Tezpur: প্রকৃতিপ্রদত্ত শোভাৰে মনোৰম তেজপুৰ চহৰৰ সৌন্দৰ্যক অনন্য মাত্রা প্রদান কৰা ইয়াৰ প্ৰাকৃতিক জলভাণ্ডাৰ পদুম পুখুৰীৰ সৌন্দর্যবর্ধন কৰি নিৰ্মাণ কৰা ‘পদুম পুখুৰী পার্ক’ৰ মেৰামতি তথা পুনৰ নিৰ্মাণৰ আঁচনি প্রায় এবছৰ পূৰ্বে ৰূপায়ণ কৰিছিল ৰাজ্য চৰকাৰৰ গৃহ আৰু নগৰ পৰিক্ৰমা বিভাগৰ উত্তৰ অসম সংমণ্ডলে। সংমণ্ডলটোৰ কাৰ্যবাহী অভিযন্তা ঋতুপর্ণ ভট্টাচাৰ্যৰ তত্ত্বাৱধানত ৰূপায়িত সাত কোটি ২৩ লাখ ১১ হেজাৰ ৯৫ টকা ব্যয়সাপেক্ষ এই আঁচনিত সংঘটিত হৈছে এক বৃহৎ কেলেংকাৰি।
উল্লেখ্য যে পদুম পুখুৰীৰ সৌন্দৰ্যবৰ্ধনৰ উক্ত আঁচনিয়ে সামৰি লোৱা কামসমূহ আছিল-পদুম পুখুৰী পাৰ্কত থকা পানীৰ ফোঁৱাৰাৰ মেৰামতি তথা পুনৰ নিৰ্মাণ, ফল-মূলৰ গছ আৰু আলংকাৰিক বৃক্ষ ৰোপণ, পুখুৰীৰ পাৰৰ খহনীয়া নিয়ন্ত্রণ তথা সুৰক্ষা, চৌহদৰ তাঁৰৰ বেৰ দিয়া, শৌচাগাৰৰ মেৰামতি, চেপ্টিক টেংক নির্মাণ, শিশুৰ খেলৰ সামগ্রী যোগান, ‘আই লাভ তেজপুৰ’ পইন্ট নির্মাণ, বৈদ্যুতিকৰণ ইত্যাদি। অসম চৰকাৰৰ কেবিনেট সভাৰ সিদ্ধান্তৰ ভিত্তিত তেজপুৰৰ বৰপুখুৰীৰ সৌন্দর্যবর্ধনৰ বাবে ‘আৰবান ইনফ্রাকস্ট্রাকচাৰ ডেভেলপ ফাণ্ড’ (এআইইউডিএফ)ৰ পুঁজিৰ পৰা ৰাজ্য চৰকাৰে আবন্টন দিয়া প্রায় ১৫ কোটি টকা ব্যয়সাপেক্ষ বৰপুখুৰী সৌন্দর্যবর্ধন আঁচনিৰ অংশৰূপেই এই ধনৰাশিৰ প্রায় ৫০ শতাংশৰে পদুমপুখুৰীৰ এই আঁচনি ৰূপায়ণ কৰা হৈছিল।
আঁচনি ৰূপায়ণৰ দায়িত্ববাহী বিভাগ একেটাই হোৱাৰ দৰে ঠিকাদাৰো আছিল সেই একেজনেই। নাম সীতাৰাম বাগ্ৰী। চৰজমিন অনুসন্ধানত বৰপুখুৰীৰ দৰেই পদুমপুখুৰী পাৰ্কত ৰূপায়িত এই সাত কোটিটকীয়া আঁচনিতো দৃষ্টিগোচৰ হৈছে বিভাগটোৰ অভিযন্তা আৰু ঠিকাদাৰে চলোৱা ব্যাপক লুণ্ঠনৰ আন এখন ছবি। মন কৰিবলগীয়া যে, পদুম পুখুৰী পাৰ্কত ১৩ লাখ টকা ব্যয় কৰি গৃহ আৰু নগৰ পৰিক্ৰমা বিভাগে ঠিকাদাৰ সীতাৰাম বাগ্ৰীৰ জৰিয়তে মেৰামতি তথা পুনৰ নিৰ্মাণ কৰিছে পানীৰ ফোঁৱাৰা।
পদুম পুখুৰীৰ পানীৰে ফোঁৱাৰা চলাব লাগিছিল যদিও নিম্নমানৰ কামৰ বাবে এই ব্যৱস্থা অচল হৈ পৰাত এই ফোঁৱাৰাত এতিয়া তেজপুৰ পৌৰসভাই দিনটোত দুবাৰকৈ পানী যোগান ধৰিব লাগে। দিনটোৰ বেছিখিনি সময় ফোঁৱাৰা বন্ধ হৈ থাকে। কাৰণ ইয়াত ভৰোৱা পানী বেছি সময় নাথাকে। বাহিৰলৈ ওলাই যায়।
অর্থাৎ ১৩ লাখ টকাৰে মেৰামতিৰ পাছতো পানী ফোঁৱাৰাৰ পানী ওলাই যায়। লুণ্ঠনৰ স্বাৰ্থত কাম অতি নিম্নমানৰ হোৱাৰ বাবেই এতিয়া ফোঁৱাৰাৰ এনে দুৰৱস্থা। আঁচনিৰ প্রাককলন অনুসৰি পদুমপুখুৰীৰ খহনীয়া নিয়ন্ত্ৰণ আৰু পাৰৰ সুৰক্ষাৰ বাবে ক্রমে এক কোটি ৬৪ লাখ ২৬ হেজাৰ ৯৭০ টকা আৰু দুই কোটি ৬০ লাখ ৭৯ হেজাৰ ৯৩৫ টকা ব্যয়সাপেক্ষ দুখন আঁচনি ইয়াত ৰূপায়ণ কৰা হৈছে। মুঠ চাৰি কোটি ২৫ লাখ ছহেজাৰ ৯০৫ টকা ব্যয়সাপেক্ষ এই আঁচনিৰ ৰূপায়ণৰ ৰেহৰূপ প্রত্যক্ষ কৰিলেও তবধ মানিবলগীয়া। এই আঁচনি ৰূপায়ণৰ পাছত খহনীয়া প্ৰতিৰোধ ব্যৱস্থাই এতিয়া ব্যাপকভাবে বিভিন্ন স্থানত খহনীয়াৰ কবলত পৰিবলৈ আৰম্ভকৰিছে। যিয়ে আঁচনিখনৰ বিফলতাকে উদঙাই দেখুৱাইছে।
ভিতৰ ফালৰ পৰা হোৱা খহনীয়াই এনে ৰূপ লৈছে যে ভৱিষ্যতে খহনীয়া প্ৰতিৰোধ ব্যৱস্থাৰ বাবে ৰূপায়ণ কৰা উক্ত আঁচনিখনৰ খহনীয়াৰ পৰা ৰক্ষা কৰাৰ হেতুকে আন এখন আঁচনি গ্রহণ কৰাৰ প্ৰয়োজনীয়তাই দেখা দিছে। – খহনীয়া প্ৰতিৰোধ আঁচনি ৰূপায়ণত হোৱা কাৰিকৰী গাফিলতি আৰু কামৰ নিম্ন মানেই এনে সম্ভাৱনাৰ সৃষ্টি কৰাটো স্পষ্ট কৰি দিয়ে। অভিযন্তা-ঠিকাদাৰে লুণ্ঠনৰ স্বার্থতে আঁচনিখন এনেভাৱে নিৰ্মাণ কৰিছে যে শিলৰ বান্ধৰ মাজে-মাজে ফাঁক থকাৰ লগতে খহনীয়া প্ৰতিৰোধৰ হেতু দিয়া জিঅ’ ফেব্রিক চিট নিজেই বান্ধৰ পৰা খহি পৰিছে।
তদুপৰি বান্ধৰ কিছু অংশ সম্পূর্ণই নকৰিলে। যাৰ বাবে আঁচনিখনৰ মাজত ফাঁক ৰৈ গৈছে। কাৰিকৰী দক্ষতাৰ অভাৱ আৰু দুর্নীতি-অনিয়মৰ বাবে জিঅ’ ফেব্রিক চিটত বান্ধৰ বহু অংশতে এৰি গৈছে। অৰ্থাৎ চাৰি কোটিৰো অধিক থকা ব্যয়ৰে নিৰ্মাণ কৰা পদুমপুখুৰীৰ খহনীয়া নিয়ন্ত্ৰণ আৰু প্ৰতিৰোধ আঁচনিখন গৃহ আৰু নগৰ পৰিক্ৰমা বিভাগৰ কাৰ্যবাহী অভিযন্তা ঋতুপর্ণ ভট্টাচার্য, কনিষ্ঠ অভিযন্তা জ্যোর্তিময় নাথ আৰু ঠিকাদাৰ সীতাৰাম বাগ্ৰীৰ দুর্নীতি-লুণ্ঠনৰ বাবে তথৈবচ অৱস্থাৰ ফালে গতি কৰিছে।
পদুম পুখুৰী পাৰ্কত শিশুসকলৰ বাবে থকা পূৰ্বৰ খেলাৰ সামগ্ৰীসমূহ আঁতৰাই ইয়াত গৃহ আৰু নগৰ পৰিক্ৰমা বিভাগে আঁচনি অনুসৰি ৩৪ লাখ ২৪ হেজাৰ ৭৮১ টকাৰ খেলৰ কিছু সামগ্ৰী আৰু তিনি আৰু চাৰি আসনযুক্ত ১৫ খন ষ্টীলৰ বেঞ্চ যোগান ধৰিছে। ৩৪ লাখ টকা ব্যয় কৰি বিভাগটোৱে যোগান ধৰা উক্ত আঁচনিখনতো দুর্নীতি সংঘটিত হৈছে।
এই খেলাৰ সামগ্ৰীৰ পৰিমাণৰ বিপৰীতে বিভাগটোৱে ব্যয় কৰা ধনৰ পৰিমাণৰ হিচাপ কৰিলে গড়ে প্রতিবিধ সামগ্রীত হোৱা খৰছৰ পৰিমাণ চকু কপালত তোলাবিধৰ।
ইয়াতেই শেষ হোৱা নাই ঠিকাদাৰ সীতাৰাম বাগ্ৰীৰে মিলি গৃহ আৰু নগৰ পৰিক্ৰমা বিভাগৰ কাৰ্যবাহী অভিযন্তা ঋতুপর্ণ ভট্টাচাৰ্য আৰু দায়িত্ববাহী কনিষ্ঠ অভিযন্তা জ্যোতির্ময় নাথে পদুমপুখুৰী পাৰ্কৰ সৌন্দর্যবর্ধন কৰা ছবিখনৰ দুৰ্নীতি-লুণ্ঠনৰ তথ্য। বিভাগটোৱে আঁচনি অনুসৰি বৈদ্যুতিকৰণ শিতানত কিছুমান লাইটৰো ব্যৱস্থা কৰিছিল।
পিছে ছাগলীৰ এৰালৰ খুঁটিৰ দৰে কেতবোৰ খুঁটি পুতি লগোৱা সেই লাইটৰ অৱস্থা এতিয়া জৰাজীৰ্ণ হৈ পৰিছে। আনহাতে, ‘আই লাভতেজপুৰ’ সম্বলিত সৌন্দর্যবর্ধক এটা পইন্ট নির্মাণত বিভাগে ব্যয় হোৱা দেখুৱাইছে তিনি লাখ সাত হেজাৰ ৬৩ টকা। কাম আৰু ধনৰ ব্যয়ত বৃহৎ ব্যৱধান পৰিলক্ষিত হয়।
লক্ষ্যণীয় যে প্রাক্কলন অনুসৰি বৰপুখুৰী আৰু পদুমপুখুৰী পাৰ্কত বিভিন্ন প্ৰকাৰৰ মুঠ ২০৯৫ টা ফলমূল তথা আলংকৰিক গছৰ পুলি ৰোপণ, মাটি ভৰোৱা আৰু ঘাঁহ লগোৱাৰ বাবদ ধাৰ্য কৰা হৈছিল ন লাখ ৮৯ হেজাৰ ২৩৬ টকা। পদুম পুখুৰী পাৰ্কত প্রায় ৫০টা আলংকৰিক গছপুলি লগোৱাৰ বাহিৰে আন গছপুলিসমূহ বৰপুখুৰী আৰু পদুম পুখুৰী তথা দুয়ো ঠাইতে এতিয়াও অদৃশ্য হৈয়েই ৰৈছে। যি আলংকাৰিক গছপুলি আঁচনি অনুসৰি ৰোপণ কৰিছে পদুমপুখুৰীত তাৰ ৰেহ ৰূপ প্রত্যক্ষ কৰিলে দুর্নীতি-লুণ্ঠনৰ ছবিখন স্পষ্ট হৈ পৰে। প্রায় ৫০ টা গছপুলি লগায়েই বিভাগটোৱে ১০ লাখ টকীয়া আঁচনি সম্পন্ন কৰি হাত ধুলে। ইপিনে, যি গছপুলি ৰোপণ কৰিছে সেয়া আলংকৰিক গছৰ পুলি হয় নে নহয়, তাৰো নিশ্চয়তা নাই।
উল্লেখ্য যে বৰপুখুৰীৰ সৌন্দর্যবর্ধনৰ নামত সংঘটিত দুর্নীতি-লুণ্ঠনৰ কেলেংকাৰিৰ পূৰ্বৰ একাধিক প্রতিবেদনত দাঙি ধৰা হৈছে। ১৫ কোটিটকীয়া এই আঁচনিয়ে সামৰি লোৱা আনটো অংশ অর্থাৎ পদুম পুখুৰী পাৰ্কত পৰিদৃষ্ট হোৱা সাত কোটিটকীয়া আঁচনি ৰূপায়ণৰ এই ছবিয়েই স্পষ্ট কৰি দিয়ে ঠিকাদাৰ আৰু গৃহ আৰু নগৰ পৰিক্ৰমা বিভাগৰ অভিযন্তাই মিলি তেজপুৰৰ সৌন্দর্যবর্ধনৰ নামত কৰা কোটিটকীয়া কেলেংকাৰিৰ তথ্য।
মন কৰিবলগীয়া যে পদুম পুখুৰী পাৰ্কৰ তদাৰক কৰে ‘তেজপুৰ এনভাইৰণমেন্ট ছ’চাইটি’ নামৰ এক সংস্থাই, যি শোণিতপুৰ জিলা প্ৰশাসনৰ নিয়ন্ত্রণত। জিলা আযুক্ত এই সংস্থাৰ সভাপতি আৰু উপ-সভাপতিৰ দায়িত্বত আছে বিশিষ্ট সমাজসেৱী ডাঃ লক্ষী গোস্বামীৰ দৰে প্ৰভাৱশালী ব্যক্তিত্ব। সংস্থাত আছে তেজপুৰৰ আন বহু বিশিষ্ট নাগৰিকো। এনে সন্মানীয় তথা প্ৰভাৱশালী ব্যক্তিত্বকো পৰোৱা নকৰাকৈ দায়িত্ববাহী বিভাগীয় অভিযন্তা আৰু ঠিকাদাৰে সৌন্দর্যবর্ধনৰ নামত এনেদৰে আঁচনিৰ ধন লুণ্ঠনৰ স্বাৰ্থত মইমতালিৰে কাম সম্পন্ন কৰিবলৈ কুণ্ঠাবোধ নকৰাটো স্বাভাৱিকতেই বিচাৰ্যকৰ বিষয়।
তাৎপর্যপূর্ণ যে এই আঁচনিয়েই নহয়, তেজপুৰত সম্পাদিত এনে বহু কোটিটকীয়া আঁচনিৰ ঠিকাদাৰ তথা ঠিকাদাৰী প্ৰতিষ্ঠানৰে সম্পৰ্ক থকা ব্যক্তি বিশেষৰ দিছপুৰৰ স’তে অতি ঘনিষ্ঠ সম্পর্ক আছে আৰু তাৰ সুবাদতে মুখ্যমন্ত্রী কিম্বা মন্ত্ৰীৰ নাম লৈ এনে ঠিকাদাৰ কিম্বা ব্যক্তিবিশেষে বিভাগীয় অভিযন্তা বা বিষয়া-কৰ্মচাৰীক তেওঁ বিচৰা ধৰণে কাম কৰিবলৈ বাধ্য কৰাই অহা বুলি অভিযোগ উত্থাপিত হৈছে।