দৈনিক অগ্ৰদূত ডিজিটেল ডেস্ক : সামান্যই অসামান্য! এই দর্শনকে ব্যক্তিগত জীৱনত প্ৰয়োগ কৰি নিজৰ স্বপ্নপূৰণ কৰিলে তেলেংগনাৰ এজন ব্যক্তিয়ে। কেৱল ১০ টকীয়া মুদ্ৰা প্ৰদান কৰিলে লোকজনে ক্রয় কৰিলে এখন স্কুটী। বিগত তিনি বছৰে তিল তিলকৈ জমা কৰা ১০ টকীয়া মুদ্রাৰেই তেওঁ ক্ৰয় কৰিলে এখন এক লাখ ২৩ হেজাৰ টকা মূল্যৰ এক্টিভা স্কুটী।
দক্ষিণৰ ৰাজ্যখনৰ মাঞ্চাৰিয়াল জিলাৰ বাসিন্দা ৫১ বছৰীয়া বি ৰবি যোছেফ। দৈনিক শাক-পাচলি, গেলামাল আদি ক্রয় কৰাৰ পাছত ঘূৰি অহা ধনৰ পৰা প্ৰতিদিনে তেওঁ ১০ টকাৰ মুদ্ৰাবোৰ জমা কৰি ৰাখিছিল। এইদৰেই যোছেফে জমা কৰে ১২ হেজাৰ ৩০০টা ১০ টকাৰ মুদ্রা। যাৰ মুঠ মূল্য এক লাখ ২৩ হেজাৰ টকা।
সেই জমা কৰা ধনেৰে দুচকীয়া বাহন ক্ৰয় কৰিব বুলি প্রথমে তেওঁ ভবা নাছিল। বৰঞ্চ ভাবিছিল যে এনে কিবা কৰিব, যিটো পৰিয়ালৰ কামত আহিব।
যোছেফৰ পূৰ্বে এখন মটৰ চাইকেল আছিল। যদিও শেহতীয়াকৈ সেইখনত সমস্যাই দেখা দিছিল। ভালদৰে কাম নকৰিছিল। সেই কাৰণেই তেওঁ এখন নতুন দুচকীয়া বাহন ক্ৰয় কৰাৰ সিদ্ধান্ত লয়।
১৫ দিনৰ পূৰ্বে যোছেফে হোণ্ডাৰ এখন শ্ব’কমৰ স’তে যোগাযোগ কৰে আৰু তেওঁলোকে ১২,৩০০টা মুদ্রা ল’বলৈ ইচ্ছুক হয় নে নহয়, জানিব বিচাৰে। শ্ব’ৰূমৰ মেনেজাৰ সন্মত হোৱাত লোকজনে ১০ টকাৰ সেই ১২,৩০০টা মুদ্রা, অর্থাৎ এক লাখ ২৩ হেজাৰ টকাৰ বিনিময়ত হোন্ডা এক্টিভা স্কুটী এখন ক্রয় কৰে। এইদৰেই তিল তিলকৈ জমা কৰা ধনেৰে স্বপ্নপূৰণ কৰিলে লোকজনে।
