RRTS : দৈনিক অগ্ৰদূত ডিজিটেল ডেস্কঃ অসমত দ্ৰুত পৰিবহণ ব্যৱস্থা গঢ়ি তোলাৰ দিশত নতুন পৰিকল্পনা গ্ৰহণ কৰিছে ৰাজ্য চৰকাৰে। দিল্লী-মীৰাটৰ আৰ্হিত অসমতো ৰিজিঅ’নেল ৰেপিড ট্ৰেনজিট ছিষ্টেম (RRTS) বা ৰেপিড ৰে’ল ব্যৱস্থা আৰম্ভ কৰাৰ পৰিকল্পনা কৰা হৈছে।
ৰাজ্যখনৰ গুৰুত্বপূৰ্ণ ব্যৱসায়িক স্থান আৰু নগৰাঞ্চলসমূহক দ্ৰুত তথা বহনক্ষম পৰিবহণ ব্যৱস্থাৰে সংযোগ কৰাৰ লক্ষ্যৰে এই পৰিকল্পনা কৰা হৈছে। এই সন্দৰ্ভত মুখ্যমন্ত্ৰী ড০ হিমন্ত বিশ্ব শৰ্মাই সামাজিক মাধ্যমযোগে তথ্য প্ৰকাশ কৰিছে।
মুখ্যমন্ত্ৰীগৰাকীয়ে এক্সত প্ৰকাশ কৰা অনুসৰি, অসমত বহনক্ষম পৰিবহণ ব্যৱস্থাৰ এক সুসংহত ৰূপৰেখা প্ৰস্তুত কৰাৰ বাবে এছিয়ান ডেভেলপমেণ্ট বেংক (ADB)ৰ সৈতে প্ৰাৰম্ভিক পৰ্যায়ত আলোচনা চলি আছে। গুৰুত্বপূৰ্ণ অঞ্চলসমূহক সংযোগ কৰি ভৱিষ্যতে কেনেধৰণৰ আঞ্চলিক দ্ৰুত পৰিবহণ ব্যৱস্থা গঢ়ি তুলিব পাৰি, সেই বিষয়েও আলোচনা কৰা হৈছে।
তেওঁ এক্স পোষ্টত উল্লেখ কৰে, “দিল্লী-মীৰাটৰ আৰ্হিত অসম ৰেপিড ট্ৰেনজিট চিষ্টেম (আৰআৰটিএছ)। এই সন্দৰ্ভত এছিয়ান ডেভেলপমেণ্ট বেংকৰ সৈতে প্ৰাৰম্ভিক আলোচনা চলি আছে। গুৰুত্বপূৰ্ণ অঞ্চলসমূহক সংযোগ কৰাৰ লক্ষ্যৰে বহনক্ষম পৰিবহণ ব্লুপ্ৰিণ্ট প্ৰস্তুত কৰিবলৈ আলোচনা চলি আছে। আলোচনা আগবঢ়াৰ লগে লগে আপোনালোকক জনোৱা হ’ব।”
অৱশ্যে প্ৰস্তাৱিত নেটৱৰ্কৰ কোনকেইটা পথৰ মাজত সংযোগ স্থাপন কৰা হ’ব, প্ৰকল্পটোৰ খৰচ কিমান হ’ব অথবা সম্ভাব্য সময়সীমা কি হ’ব, সেই সন্দৰ্ভত এতিয়াও কোনো সবিশেষ প্ৰকাশ কৰা হোৱা নাই। শেহতীয়াকৈ প্ৰস্তাৱিত ৰিং ৰোডৰ স’তে সংযোগ স্থাপন কৰি কৰিড’ৰসমূহক অগ্ৰাধিকাৰ দিয়াৰ কথাও মুখ্যমন্ত্ৰীগৰাকীয়ে উল্লেখ কৰিছে।
প্ৰায় ১২১ কিলোমিটাৰ দৈৰ্ঘ্যৰ প্ৰস্তাৱিত ৰিং ৰোড কৰিড’ৰত উত্তৰ পাৰৰ বাইপাছৰ লগতে ব্ৰহ্মপুত্ৰৰ ওপৰত এখন দলং নিৰ্মাণৰ পৰিকল্পনা আছে। এই ৰিং ৰোডৰ কাষেৰে ৰেপিড ৰে’ল অথবা মেট্ৰ’ ৰে’ল ব্যৱস্থা সংযোগ কৰিব পৰা যায় নেকি, সেই বিষয়েও সম্ভাৱ্য পৰ্যালোচনা চলি আছে।
ইফালে, গুৱাহাটীত দ্ৰুত পৰিবহণ ব্যৱস্থা গঢ়ি তোলাৰ ক্ষেত্ৰত পূৰ্বেও পৰিকল্পনা গ্ৰহণ কৰা হৈছিল। গুৱাহাটী মহানগৰ উন্নয়ন প্ৰাধিকৰণৰ পূৰ্বৰ পৰিকল্পনা অনুসৰি, প্ৰথম পৰ্যায়ত প্ৰায় ৬১.৪ কিলোমিটাৰ দৈৰ্ঘ্যৰ ৰেপিড ট্ৰেনজিট ছিষ্টেম নিৰ্মাণৰ প্ৰস্তাৱ আছিল। সেই প্ৰস্তাৱত ধাৰাপুৰ-নাৰেংগী আৰু জালুকবাৰী-খানাপাৰাকে ধৰি কেইবাটাও কৰিড’ৰ অন্তৰ্ভুক্ত কৰা হৈছিল।
জনসংখ্যা বৃদ্ধিৰ লগে লগে বিশেষকৈ নগৰাঞ্চলত নগৰীকৰণ আৰু আঞ্চলিক পৰিবহণ ব্যৱস্থাৰ ওপৰত চাপ বৃদ্ধি পাইছে। এনে পৰিপ্ৰেক্ষিতত ৰেপিড ৰে’ল, মেট্ৰ’ ৰে’ল আৰু ৰিং ৰোডৰ দৰে পৰিবহণ আন্তঃগাঁথনিৰ পৰিকল্পনাই গুৰুত্ব লাভ কৰিছে।
