NehaBora : দৈনিক অগ্ৰদূত ডিজিটেল ডেস্ক : মুখ্য নির্বাচন আয়ুক্ত জ্ঞানেশ কুমাৰ আৰু ভোটাৰ তালিকাৰ এছআইআৰ বিৰোধী আন্দোলন তুংগত উঠাৰ সময়ত ব্যাপকভাবে চৰ্চালৈ আহে নেহা বৰা। তেওঁক লৈ হোৱা এই চর্চা কেৱল সীমাবদ্ধ হৈ থকা নাই, বিদেশতো ব্যাপকভারে আইছা নেত্ৰীগৰাকীয়ে ব্যাপক চর্চা – অৰ্জন কৰিছে। অৱশ্যে ককৰোচ জনতা পাৰ্টিৰ যোৱা জুলাইৰ যন্তৰ মন্তৰৰ প্ৰতিবাদৰ সময়ৰ পৰা চর্চালৈ আহে নেহা।
চিপিআই (এম-এল) ৰ ছাত্ৰ সংগঠন আইছাৰ সভানেত্রী নেহা সম্প্রতি দেশে-বিদেশে চৰ্চাৰ তুংগত থকাৰ কাৰণ হ’ল তেওঁ জ্ঞানেশ কুমাৰ আৰু এছআইআৰ বিৰোধী আন্দোলনত অংশগ্ৰহণৰ সময়ত পৰিধান কৰা এটা পাতল ৰঙা টি-শ্বার্ট। এই টি-শ্বার্টত ‘বান পীচ’ বুলি লিখা আছে। টি-শ্বার্টটোত এই শব্দ দুটা লিখা থকাৰ বাবেই তেওঁক লৈ চর্চা তুংগত উঠিছে।
সামাজিক মাধ্যমত বহুতে নেহাৰ এই টি-শ্বার্ট সম্পর্কে ভিন্ন ব্যাখ্যা কৰিছে। অৱশ্যে এইসকলৰ বহুজন অৱগত নহয় নেহাৰ এই টি-শ্বাৰ্টৰ জন্মৰ ৰহস্যৰ বিষয়ে। দৰাচলতে ‘বান পীচ’ শব্দ দুটা লিখা টি-শ্বাৰ্টৰ জন্ম দিয়ে এখন জাপানী কৌতুকধর্মী ধাৰাবাহিকে। ১৯৯৭ ত সম্প্রচাৰ আৰম্ভ হোৱা এই জাপানী ধাৰাবাহিকৰ মুখ্য চৰিত্ৰ মাংকী ডি লুফি আৰু তেওঁৰ দলে দুর্নীতিগ্রস্ত, অত্যাচাৰী শাসক আদিৰ বিৰুদ্ধে যুদ্ধ কৰিছিল।
ধাৰাবাহিকখনৰ সম্প্ৰচাৰ আৰম্ভহোৱাৰ পাছতে বিপুল জনপ্রিয়তা অর্জন কৰে। কাজেই এই ‘বান পীচ’ লিখা টি-শার্ট ‘বিদ্রোহ’ৰ প্রতীকত পৰিণত হয়। ১৯৯৭ৰ পাছত বিশ্বত গঢ়ি উঠা অনেক চৰকাৰবিৰোধী যুৱ বা জেন-জি আন্দোলনৰ নতুন ‘অস্ত্র’ত পৰিণত হয় এই প্রতীক।
২০২৫ত প্রতিবেশী দেশ নেপালৰ আন্দোলনতো যুৱপ্ৰজন্মই এনে টি-শ্বার্ট পৰিধান কৰে। সম্প্রতি ইণ্ডোনেছিয়া, ফিলিপিন্স আৰু ফ্রান্সত শিক্ষা ব্যৱস্থাৰ অনিয়মৰ বিৰুদ্ধে চলি থকা আন্দোলনত অংশগ্রহণকাৰীসকলেও এনে টি-শ্বার্ট পৰিধান কৰিছে। গতিকে নেহাই দিল্লীত চলি থকা প্রতিবাদত এনে টি-শার্ট পৰিধান কৰা কাৰ্যই দেশে-বিদেশে ব্যাপক চর্চা অর্জন কৰিছে। উল্লেখ্য যে নেপালৰ সিংহ দৰবাৰৰ পৰা আৰম্ভ কৰি ফিলিপিন্সৰ মেনিলাৰ ৰাজপথলৈ ‘ৱান পীচ’ লিখা প্রতীকযুক্ত আন্দোলনকাৰীয়ে ভিৰ কৰিছিল।
উল্লেখ্য যে আইছা নেত্রী নেহাই বিশিষ্ট সাংবাদিক যোগেন্দ্র যাদৱ আৰু জ্যেষ্ঠ অধিবক্তা প্রশান্ত ভূষণৰ স’তে হাতত হাত ধৰিও জ্ঞানেশ বিৰোধী আন্দোলনত জঁপিয়াই পৰিছে। একেদৰে কালি তেওঁ ৰাহুল গান্ধী-প্রিয়ংকা গান্ধীৰ স’তে এক বৃহৎ জনসমদলক নেতৃত্ব প্রদান কৰে। এনেদৰে আন্দোলনত জঁপিয়াই পৰি তেওঁ সামাজিক মাধ্যমতো একপ্ৰকাৰ ‘বাঘিনী’ত পৰিণত হৈছে। সম্প্রতি জৱাহৰলাল নেহৰু বিশ্ববিদ্যালয় (জেএনইউ) ত পিএইছডি কৰি থকা নেহাৰ ‘বান পীচ’ লিখা এই টি-শ্বার্টত চকু নথকা এটা লাওখোলাই ইতিকিংপূর্ণ মিচিকিয়া হাঁহি মাৰি থকা দেখিবলৈ পোৱা গৈছে।
জাপানী কৌতুক ধাৰাবাহিকখনতো মুখ্য চৰিত্ৰটোৱে এনে টি-শ্বার্ট পৰিধান কৰিছিল। এই প্রতীক সম্পৰ্কত নেপালৰ যোৱা বছৰৰ বিদ্রোহত অংশগ্রহণ কৰা বিখ্যাত ক্ষত্ৰি নামৰ যুৱকজনে কয়, ‘এই প্রতীকে বিদ্ৰোহৰ পথত প্রতিবন্ধকতা সৃষ্টি কৰা যিকোনো কাৰক দৃঢ়তা আৰু আগ্রাসী মনোভাৱেৰে মহটিয়াই নিয়াক সূচায়।’
একেদৰে ইণ্ডোনেছিয়াত এই প্রতীকক পতাকাত দেখা গৈছিল। এনে পতাকা যানবাহন, ঘৰ-দুৱাৰ আদিৰ বাহিৰত ওলমি আছিল। ইয়াৰ জৰিয়তে প্ৰতিবাদকাৰীসকলে চৰকাৰৰ বিৰুদ্ধে অসন্তুষ্টি প্রকাশ কৰিছিল। সম্প্রতি ফ্রান্সতো অনুৰূপ ঘটনা সংঘটিত হৈছে।
