আজিৰে পৰা বহিঃৰাজ্যত কৰ্মৰত হৈ থকা হেজাৰ হেজাৰ যুৱক যুৱতী উভতি আহিব অসমলৈ । তাৰ বাবে স্বাস্থ্য বিভাগে প্ৰস্তুতি সম্পূৰ্ণ কৰিছে । ইয়াক এক ডাঙৰ প্ৰত্যাহ্বান বুলি সদৰী কৰি স্বাস্থ্যমন্ত্ৰী ড° হিমন্ত বিশ্ব শৰ্মাই কয় “সুৰক্ষাৰ বাবেই প্ৰতিটো সমষ্টিত স্থানীয়ভাৱে কিছু সামাজিক গোট গঠন কৰা হ’ব । এই ক্ষেত্ৰত স্থানীয় বিধায়ক বা জন প্ৰতিনিধি, দল সংগঠন, সদাশয় ব্যক্তিক সহায় সহযোগিতা কৰিবলৈ আমি আহ্বান জনাইছো ৷ সকলো কথা চৰকাৰে কৰিব বুলি আশা কৰি থাকিলে নহ’ব । সমাজৰ প্ৰত্যেকজন ব্যক্তিয়ে এই ক্ষেত্ৰত সজাগ থাকিব লাগিব । কোৱাৰেন্টাইনত থকা ব্যক্তিসকল যাতে ঘৰতে থাকে, কোনো কাৰণতে যাতে ঘৰৰ পৰা ওলাই যাব নোৱাৰে সেই কথা সমাজৰ প্ৰত্যেকজন ব্যক্তিয়ে লক্ষ্য ৰাখিব লাগিব ৷”
কোৱাৰেন্টাইনত থকা লোককো ঘৰৰ পৰা নোলাবলৈ তেওঁ আহ্বান জনায় । এই ক্ষেত্ৰত প্ৰয়োজন হ’লে সংশ্লিষ্ট পৰিয়ালৰ খোৱা-বোৱাৰ দায়িত্ব সমাজক ল’বলৈ তেওঁ কয় । মন্ত্ৰীজনে লগতে জনায় যে পূব অসমলৈ অহা যাত্ৰীসকলক লৈ ৰেলসমূহ ডিব্ৰুগড়লৈ যাব । তাত প্ৰতিজন যাত্ৰীৰ স্কীনিং কৰি নিজ নিজ জিলালৈ প্ৰেৰণ কৰা হ’ব । সেইবাবে ডিব্ৰুগড়ত এটা মাণ্ডলিক স্কীনিং কেন্দ্ৰ স্থাপন কৰা হ’ব ৷ তাৰ বাবেও প্ৰস্তুতি সম্পূৰ্ণ কৰা হৈছে ৷ উল্লেখযোগ্য যে মন্ত্ৰীজনে যোৰহাট চিকিৎসা মহাবিদ্যালয় হাস্পতালত নতুনকৈ সংস্থাপন কৰা ৫০ খন আই চি ইউ সংলগ্ন বিছনা উদ্বোধন কৰে । ইয়াৰ ফলত চিকিৎসা মহাবিদ্যালয়খনত আই চি ইউৰ ৬৫ লৈ বৃদ্ধি হয় ।
তদুপৰি মন্ত্ৰীজনে জনায় যে অতি শীঘ্ৰে পুনৰ ৪০ খন আই চি ইউ বিচনা চিকিৎসা মহাবিদ্যালয়খনত মুকলি কৰা হ’ব । ড° শৰ্মাই বহিঃৰাজ্যৰ পৰা আহিবলগীয়া লোকৰ বাবে স্থাপন কৰা স্কীনিং ব্যৱস্থাৰ বুজ লোৱাৰ উপৰি কাজিৰঙা বিশ্ববিদ্যালয়ত স্থাপন কৰা কোৱাৰেন্টাইন কেন্দ্ৰৰো বুজ লয় । তাৰ পাছত ৰাজ্যিক স্বাস্থ্যমন্ত্ৰী পীযুষ হাজৰিকা আৰু সাংসদদ্বয় তপন গগৈ আৰু কামাখ্যা প্ৰসাদ তাছাক লৈ যোৰহাট চিকিৎসা মহাবিদ্যালয়ত কোৱাৰেন্টাইন আৰু ক’ভিড ৰোগীৰ বাবে সা-সুবিধা বুজ লয়।