মঙলদৈ লোকসভা সমষ্টিৰ প্ৰাৰ্থী ভুৱনেশ্বৰ কলিতাই ভোট দিব নোৱাৰিলে

ৰঙিয়া : মঙলদৈ লোকসভা সমষ্টিৰ কংগ্ৰেছ দলৰ প্ৰাৰ্থী, ৰাজ্য সভাৰ সাংসদ, অসম প্ৰদেশ কংগ্ৰেছ কমিটীৰ প্ৰাক্তন সভাপতি ভুৱনেশ্বৰ কলিতাই আজি নিজৰ ভোটটো দিব নোৱাৰিলে। তেওঁ আজি বিয়লি ঠিক চাৰি বজাত নিজৰ গৃহ সমষ্টি সীতাৰা প্ৰাথমিক বিদ্যালয় ভোট কেন্দ্ৰত ভোটাধিকাৰ সাব্যস্ত কৰিব গৈ বিফল মনোৰথে হৈ উভতি যাব লগা হ ল। অৱশ্যে তেওঁৰ পুত্ৰ সন্দিপ কলিতাই সেই কেন্দ্ৰতে ভোটাধিকাৰ সাব্যস্ত কৰে। প্ৰাৰ্থী কলিতাই মনোনয়ন পত্ৰ দাখিলৰ সময় প্ৰদান কৰা ঘোষনা পত্ৰত তেওঁ গুৱাহাটী লোকসভা সমষ্টিৰ ভোটাৰ তালিকাত নাম থকা বুলি উল্লেখ কৰে। ফলত তেওঁ যেতিয়া গৃহ সমষ্টি ৰঙিয়া সিতাৰা প্ৰাথমিক বিদ্যালয় ভোট কেন্দ্ৰত সপুত্ৰ ভোটাধিকাৰ সাব্যস্ত কৰিব যায় তেতিয়া কেন্দ্ৰটোত কৰ্তব্যৰত প্ৰিজাইডিং বিষয়া গৰাকীয়ে তেওঁক ৰঙিয়াৰ পৰিৱৰ্তে গুৱাহাটীত ভোটদান কৰিবলৈ পৰামৰ্শ দিয়ে। ফলত নিজৰ ভোটটো নিদি ভোট কেন্দ্ৰৰ পৰা ওলাই আহে।