ISRO : দৈনিক অগ্ৰদূত ডিজিটেল ডেস্ক : এই মুহূর্তত দুভাগত বিভক্ত ভাৰতবৰ্ষ। এখন ভাৰতৰ মূৰৰ ওপৰত আছে ঘন মেঘৰ আচ্ছাদন, আন অংশৰ আকাশ আকৌ বহুখিনি পৰিষ্কাৰ। এইদৰেই মেঘৰ দ্বাৰা দুভাগত বিভক্ত হৈ পৰিছে আমাৰ দেশ।
অথচ বতৰৰ খামখেয়ালিৰ এয়াই বাস্তৱ চিত্ৰ। বৰষুণৰ বতৰতে সম্প্ৰতি ইছৰ’ৰ এক উপগ্রহ চিত্ৰত ধৰা পৰিছে দেশৰ আকাশৰ এই দুই বিপৰীত ছবি। যাক দেখি আচৰিত হৈছে পৰিৱেশবিদসকলো। উপগ্রহ চিত্রত দেখা গৈছে যে দেশৰ পূব আৰু দক্ষিণাংশৰ আকাশ ভৰি আছে ঘন ক’লা ডাৱৰৰে।
আনহাতে, পশ্চিম আৰু উত্তৰ পশ্চিমাংশৰ আকাশ বহুখিনি পৰিষ্কাৰ। এই দুই পৃথক চিত্রতে স্পষ্ট হৈছে যে বৰষুণৰ নিৰ্দিষ্ট সময় পাৰ হৈ গ’লেও দেশৰ অর্ধেক স্থানৰ পৰা এতিয়াও বিদায় লোৱা নাই।
ইছৰ’ৰ সূত্রই জনাইছে, শুকুৰবাৰে ইনছেট থ্রীডিএছ নামৰ ভাৰতীয় বিজ্ঞানীয়ে প্ৰেৰণ কৰা কৃত্রিম উপগ্ৰহৰ মাধ্যমেৰে একাংশ ছবি আহি পাইছে নিয়ন্ত্রণ কক্ষত। এই উপগ্রহটো প্রধানকৈ বতৰ সংক্রান্তীয় খা-খবৰৰ বাবে উৎক্ষেপণ কৰা হৈছিল।
থার্মেল ইনফ্ৰাৰেডৰ মাধ্যমেৰে সেই উপগ্রহে প্ৰেৰণ কৰা চিত্ৰৰ দৃশ্যমানতা সাধাৰণ উপগ্রহতকৈ বহু বেছি। আনকি নিশাও সেয়া ভালদৰে দেখা পোৱা যায়। সম্প্রতি এই উপগ্ৰহৰ চিত্ৰ বতৰৰ পূর্বাভাসৰ বাবে ব্যৱহাৰ কৰে মৌচম ভৱনে।
ইনছেট থ্রীডিএছে প্ৰেৰণ কৰা মেঘৰ চিত্ৰ বিশ্লেষণ কৰি বৰ অবাক হৈছে ইছৰ’ৰ বিজ্ঞানীসকল। দেখা গৈছে যে বংগোপসাগৰ সংলগ্ন অঞ্চল একেবাৰে মেঘাচ্ছন্ন।মেঘৰ সেই উজ্জ্বলতা বিয়পি আছে দেশৰ পূব আৰু দক্ষিণ পূর্বাংশৰ অনেক অঞ্চলজুৰি। তদুপৰি দক্ষিণ ভাৰতত সাগৰ সংলগ্ন অঞ্চলত অতিৰিক্ত আৰু এক মেঘৰ স্তৰ আছে।
বিজ্ঞানীসকলে ব্যাখ্যা কৰিছে যে দক্ষিণ ভাৰতত দুবাৰ বর্ষাকাল হয়। তাত এতিয়া লাহে লাহে বর্ষাই বিদায় লৈছে। তৎসত্ত্বেও যি মেঘৰ স্তৰ দেখা গৈছে সেয়া প্রধানকৈ নিম্নচাপ, বতাহত অতিৰিক্ত জলীয় বাষ্পৰ পৰা তৈয়াৰী। ইয়াৰ প্ৰভাৱতে ভৰ শৰতৰ বতৰতো বৰষুণে পিছ এৰা নাই।
আনহাতে, পশ্চিম আৰু উত্তৰ পশ্চিমাংশৰ আকাশ যে বহুখিনি পৰিষ্কাৰ, তাৰ কাৰণো সেই বায়ুমণ্ডলৰ গতিবিধি। সেইফালে নিম্নচাপ বা পানীত গধুৰ মেঘ উৎপন্ন হোৱাৰ দৰে বতৰ নাই। সেয়ে কেলেণ্ডাৰৰ নিয়ম মানি দেশৰ এই প্ৰান্তৰ পৰা বৰ্ষাই বিদায় লৈছে। মেঘো নাই; কিন্তু দেশৰ দুই প্ৰান্তত দুই প্ৰকাৰৰ ছবিখন অতি বিৰল।
বিজ্ঞানীসকলে ধাৰণা কৰিছে যে বতৰৰ খামখেয়ালিত এনে আৰু অনেক ব্যতিক্রমী চিত্ৰ ধৰা পৰিব আগন্তুক দিনত।
