দৈনিক অগ্ৰদূত ডিজিটেল ডেস্ক : বাঁহী বাদনৰ জৰিয়তে সংগীতানুৰাগীক মুহিত কৰা লোক বাদ্য শিল্পী গৌৰীকান্ত বড়োৱে অসম চৰকাৰৰ শিল্পী পেন্সনৰ পৰা বঞ্চিত হৈ আছে। নলবাৰী জিলাৰ ধমধমাৰ মহিনা নিবাসী গৌৰীকান্ত বড়োৱে সৰুৰে পৰাই বাঁহী বাদনৰ জৰিয়তে সাংস্কৃতিক ক্ষেত্ৰখনৰ স’তে জড়িত হৈ পৰিছিল।
বাঁহী বাদনৰ জৰিয়তে খ্যাতি অর্জন কৰা গৌৰীকান্ত বড়োৱে কিছু বছৰ সংগীত আৰু নাট বিভাগত কেজুৱেল কৰ্মচাৰী হিচাপে কাম কৰিছিল। বিশিষ্ট সংগীত শিল্পী গজেন বড়ো আৰু যোগেন বড়োৰ স’তে বাঁহীবাদক হিচাপে কাম কৰা গৌৰীকান্ত বড়োৱে ১৯৭৯ত বড়ো থিয়েটাৰ সৌৰাং মঞ্জু থিয়েটাৰত বাদ্যযন্ত্ৰী।
হিচাপে যোগদান কৰি পাছলৈ লাইমন থিয়েটাৰ, মাধৱদেৱ থিয়েটাৰ আদিকে ধৰি কে’বাখনো থিয়েটাৰত বাদ্যযন্ত্ৰী হিচাপে কাম কৰিছিল। কে’বাটাও যাত্রাপার্টি তথা নাট্যগোষ্ঠীৰ স’তে ধাৰাবাহিকভাৱে কাম কৰা গৌৰীকান্ত বড়োবে ১৯৯০ত বুৰলুংবুথুৰ ফিল্ম ছ’চাইটিৰ বেনাৰত নির্মিত বড়ো কথাছবি ‘সৌৰমৌন নৌং’ত প্লে-বেক মিউজিকত সুন্দৰ বাঁহী সংগত কৰিছিল।
উত্তৰ প্ৰদেশৰ আজৰংগত অনুষ্ঠিত ৰাষ্ট্ৰীয় পৰ্যায়ৰ লোক সংগীতত বাঁহী বাদনেৰে শ্রোতা-দৰ্শকৰ মন জয় কৰা গৌৰীকান্ত বড়োৱে অনাতাঁৰ কেন্দ্ৰৰ জৰিয়তে সম্প্ৰচাৰ হোৱা লোকগীতৰ শিল্পীৰ
স’তেও বাঁহী বজাইছিল।
দূৰদৰ্শনৰ কেন্দ্ৰত প্ৰচাৰিত খেৰাই নৃত্যতো তেওঁ সুন্দৰ বাঁহী বজাই প্রশংসা বুটলিছিল। বৰিমাখা সংগীত বিদ্যালয়ৰ লগতে কে’বাখনো সংগীত বিদ্যালয়ত বাঁহী বাদনৰ শিক্ষাদান কৰা শিল্পীজনক বিভিন্ন সময়ত বড়ো সাহিত্য সভা, সুৰভি শিল্পী সংঘ, ধমধমা আদিকে ধৰি ভালেমান সামাজিক আৰু সাংস্কৃতিক অনুষ্ঠান-প্রতিষ্ঠানে সম্বর্ধনা জনাই আহিছে।
আর্থিক দুৰৱস্থাৰ মাজতো সাংস্কৃতিক ক্ষেত্রখনত সুদীর্ঘ সময় ধৰি সেৱা আগবঢ়োৱা ৬৬ বছৰীয়া গৌৰীকান্ত বড়োৱে অসম চৰকাৰৰ শিল্পী পেন্সন আঁচনিৰ বাবে পাঁচবাৰকৈ আবেদন জনালে যদিও আজিলৈকে শিল্পী পেন্সন লাভ নকৰিলে। সাংস্কৃতিক ক্ষেত্ৰখনত যথেষ্ট অৰিহণা আগবঢ়োৱা শিল্পীজনৰ অবদানৰ স্বীকৃতিস্বৰূপে অতি শীঘ্রেই গৌৰীকান্ত বড়োক শিল্পী পেন্সন প্রদান কৰিবলৈ নলবাৰীৰ জিলাৰ বিভিন্ন অনুষ্ঠান-প্রতিষ্ঠানে অসম চৰকাৰক দাবী জনাইছে।
