DelhiSecurity :দৈনিক অগ্ৰদূত ডিজিটেল ডেস্ক: দলৰ দুই নেতা আশুতোষ ৰাঙ্কা আৰু সৌৰভ দাসক কাৰাবন্দী কৰাৰ প্ৰতিবাদত ‘তিৰংগা উড়াও’ কাৰ্যসূচীৰ আহ্বান জনাইছে চিজেপিয়ে। এই কাৰ্যসূচীক কেন্দ্ৰ কৰি পুনৰ দিল্লীত কটকটীয়া নিৰাপত্তা ব্যৱস্থা গঢ়ি তোলা হৈছে। ইমানদিনে দিল্লীজুৰি নিয়োগ হৈ আছিল ২৬ হেজাৰ নিৰাপত্তাৰক্ষী। শুকুৰবাৰে ককৰোচ জনতা পাৰ্টিৰ কাৰ্যসূচীৰ বাবে অতিৰিক্ত ছয় হেজাৰ নিৰাপত্তাৰক্ষী নিয়োগ কৰা হৈছে। এনে পৰিস্থিতিত ককৰোচ পাৰ্টিৰ প্ৰতিষ্ঠাপক অভিজিৎ দীপকে অভিযোগ কৰিছে যে চোৰাংচোৱা সংস্থাই তেওঁৰ গতিবিধিৰ ওপৰত নজৰ ৰাখিছে। তেওঁকো কাৰাগাৰলৈ প্ৰেৰণ কৰা হ’ব পাৰে বুলি আশংকা প্ৰকাশ কৰিছে দীপকে।
ককৰোচ জনতা পাৰ্টিয়ে প্ৰতিবাদ সাব্যস্ত কৰিলে সমগ্ৰ দিল্লী অৱৰুদ্ধ হৈ পৰিব আৰু পথৰ কাষৰ দোকানীসকলৰ ব্যৱসায়ত ব্যাপক ক্ষতি হ’ব। উৎসৱৰ বতৰত এনে পৰিস্থিতিৰ সৃষ্টি হ’লে যথেষ্ট সমস্যাৰ সৃষ্টি হ’ব। এই যুক্তিৰে অনিল কুমাৰ গুপ্তা নামৰ এজন ব্যক্তিয়ে দিল্লী উচ্চ ন্যায়ালয়ত আবেদন জনাইছিল।
তেওঁৰ দাবী আছিল, আদালতে ককৰোচ পাৰ্টিৰ প্ৰতিবাদী কাৰ্যসূচী বাতিল কৰক। কিন্তু অৱশেষত দিল্লী উচ্চ ন্যায়ালয়ে জনায় যে প্ৰতিবাদ কৰাৰ অধিকাৰ সকলোৰে আছে। সেয়েহে কাৰ্যসূচী বাতিল কৰা নহ’ব। অৱশ্যে, ভিৰ নিয়ন্ত্ৰণৰ ব্যৱস্থা কৰিবলৈ দিল্লী আৰক্ষীক নিৰ্দেশ দিয়া হৈছে।
ইয়াৰ পিছতেই আৰক্ষীয়ে নিৰাপত্তা ব্যৱস্থা অধিক কটকটীয়া কৰি তুলিছে। কনট প্লেছৰ চেণ্ট্ৰেল পাৰ্ক বন্ধ কৰি দিয়া হৈছে। সাধাৰণ ৰাইজক এই সমাৱেশত অংশগ্ৰহণ নকৰিবলৈ আহ্বান জনোৱাৰ লগতে আৰক্ষীয়ে জনাইছে যে কনট প্লেছ আৰু ইয়াৰ কাষৰীয়া অঞ্চলত ‘ভাৰতীয় নাগৰিক সুৰক্ষা সংহিতা’ৰ ১৬৩ ধাৰাৰ অধীনত নিষেধাজ্ঞা জাৰি কৰা হৈছে। আইন উলংঘা কৰিলে যথাযথ ব্যৱস্থা গ্ৰহণ কৰা হ’ব।
দিল্লী আৰক্ষীয়ে জনোৱা অনুসৰি, সৰ্বাধিক ১১জন লোককহে সমদল উলিওৱাৰ অনুমতি দিয়া হ’ব। একে সময়তে অতিৰিক্ত ছয় হেজাৰ আৰক্ষী নিয়োগ কৰা হৈছে। সকলো মিলাই শুকুৰবাৰে ৰাজধানীত মুঠ ৩২ হেজাৰ নিৰাপত্তাৰক্ষী নিয়োগ থাকিব।
এনে পৰিস্থিতিত অভিজিৎ দীপকে অভিযোগ কৰিছে যে নম্বৰপ্লেটবিহীন বাহনত আহি আইবিৰ বিষয়াসকলে তেওঁৰ ওপৰত চোৰাংচোৱাগিৰি চলাইছে। আনকি তেওঁৰ বাসগৃহতো নজৰ ৰখা হৈছে বুলি তেওঁ দাবী কৰিছে। তথাপি দীপকে হুংকাৰ দি কয় যে শুকুৰবাৰে তেওঁলোকে শান্তিপূৰ্ণভাৱে ত্ৰিৰংগা উত্তোলন কৰিব। ইয়াৰ বাবে কাৰাগাৰলৈ যাবলগীয়া হ’লেও তেওঁলোক সাজু বুলিও জনাইছে দীপকে।
এই প্ৰতিবাদ কেৱল দিল্লীতে সীমাবদ্ধ হৈ নাথাকক বুলিও তেওঁ আহ্বান জনাইছে। যিসকলে দিল্লীলৈ গৈ প্ৰতিবাদত অংশগ্ৰহণ কৰিব নোৱাৰিব, তেওঁলোকে নিজৰ নিজৰ চহৰতো একেদৰে প্ৰতিবাদ সাব্যস্ত কৰিবলৈ তেওঁ আহ্বান জনাইছে।
