Nepal :দৈনিক অগ্ৰদূত ডিজিটেল ডেস্ক : ধাৰাসাৰ বৰষুণত বিপৰ্যস্ত নেপালৰ বিভিন্ন অঞ্চল। বৃহস্পতিবাৰৰ পৰা অব্যাহত থকা মুষলধাৰ বৰষুণৰ মাজতে কেবাটাও স্থানত ভূমিস্খলন সংঘটিত হোৱাত বিগত ৭২ ঘণ্টাত দেশখনত প্ৰায় ১৪ জন লোকৰ মৃত্যু হৈছে।
পৰিস্থিতিৰ অৱনতি ঘটাৰ মাজতে দেওবাৰে বতৰ বিজ্ঞান বিভাগে দেশখনত সতৰ্কতা জাৰি কৰে। একে সময়তে নাৰায়ণী নদীৰ জলস্তৰ প্ৰায় ৯ মিটাৰলৈ বৃদ্ধি পোৱাত মধ্য নেপালৰ নদীপাৰৰ বাসিন্দাসকলক সতৰ্ক কৰে প্ৰশাসনে।
কেৱল নদীৰ জলস্তৰ বৃদ্ধিয়েই নহয়, ভূমিস্খলনৰ ফলত ব্যাহত হৈছে দেশখনৰ যাতায়াত ব্যৱস্থাও। চিতৱানলৈ যোৱা ঘাইপথৰ একাধিক স্থানত ভূমিস্খলন সংঘটিত হৈ পথ বন্ধ হৈ পৰাত প্ৰশাসনে সেই পথসমূহ বন্ধ কৰি দিছে।
দুৰ্যোগ প্ৰশমন বিভাগৰ তথ্য অনুসৰি, দেওবাৰে ম্যাগডি জিলাৰ অন্নপূৰ্ণা গাঁৱত সংঘটিত ভূমিস্খলনে প্ৰাণ লয় চাৰিজন লোকৰ। গাঁও পৰিষদৰ অধ্যক্ষ ভাৰত কুমাৰ পুনে এই তথ্য এএনআইক সদৰী কৰে।
ইফালে, অব্যাহত থকা ধাৰাসাৰ বৰষুণৰ বাবে বিভিন্ন স্থানত উদ্ধাৰ অভিযান চলোৱাতো সমস্যাৰ সৃষ্টি হৈছে। বাগলুং জিলাৰ নিশিখোলা গাঁৱতো দেওবাৰে পুৱা সংঘটিত ভূমিস্খলনত চাৰিজন লোকৰ মৃত্যু হোৱা বুলি স্থানীয় এগৰাকী বিষয়াই এএনআইক জানিবলৈ দিয়ে।
উল্লেখ্য, ২৬ আগষ্টত নেপালত সংঘটিত হঠাৎ বানৰ পিছত দেশখনৰ পৰিস্থিতি অধিক সংকটজনক হৈ পৰিছে। বৰ্তমানলৈকে সেই বানত প্ৰায় ১,৪০০ৰো অধিক লোকৰ মৃত্যু হোৱাৰ লগতে প্ৰায় ৬,০০০ৰো অধিক লোক সন্ধানহীন হৈ আছে বুলি জানিব পৰা গৈছে।
