TipukTeaGarden : দৈনিক অগ্ৰদূত ডিজিটেল ডেস্ক: চাহ বাগিচাৰ শ্ৰমিকসকলৰ কঠোৰ পৰিশ্ৰমৰ আঁৰত লুকাই আছে তেওঁলোকৰ দৈনন্দিন জীৱনৰ আন এক কঠিন ছবি। ডুমডুমাৰ টিপুক চাহ বাগিচাত দীৰ্ঘদিন ধৰি মেৰামতিৰ অভাৱত জীৰ্ণ হৈ পৰা শ্ৰমিক লাইন কোৱাটাৰসমূহে উন্মোচন কৰিছে শ্ৰমিক পৰিয়ালসমূহৰ বাসস্থানৰ শোচনীয় অৱস্থা।
চালিৰ পৰা বেৰলৈ, মজিয়াৰ পৰা ঘৰৰ সামগ্ৰিক অৱস্থালৈ—বহু কোৱাটাৰেই এতিয়া জৰাজীৰ্ণ ৰূপ ধাৰণ কৰিছে। কোৱাটাৰৰ বিভিন্ন অংশ নষ্ট হৈ পৰাৰ ফলত স্বাভাৱিকভাৱে বসবাস কৰাটোও শ্ৰমিক পৰিয়ালসমূহৰ বাবে কঠিন হৈ পৰিছে।
বিশেষকৈ বাৰিষাৰ দিনকেইটাত পৰিস্থিতি অধিক জটিল হৈ পৰে। বৰষুণ দিলে নষ্ট চালিৰে ঘৰৰ ভিতৰলৈ পানী সোমাই আহে। ফলত ঘৰৰ ভিতৰত পানী পৰা বন্ধ কৰাৰ চেষ্টা কৰাৰ লগতে সন্তান আৰু পৰিয়ালৰ আন সদস্যসকলক লৈ নিশা কটাবলগীয়া হয় বহু পৰিয়ালে। বৰষুণৰ সময়ছোৱাত এনে পৰিস্থিতিয়ে শ্ৰমিকসকলৰ মাজত আতংকৰ সৃষ্টি কৰে।
ইফালে, সৰু আকাৰৰ কোৱাটাৰত একাধিক সদস্য একেলগে বসবাস কৰিবলগীয়া হোৱাৰ ফলতো পৰিয়ালসমূহে সমস্যাৰ সন্মুখীন হৈছে। শিশু আৰু বৃদ্ধসকলক লৈ এনে পৰিৱেশত বসবাস কৰাটো অধিক কষ্টকৰ হৈ পৰিছে। কোনো কোনো কোৱাটাৰৰ অৱস্থা ইমানেই জৰাজীৰ্ণ যে অধিক ক্ষতিগ্ৰস্ত হোৱাৰ আশংকাও আছে।
চাহ বাগিচাৰ উৎপাদন ব্যৱস্থাৰ সৈতে ওতপ্ৰোতভাৱে জড়িত শ্ৰমিকসকলে পুৱাৰ পৰা সন্ধিয়ালৈ চাহপাত সংগ্ৰহকে ধৰি বিভিন্ন কামত নিয়োজিত হৈ আহিছে। প্ৰখৰ ৰ’দ-বতাহ অথবা বৰষুণকো নেওচি বছৰ বছৰ ধৰি কাম কৰি অহা এইসকল শ্ৰমজীৱী লোকৰ নিজৰ বাসস্থানৰ এনে অৱস্থাই অৱশ্যে উদ্বেগৰ সৃষ্টি কৰিছে।
এজন শ্ৰমিকে আক্ষেপ প্ৰকাশ কৰি কয়,“আমি চাহ বাগিচাৰ বাবে দিন-ৰাতি পৰিশ্ৰম কৰোঁ। কিন্তু কাম শেষ কৰি ঘৰলৈ উভতি আহি নিজৰ ঘৰখনৰ অৱস্থা দেখিলে বৰ দুখ লাগে। বৰষুণ আহিলে সন্তানক লৈ চিন্তাত থাকিব লাগে।”
শ্ৰমিকগৰাকীৰ এই আক্ষেপৰ সৈতে একে অভিযোগ উত্থাপন কৰিছে আন বহু শ্ৰমিক পৰিয়ালেও। বছৰ বছৰ ধৰি চাহ উদ্যোগৰ সৈতে জড়িত হৈ শ্ৰম কৰি অহা পৰিয়ালসমূহৰ বাবে এখন নিৰাপদ আৰু বাসযোগ্য ঘৰ এতিয়াও অপূৰ্ণ আশাত পৰিণত হোৱা বুলি অভিযোগ উঠিছে।
টিপুক চাহ বাগিচাৰ সেউজীয়া পৰিৱেশৰ বিপৰীতে শ্ৰমিক লাইন কোৱাটাৰৰ জৰাজীৰ্ণ অৱস্থাই চাহ উদ্যোগৰ সৈতে জড়িত শ্ৰমিকসকলৰ জীৱন-যাপনৰ আন এক বাস্তৱ ছবিও পোহৰলৈ আনিছে।
এই পৰিস্থিতিৰ পৰিপ্ৰেক্ষিতত টিপুক চাহ বাগিচাৰ লগতে ৰাজ্যৰ বিভিন্ন চাহ বাগিচাত থকা জৰাজীৰ্ণ শ্ৰমিক কোৱাটাৰসমূহৰ জৰীপ কৰি প্ৰয়োজনীয় মেৰামতিৰ ব্যৱস্থা গ্ৰহণ কৰাৰ দাবী উত্থাপন হৈছে। যিবোৰ কোৱাটাৰ মেৰামতিৰ উপযোগী নহয়, সেইবোৰৰ ঠাইত নতুনকৈ বাসগৃহ নিৰ্মাণৰ ব্যৱস্থা কৰিবলৈ চৰকাৰ, বাগিচা কৰ্তৃপক্ষ আৰু সংশ্লিষ্ট বিভাগৰ ওচৰত আহ্বান জনোৱা হৈছে।
চাহপাতৰ প্ৰতিটো কুঁহিপাতৰ স’তে শ্ৰমিকৰ শ্ৰম আৰু ঘাম জড়িত হৈ থকাৰ পৰিপ্ৰেক্ষিতত, সেই শ্ৰমিক পৰিয়ালসমূহৰ বাবে নিৰাপদ বাসস্থান নিশ্চিত কৰাটো অত্যন্ত প্ৰয়োজনীয় বুলি স্থানীয় ৰাইজে মত প্ৰকাশ কৰিছে।
