘোষণাৰ পিছতে বুধবাৰে শিৱসাগৰৰ বিহুবৰলৈ ৰাওনা হয় ফৰেণছিকৰ দল ৷ একেদৰে আইজিপি কংকন জ্যোতি শইকীয়াও ৰাওনা হয় বিহুবৰলৈ ৷
ইপিনে মুখ্যমন্ত্ৰীৰ নিৰ্দেশমৰ্মে বিহুবৰ আৰক্ষী থানাত বিএনএছৰ 10/26 u/s 103(1)/3(5) ধাৰাত গোচৰ ৰুজু কৰা হৈছে ৷ ইতিমধ্যে এই গোচৰমৰ্মে শিৱসাগৰৰ এছএছপি পাপৰী পাপৰি চেতিয়াৰ নেতৃত্বত প্ৰাৰম্ভিক তদন্ত আৰম্ভ হৈছে ৷
উল্লেখ্য যে বীৰ লাচিত সেনাৰ শিমলুগুৰি আঞ্চলিক সমিতিৰ সভাপতি মানসজ্যোতি চেতিয়া (৩৪)ই সোমবাৰে পুৱতি নিশা চিকিৎসাধীন অৱস্থাত ডিব্ৰুগড়স্থিত অসম চিকিৎসা মহাবিদ্যালয়ত মৃত্যুক সাবটি লৈছিল । যোৱা ২৩ আগষ্টত বানবিধ্বস্ত বিহুবৰৰ এজন বৃদ্ধ লোকৰ সহায়ৰ বাবে গৈ পৰৱৰ্তী সময়ত নিশা ঘৰলৈ মটৰ চাইকেলৰে উভতি আহিছিল মানসজ্যোতি। সেই সময়ত অগাপিছাকৈ আহি থকা মানসজ্যোতিৰ সতীর্থসকলে তেওঁ বহু দেৰিলৈকে উভতি নহা দেখি বিচাৰ-খোচাৰ কৰে।
পৰৱৰ্তী সময়ত তেওঁলোকে মানসক তেজৰে তুমুৰলি অৱস্থাত চন্টক বিহুবৰৰ মাজৰ ৰাজপথত পৰি থকা প্ৰত্যক্ষ কৰে। সংকটজনক অৱস্থাত ততালিকে মানসক চিকিৎসাৰ বাবে ডিব্ৰুগড়ৰ অসম চিকিৎসা মহাবিদ্যালয়লৈ প্ৰেৰণ কৰা হয়। কিন্তু মঙলবাৰে পুৱতি নিশা চিকিৎসাধীন অৱস্থাতে কৰুণ মৃত্যুক আঁকোৱালি লয় বীৰ লাচিত সেনাৰ শিমলুগুৰি আঞ্চলিক সমিতিৰ সভাপতি মানসজ্যোতিয়ে।
আনহাতে মানসৰ নশ্বৰদেহ শিমলুগুৰি আহি পোৱাৰ লগে লগে এক শোকাকুল পৰিবেশৰ সৃষ্টি হয়৷ বীৰ লাচিত সেনাৰ শীৰ্ষ নেতা শৃংখল চলিহা সহ বিভিন্ন নেতাই মানসৰ নশ্বৰদেহত সংগঠনৰ পতাকাৰে ঢাকি দি এই ঘটনাৰ উচিত দাবী কৰি পৰিবেশ উত্তাল কৰি তোলে ৷