MPLADS : দৈনিক অগ্ৰদূত ডিজিটেল ডেস্ক : নগাঁও লোকসভা সমষ্টিৰ উপ-নির্বাচনৰ ৰাজনীতি এতিয়া তুংগত। শাসক-বিৰোধী সকলোৱে এই নির্বাচনত জয়লাভৰ অংকৰে নিজৰ নিজৰ ৰণকৌশল অনুসৰি সমষ্টিটোত জপিয়াই পৰিছে।
সমষ্টিবাসীক উন্নয়নৰ সপোন দেখুৱাই ভোট যুদ্ধত জয়লাভেই এতিয়া সকলোৰে লক্ষ্য। এই সময়তে প্রশ্ন উত্থাপন হৈছে যে অসমৰ সাংসদে সমষ্টিৰ ৰাইজৰ উন্নয়নৰ বাবে কিমান কৰিব পাৰিছে?
চলিত অষ্টাদশ লোকসভাৰ কাৰ্যকালৰ অর্ধেক দিন উকলিল। আগতীয়াকৈ হ’লেও প্রায় সকলো দলেই ২০২৯ৰ নিৰ্বাচনৰ বাবে প্রস্তুতি আৰম্ভ কৰিয়েই দিছে; কিন্তু সামগ্রিকভাবে অসমৰ লোকসভাৰ সাংসদসকলে এতিয়ালৈকে নিজৰ সাংসদ পুঁজিৰ ধনৰ সদ্ব্যৱহাৰ কৰিবলৈ সক্ষম হোৱা নাই।
যদিও এজন সাংসদ নিজৰ সাংসদ উন্নয়ন পুঁজিৰ ধন ব্যয়ৰ লগত প্রত্যক্ষভাৱে সম্পর্কিত নহয়, তথাপি পর্যবেক্ষণৰ ক্ষেত্ৰত দায়বদ্ধ। নগাঁৱৰ প্রাক্তন সাংসদজনকো হিচাপত ধৰিলে অসমৰ লোকসভাৰ ১৪ জন সাংসদে যোৱা আগষ্টলৈ নিজৰ উন্নয়ন পুঁজিৰে এতিয়ালৈকে ১৫ শতাংশও কাম কৰিবলৈ সক্ষম হোৱা নাই। আনকি দুর্ভাগ্যজনকভাবে এনে সাংসদো আছে যিয়ে সাংসদ উন্নয়ন পুঁজিৰে এটা প্ৰকল্পৰ কামো সম্পূৰ্ণ কৰিব পৰা নাই।
উল্লেখ্য যে সাংসদসকলে প্রতি বছৰে সাংসদ উন্নয়ন পুঁজি শিতানত পাঁচ কোটিকৈ টকা লাভ কৰে। এই পুঁজিৰে নিজৰ সংসদীয় সমষ্টিত মূলতঃ আন্তঃগাঁথনি নির্মাণ সম্পৰ্কীয় কাম কৰে। তাৰ বাবে এখন নির্মাণ সমিতি থাকে। সাংসদজনে কামৰ অনুমোদন দিয়াৰ পাছত চৰকাৰৰ নিৰ্দিষ্ট বিভাগৰ পৰা অনুমোদন লাভ কৰিলে নিৰ্মাণ সমিতিৰ তত্ত্বাৱধানত সেই কাম সম্পন্ন কৰা হয়। চলিত লোকসভাৰ অসমৰ সাংসদসকলে অনুমোদন দিয়া মুঠ প্রস্তাৱৰ সংখ্যা হ’ল ২,২৬৭টা।
ইয়াৰে চৰকাৰীভাবে অনুমোদনপ্রাপ্ত প্ৰকল্পৰ সংখ্যা ১,৫৮৪টা। এই প্রকল্পবোৰৰ ভিতৰত এতিয়ালৈকে সম্পূর্ণ হোৱা কামৰ সংখ্যা মাত্র ২০৫টা। ইয়াৰ ভিতৰতো দুর্ভাগ্যজনকভাবে তিনিজন সাংসদ ক্রমে শিলচৰৰ পৰিমল শুক্লবৈদ্য, কাজিৰঙাৰ কামাখ্যা প্রসাদ তাছা আৰু কৰিমগঞ্জৰ কৃপানাথ মাল্লাৰ সাংসদ উন্নয়ন পুঁজিৰ অধীনত এটা প্রকল্পও আজিলৈকে সম্পূর্ণ হৈ নুঠিল।
শুক্লবৈদ্যই অনুমোদন লাভ কৰা কামৰ সংখ্যা ৫৪টা, তাছাৰ অনুমোদিত প্রকল্প ৫৪টা আৰু মাল্লাৰ ৪৩টা। নগাঁৱকো ধৰিলে বাকী ১১ সাংসদৰ ভিতৰত অনুমোদিত প্ৰকল্পৰ সংখ্যাৰ বিপৰীতে সৰ্বাধিক কাম সম্পূর্ণ কৰিবলৈ সক্ষম হোৱা সাংসদজন হ’ল ডিফুৰ অমৰছিং টিছো। সাংসদজনৰ ৮৬ অনুমোদিত প্ৰকল্পৰ ৪১টা সম্পূৰ্ণ হৈছে।
শাসকীয় বিজেপিৰ আন সাংসদসকলৰ ভিতৰত কেন্দ্ৰীয় মন্ত্রী তথা ডিব্ৰুগড়ৰ সাংসদ সৰ্বানন্দ সোণোৱালৰ ৬০টা কামৰ তিনিটা সম্পূৰ্ণ হৈছে। দৰং-ওদালগুৰিৰ দিলীপ শইকীয়াৰ ১৫৫টা কামৰ পাঁচটা সম্পূর্ণ হৈছে। গুৱাহাটীৰ সাংসদ বিজুলী কলিতা মেধিৰ ৯৭টা কামৰ পাঁচটাহে সম্পূর্ণ হৈছে।
তেজপুৰৰ সাংসদ ৰঞ্জিৎ দত্তৰ অনুমোদন লাভ কৰা কামৰ সংখ্যা ১৯২টা আৰু ইয়াৰে ২২টা কাম আগষ্টলৈ সম্পূর্ণ হৈছে। একেদৰে লখিমপুৰৰ প্ৰদান বৰুৱাৰ ১১৫টা কামৰ ৩৩টা সম্পূৰ্ণ হৈছে।
কংগ্ৰেছৰ গৌৰৱ গগৈৰ অনুমোদন প্রাপ্ত কামৰ সংখ্যা ৩৩৯টা আৰু ইয়াৰে ৩৫টা সম্পূৰ্ণ হৈছে। ধুবুৰীৰ ৰকিবুল হুছেইনৰ অনুমোদন লাভ কৰা কামৰ সংখ্যা হ’ল ১৩১টা আৰু সম্পূর্ণ হৈছে ২৫ টা। বিজেপিৰ বিধায়ক প্রদ্যুৎ বৰদলৈ নগাঁৱৰ কংগ্ৰেছৰ সাংসদ হৈ থকালৈকে অনুমোদন লাভ কৰা কামৰ সংখ্যা আছিল ১৭৫টা আৰু এইবোৰৰ ১৩ টা কাম সম্পূৰ্ণ হৈছে।
বৰপেটাৰ সাংসদ অসম গণ পৰিষদৰ ফণীভূষণ চৌধুৰীয়ে অনুমোদন লাভ কৰা কামৰ সংখ্যা ৬৮টা আৰু ইয়াৰে সম্পূৰ্ণ হৈছে তিনিটা। ইউপিপিএলৰ সাংসদ জয়ন্ত বসুমতাৰীয়ে অনুমোদন লাভ কৰা কামৰ সংখ্যা হ’ল ৭৪টা আৰু ইয়াৰে ২০টা কাম সম্পূর্ণ হৈছে।
